މާލެ ސަރަހައްދުގައި މިވަގުތު ކުރިއަށްދާ އެންމެ ބިޔަ އުމްރާނީ ތަރައްގީގެ މަޝްރޫއު ކަމަށްވާ ތިލަމާލެ ބްރިޖްގެ އަމަލީ މަސައްކަތުގެ ބޮޑުބައެއް ނިމި، މުޅި މަޝްރޫޢުގެ 75 އިންސައްތަ މިހާރު ފުރިހަމަކުރެވިފައިވާ ކަމަށް ހައުސިންގ މިނިސްޓްރީން ބުނެފިއެވެ.
އިންޑިއާގެ އެފްކޮންސް ކުންފުންޏާ ހަވާލުކޮށްގެން 2022 ވަނަ އަހަރު ފެށި މި މަޝްރޫއުގެ ތަފާސްހިސާބުތަކަށް ބަލާއިރު، މުޅި މަޝްރޫއުގެ ޖުމްލަ 74.90 އިންސައްތަ މަސައްކަތް މިހާރު ވަނީ އެއްކޮށް ނިންމާލެވިފައެވެ. މިވަގުތު މިނިސްޓްރީން އެންމެ ބޮޑު އިސްކަމެއްދީގެން ކުރިއަށްގެންދަނީ ބްރިޖުގެ ތަނބުތައް ގުޅާލުމަށް ބޭނުންވާ ޑެކްތައް އިންސްޓޯލްކުރުމުގެ މަސައްކަތެވެ.
މާލެ އާއި ވިލިމާލެއާ ދެމެދު ބްރިޖު ގުޅާލުމަށްޓަކައި މިހާރު ނުނިމި އޮތީ ހަމައެކަނި މެދުތެރޭގެ ސެގްމަންޓް ޑެކްގެ މަސައްކަތްތައް އެކަންޏެވެ.
މިވަގުތު ސައިޓުގައި އެންމެ ހަލުވިކަމާއެކު ކުރިއަށްދަނީ ބްރިޖުގެ ޑެކަށް ބޭނުންވާ ސެގްމަންޓުތައް ކާސްޓްކުރުމާއި އެ ތަކެތި ހަރުކުރުމުގެ މަސައްކަތެވެ. ތަފާސްހިސާބުތަކުން ދައްކާގޮތުގައި، ބްރިޖަށް ބޭނުންވާ ޖުމްލަ 1,222 ސެގްމަންޓުގެ ތެރެއިން 90.4 އިންސައްތަ ސެގްމަންޓް މިހާރު ވަނީ ކާސްޓްކޮށް ނިންމާފައެވެ. މީގެ ތެރެއިން 72.9 އިންސައްތަ ސެގްމަންޓް މިހާރު ވަނީ ބްރިޖުގެ ތަނބުތަކުގައި ހަރުކޮށް، ތަނބުތައް ގުޅާލުމަށް ބޭނުންކޮށްފައެވެ.
ދިމާވި އެކި ގޮންޖެހުންތަކާ ހުރެ މަސައްކަތްތަކަށް ކޮންމެވެސް ވަރެއްގެ ލަސްތަކެއް ކުރިމަތިވި ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ އަމާޒަކީ 2027 ވަނަ އަހަރުގެ ނިޔަލަށް މުޅި މަޝްރޫއު އެއްކޮށް ނިންމައި އާންމު ދަތުރުފަތުރަށް ބްރިޖު ހުޅުވާލުމެވެ. މި މަޝްރޫއަށް 500 މިލިއަން ޑޮލަރު ހޭދަވާނެއެވެ. އެއީ އިންޑިއާ ސަރުކާރުން ދޭ 100 މިލިއަން ޑޮލަރުގެ ގްރާންޓާއި، 400 މިލއަން ޑޮލަރުގެ ލައިން އޮފް ކްރެޑިޓުގެ ދަށުންނެވެ.
