ކްރިމިނަލް ކޯޓަށް ތިން ގާޒީން އައްޔަންކުރުމަށްޓަކައި، އެ މަގާމަށް ކުރިމަތިލުމުގެ ފުރުސަތު ޖުޑީޝަލް ސަރވިސް ކޮމިޝަން (ޖޭއެސްސީ) އިން ހުޅުވާލައިފިއެވެ.
ޖިނާއީ މައްސަލަތައް ބެލުމުގެ އިހުތިސާސް ލިބިގެންވާ ކްރިމިނަލް ކޯޓުގެ ގާޒީކަމުގެ މަގާމަށް ހޮވޭ ބޭފުޅަކަށް މުސާރަ އާއި އިނާޔަތްތަކުގެ ގޮތުގައި މަހަކު ޖުމްލަ 60,000 ރުފިޔާ ލިބޭނެއެވެ. އޭގެ ތެރޭގައި ހިމެނެނީ އަސާސީ މުސާރައިގެ ގޮތުގައި ކަނޑައަޅާފައިވާ 37,700 ރުފިޔާ އާއި، އެކިއެކި އެލަވަންސްތަކުގެ ގޮތުގައި ދެވޭ 22,300 ރުފިޔާއެވެ. މީގެ އިތުރުން ރައްޔިތުންގެ މަޖިލީހުން ކަނޑައަޅާފައިވާ އުސޫލުން މެޑިކަލް އިންޝުއަރެންސްވެސް ލިބޭނެއެވެ.
މި މަގާމަށް ކުރިމަތިލާ ފަރާތްތަކުގެ ކިބައިގައި ހުންނަންޖެހޭ އަސާސީ ޝަރުތުތަކުގެ ތެރޭގައި، އިސްލާމީ ޝަރީއާ ނުވަތަ ގާނޫނީ ދާއިރާއިން ފުރަތަމަ ޑިގްރީ ހާސިލުކޮށްފައިވުން ހިމެނެއެވެ. އަދި ފަނޑިޔާރުކަމުގެ ނުވަތަ ގާނޫނީ ވަކީލުކަމުގެ ދާއިރާއިން މަދުވެގެން ތިން އަހަރު ދުވަހުގެ ތަޖުރިބާ ލިބިފައިވުން ލާޒިމުކުރެއެވެ.
ކްރިމިނަލް ކޯޓުގެ ގާޒީންގެ މަގާމުތަކެއް ހުސްވެފައިވަނީ، އެ ކޯޓުގައި ކުރިން މަސައްކަތްކުރެއްވި ގާޒީ އިސްމާއިލް ޝަފީއު ހައިކޯޓުގެ ފަނޑިޔާރުކަމަށް ބަދަލުވެވަޑައިގަތުމާއި، ގާޒީ ހުސައިން ފާއިޒް ރަޝާދު މަގާމުން ވަކިކުރެއްވުމާ ގުޅިގެންނެވެ. މި ބަދަލުތަކާއެކު މިހާރު އެ ކޯޓުގައި ތިއްބެވީ 12 ގާޒީންނެވެ.
މި މަގާމަށް ޝައުގުވެރިވާ ފަރާތްތަކުން ކުރިމަތިލުމަށް ޖޭއެސްސީން ދީފައިވާ ސުންގަޑިއަކީ މި ހިނގާ ޖުލައި މަހުގެ 16 ވަނަ ދުވަހެވެ.
