އިޒްރޭލަށް އޮތް ހަމައެކަނި ބާރުގަދަ ބައިވެރިޔާއަކީ އެމެރިކާ ކަމަށް ބުނެ އެމެރިކާގެ ނައިބު ރައީސް ޖޭޑީ ވެންސް ދެއްކި ވާހަކަތަކަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ފާޅުގައި ރައްދުދީ، އިޒްރޭލުގެ ދިފާޢުގައި އިންޑިއާގެ 1.4 ބިލިއަން މީހުންގެ ވަރުގަދަ އެހީތެރިކަން އެބައޮތްކަމަށް ބުނެފިއެވެ.
ފޮކްސް ނިއުސްގެ ’ސަންޑޭ ބްރީފިންގ‘ ޕްރޮގްރާމްގައި ވާހަކަދައްކަމުން ނަތަންޔާހޫ ބުނީ، ވެންސްއާ އޮންނަ ގުޅުމަށް އިޙްތިރާމްކުރާ ކަމަށާއި، ނަމަވެސް އޭނާ ދައްކާ ހުރިހާ ވާހަކައަކަށް އެއްބަސްނުވެވޭނެ ކަމަށެވެ.
އެމެރިކާގެ އިންޒާރާއި އިންޑިއާގެ ބާރު ދެއްކުން
އެމެރިކާއިން އިޒްރޭލަށް ދެމުންދާ ބިލިއަނުން ހަތިޔާރުގެ އެހީ ހަނދާންކޮށްދީ، ޖޭޑީ ވެންސް ވަނީ އެމެރިކާއާއި އީރާނާ ދެމެދު ވެފައިވާ އެމް.އޯ.ޔޫ އަށް ފާޑުކިޔުން ހުއްޓާލުމަށް އިޒްރޭލުގެ ކެބިނެޓް މިނިސްޓަރުންނަށް އަންގާފައެވެ. ވެންސް ބުނީ ދުނިޔޭގައި އިޒްރޭލަށް ހަމްދަރުދީވާ ހަމައެކަނި ލީޑަރަކީ ޑޮނަލްޑް ޓްރަމްޕް ކަމަށެވެ. ވެންސްގެ މި ވާހަކައަށް ރައްދުދެމުން ނަތަންޔާހޫ ބުނީ:
”އަހަރެމެންގެ އެހެން ރައްޓެހިންވެސް އެބަތިބި. އިންޑިއާ ކިޔާ ކުޑަކުޑަ ޤައުމެއް އެބައޮތް، އެތަނުގައި 1.4 ބިލިއަން މީހުން އެބައުޅޭ. އަދި ބަލާބަލަ، އެތަނުން އަހަރެމެންނަށް ލިބެނީ ކިހާ ބޮޑު ތާއީދެއް! އަހަރެންގެ ފޭސްބުކް އެކައުންޓަށް ބެލިޔަސް އެނގޭނެ އިންޑިއާގެ ރައްޔިތުންގެ ފަރާތުން ލިބޭ ތާއީދު އޮހެމުންދާވަރު.“
އަސްކަރީ އެހީތެރިކަމާއި ޑިޕްލޮމެޓިކް ޚިޔާނާތް
ބައިނަލްއަޤްވާމީ އިންސާނީ ޖަމާޢަތްތަކުން ހާމަކުރާ ގޮތުގައި، އިންޑިއާގެ މޯދީ ސަރުކާރުން ދަނީ އިޒްރޭލުން ހިންގާ ޤަތުލުޢާންމަށް ސީދާގޮތުން ހަތިޔާރާއި ޓެކްނޮލޮޖީ ފޯރުކޮށްދެމުންނެވެ. އިންޑިއާގެ ހައިދަރުއާބާދުގައި ހުންނަ ފެކްޓްރީތަކުން އުފައްދާ އަސްކަރީ ޑްރޯންތަކުގެ ބައިތަކާއި، މަތީ ފެންވަރުގެ ގޮވާތަކެތި ސީދާ އިޒްރޭލުގެ އަސްކަރިއްޔާއަށް ދަނީ ސަޕްލައި ކުރަމުންނެވެ.
މީގެ އިތުރުން، އދ. ފަދަ ބައިނަލްއަޤްވާމީ މަޖިލިސްތަކުގައި ޣައްޒާގެ ހަނގުރާމަ ހުއްޓާލުމަށް ގޮވާލާ ވޯޓުތަކުގައި އިންޑިއާއިން ވަނީ ވަކި ފަރާތަކަށް ވޯޓުނުދީ ހިފަހައްޓާފައެވެ. މިއީ އިޒްރޭލުގެ ޖަރީމާތަކަށް ބައިނަލްއަޤްވާމީ މައިދާނުގައި އިންޑިއާއިން ދޭ ބޮޑު ޑިޕްލޮމެޓިކް ހިމާޔަތެކެވެ.
ސިއްރު އެއްބަސްވުންތަކާއި ލުބުނާނުގެ މަސްރަޙު
ނަތަންޔާހޫ އިތުރަށް ބުނި ގޮތުގައި، ސޯޝަލް މީޑިއާގައި އިޒްރޭލާ ދެކޮޅު ޕްރޮޕަގަންޑާ ގިނަވުމުން ބޭރުފުށުން ފާޑުކިޔުންތައް ފެނުނު ނަމަވެސް، ދުނިޔޭގެ ގިނަ ލީޑަރުން ސިއްރިއްޔާތުގައި އިޒްރޭލަށް ގުޅައި، ސައިބަރ ސެކިއުރިޓީއާއި އަސްކަރީ ޓެކްނޮލޮޖީގެ އެއްބަސްވުންތައް ހަދަން ބޭނުންވެއެވެ. އިޒްރޭލަކީ ދުނިޔޭގެ 2 ވަނަ ސައިބަރ ބާރު ކަމަށްވުމުން، އެމެރިކާގެ އެހީއާ ނުލައިވެސް އިޒްރޭލު އެކަނިވެރި ނުވާނެކަން އޭނާ ހާމަކުރިއެވެ. މިއީ ލުބުނާނު ބޯޑަރުގެ އަސްކަރީ ކަންކަމުގައި އެމެރިކާއިން އިޒްރޭލުގެ ސިޔާސަތުތައް މައިކްރޯމެނޭޖް ކުރަން އުޅުމުން ދިން ހެޑްސް-އަޕް އެކެވެ.
