ސްރީލަންކާގެ ބައްޓަރަމުއްލާގައި ތެރަޕިސްޓަކަށް އޮޅުވާލައިގެން ގެންގޮސް އަންހެނަކު ރޭޕްކުރިކަމުގެ ތުހުމަތުގައި 51 އަހަރުގެ ދިވެހި ފިރިހެނަކު އެ ގައުމުގެ ފުލުހުން ހައްޔަރުކޮށްފިއެވެ.
ސްރީލަންކާގެ ނޫސްތަކުން ރިޕޯޓުކޮށްފައިވާ ގޮތުގައި، މި ހާދިސާގައި ޝިކާރައަކަށްވެފައި ވަނީ އުމުރުން 28 އަހަރުގެ ޒުވާން އަންހެނެކެވެ. އޭނާއަކީ ތެރަޕިސްޓެއްގެ ގޮތުގައި މަސައްކަތްކުރަމުން އައި މީހެކެވެ. ތުހުމަތުކުރެވޭ މީހާ މި އަންހެން ކުއްޖާއަށް ގުޅައި، މަސާޖުކުރުމަށް ކަމަށް ބުނެ ބައްޓަރަމުއްލާގެ ޕެލަވައްޓާ ސަރަހައްދުގައި ހުންނަ ގެސްޓްހައުސްއެއްގެ ވިލާއަކަށް ގެންދިޔުމަށްފަހު އޭނާ ރޭޕްކުރީ ކަމަށް ނޫސްތަކުން ބުނެއެވެ.
މި މައްސަލައާ ގުޅިގެން ހައްޔަރުކޮށްފައި ވަނީ އުމުރުން 51 އަހަރުގެ ދިވެހި ފިރިހެނެކެވެ. ލަންކާގެ ނޫސްތަކުން ހާމަކޮށްފައިވާ ގޮތުގައި، އޭނާއަކީ ރާއްޖޭގައި ވަޑާންކުރުމުގެ މަސައްކަތްކުރާ ވަޑިއެކެވެ. މި މީހާ ސްރީލަންކާގެ ފުލުހުންގެ ބެލުމުގެ ދަށަށް ގެންގޮސްފައި ވަނީ މި ހިނގާ ޖުލައި މަހުގެ 4 ވަނަ ދުވަހުއެވެ.
މިހާރު ލަންކާގެ ފުލުހުން އަންނަނީ މި މައްސަލަ ވަރަށް ސީރިއަސް މައްސަލައެއްގެ ގޮތުގައި ތަހުގީގުކުރަމުންނެވެ. އެހެންނަމަވެސް، މި މައްސަލައިގެ ތަހުގީގު ކުރިއަށްދާ ގޮތުގެ އިތުރު ތަފުސީލެއް އަދި މިހާތަނަށް އެ ގައުމުގެ ފުލުހުން ހާމަކޮށްފައެއް ނުވެއެވެ.
ސްރީލަންކާގައި ދިވެއްސަކު މިފަދަ ބޮޑު ކުށެއްގެ ތުހުމަތުގައި ހައްޔަރުކުރެވިފައިވީ ނަމަވެސް، މިކަމާ ގުޅިގެން ދިވެހި ފުލުހުންގެ އިދާރާއިން މިހާތަނަށް އެއްވެސް އެއްޗެއް ރަސްމީކޮށް ހާމަކޮށްފައެއް ނުވެއެވެ.
