ވޯލްޑް ކަޕް 2026 ގެ ގަދަ 16 ގެ މެޗުގައި ބެލްޖިއަމް އަތުން 4-1 ގެ ތަފާތު ބޮޑު ނަތީޖާއަކުން ބަލިވެ، މުބާރާތް ބާއްވާ ގައުމު ކަމަށްވާ އެމެރިކާ ކަޓާފައި ވާއިރު މިއީ އެމެރިކާގެ މޫނުމަތީގައި ބެލްޖިއަމުން ޖެހި ވަރުގަދަ އެތިފަހަރެކެވެ.
ސިއެޓްލްގެ ލޫމަން ފީލްޑްގައި ކުޅުނު މި މެޗުން އެމެރިކާ ބަލިވުމާއެކު، އެ ގައުމުގެ ސަޕޯޓަރުންނަށް ވަނީ ބޮޑު މާޔޫސްކަމެއް ކުރިމަތިވެފައެވެ.
މި މެޗު ފެށުމުގެ ކުރިންވެސް ވަނީ ބޮޑެތި ހޫނު ބަހުސްތަކެއް އުފެދިފައެވެ. އެގޮތުން، އެމެރިކާގެ ފޯވާޑް ފޯލަރިން ބަލޯގަންއަށް ފީފާއިން ކުރި ސަސްޕެންޝަން، އެމެރިކާގެ ރައީސް ޑޮނަލްޑް ޓްރަމްޕްގެ ނުފޫޒާއެކު އުވާލުމުން ގިނަ ބައެއްގެ ފާޑުކިޔުން ފީފާއަށް އަމާޒުވިއެވެ. ނަމަވެސް، މެޗުގައި ބަލޯގަންގެ ފަރާތުން ފެނުނީ އާދައިގެ ކުޅުމެކެވެ.
Overturn this. 🧏♂️ #USABEL pic.twitter.com/KcBAJp3Z7d
— Belgian Red Devils (@BelRedDevils) July 7, 2026
މެޗުގެ 9 ވަނަ މިނެޓުގައި ޗާލްސް ޑި ކެޓެލެއާ ވަނީ ބެލްޖިއަމަށް ލީޑު ނަގައިދީފައެވެ. އޭގެ ފަހުން ހޭންސް ވަނާކެން ލަނޑެއް ޖަހައި ފަރަގު ބޮޑުކުރިއިރު، ބެލްޖިއަމްގެ ތިންވަނަ ލަނޑުވެސް ޖެހީ ޑި ކެޓެލެއާއެވެ. މެޗުގެ ނަތީޖާ ކަށަވަރުކޮށްދިން ހަތަރުވަނަ ލަނޑު ޖަހައިދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ރޮމެލޫ ލުކާކޫއެވެ. ލަނޑަށްފަހު ބެލްޖިއަމްގެ ކުޅުންތެރިން ވަނީ ރައީސް ޓްރަމްޕްގެ މަޝްހޫރު ނެށުމާ ވައްތަރު ގޮތަކަށް އުފާފާޅުކޮށް، ސޯޝަލް މީޑިއާގައި އެމެރިކާއަށް މަލާމާތް ރައްދުކޮށްފައެވެ.
މެޗުގެ ކުރިން ބެލްޖިއަމްގެ ސަޕޯޓަރުން ވަނީ ”ފީފާ މާފިއާ“ ގޮވާ އަޑުއުފުލާފައެވެ. އެއީ އެހެން ގައުމުތަކުގެ ކުޅުންތެރިންނާއި ރެފްރީންނަށް ވިސާގެ މައްސަލަ ކުރިމަތިވުމުން ފީފާގެ ރައީސް ޖިއާނީ އިންފަންޓީނޯ އެކަމާ އަޅާނުލައި، އެމެރިކާގެ ކުޅުންތެރިޔާގެ ސަސްޕެންޝަން އުވާލުމުގައި ތަފާތުކުރުން ގެންގުޅުއްވުމުންނެވެ.
މެޗަށްފަހު ބެލްޖިއަމްގެ ކެޕްޓަން ޔޫރީ ޓީލެމަންސް ބުނީ، ބަލޯގަންގެ މައްސަލައިގައި ކުޅުންތެރިން ތިބީ ވަރަށް ބޮޑަށް ހިތްހަމަނުޖެހިފައި ކަމަށާއި، އެކަމުގެ ޖަވާބު ދަނޑުމަތީގައި ދެއްކުނީތީ އުފާކުރާ ކަމަށެވެ. ބެލްޖިއަމްގެ ރެޑް ޑެވިލްސްގެ ރަސްމީ އެކައުންޓުން ވަނީ ”މި ނަތީޖާވެސް ބަދަލުކޮށްބަލަ“ (Overturn this) ޖަހައި އެމެރިކާއަށް މަލާމާތްކޮށްފައެވެ.
24 އަހަރަށްފަހު ވޯލްޑް ކަޕްގެ ކުއާޓާ ފައިނަލަށް ދިއުމަށް އެމެރިކާ ކުރި އުންމީދު ފެނަށް ދިޔައިރު، ބެލްޖިއަމް ދެން ބައްދަލުކުރާނީ އަންނަ ހުކުރު ދުވަހު ލޮސް އެންޖެލިސްގައި ސްޕެއިންއާއެވެ.
