ޓްރާންސްޕޯޓް ދާއިރާގެ ހިދުމަތްތައް ހޯދުމުގައި އާންމު ރައްޔިތުންނަށް މިހާރު ކުރިމަތިވަމުންދާ ގޮންޖެހުންތަކަށް ދާއިމީ ހައްލެއް ހޯދައިދިނުމުގެ ގޮތުން، ”ވަންގަވް“ މެދުވެރިކޮށް ފުރިހަމަ ޑިޖިޓަލް ސިސްޓަމެއް ގާއިމުކުރުމުގެ މަސައްކަތް ކުރަމުންދާ ކަމަށް އިކޮނޮމިކް މިނިސްޓަރު މުޙައްމަދު ސަޢީދު މިއަދު ވިދާޅުވެއްޖެއެވެ.
މިނިސްޓަރު ސަޢީދު މި މޭރުމުން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި، ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ކުރެއްވި ސުވާލަކަށް ޖަވާބު ދެއްވަމުންނެވެ.
މެންބަރުގެ އެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ، މިހާރުވެސް މިނިސްޓްރީގެ ދަތުރުފަތުރުގެ ހިދުމަތްތަކަށް އެދި ހުށަހެޅުމުގެ ފުރުސަތު އޮންލައިން ޕޯޓަލް މެދުވެރިކޮށް 24 ގަޑިއިރު އާންމުންނަށް ހުޅުވާލެވިފައިވާ ކަމަށެވެ. ނަމަވެސް، މިހާރު ބޭނުންކުރަމުންދާ ސިސްޓަމް އިތުރަށް ހަރުދަނާކޮށް، ރައްޔިތުންނަށް މިހާރަށްވުރެ ލުއިފަސޭހަ ޒަމާނީ ނިޒާމެއްގެ ތެރެއިން ހިދުމަތް ދިނުމަކީ މި ސަރުކާރުގެ އަމާޒެއް ކަމަށް މިނިސްޓަރު ވިދާޅުވިއެވެ.
”މިހާރު ބޭނުންކުރަމުންދާ ސިސްޓަމަށްވުރެ ލުއިފަސޭހަ އަދި ޒަމާނީ ފުލް ޑިޖިޓަލް ސިސްޓަމެއް ވަންގަވް މެދުވެރިކޮށް ގާއިމްކުރުމުގެ މަސައްކަތް މި ވުޒާރާއިން މިހާރު ކުރަމުންދާ ވާހަކަ ދަންނަވާލަން،“ – މިނިސްޓަރު ސަޢީދު ވިދާޅުވިއެވެ.
މިނިސްޓަރު އިތުރަށް ފާހަގަކުރެއްވި ގޮތުގައި، ޓްރާންސްޕޯޓްގެ ހިދުމަތްތައް ”ވަންގަވް“ ގެ ދަށަށް ބަދަލުވެގެން ދިއުމާއެކު، ހިދުމަތް ހޯދުމުގައި ހުރި އިދާރީ ދަތިތަކަށް ނިމުމެއް އަންނާނެއެވެ. އަދި މީގެ ސަބަބުން ރައްޔިތުންނަށް އަވަސް އަދި އިތުބާރު ހުރި ހިދުމަތެއް ލިބިގެންދާނެކަމުގެ ޔަގީންކަން މިނިސްޓަރު ދެއްވިއެވެ.
ސަރުކާރުގެ އިދާރާތަކުން ރައްޔިތުންނަށް ދޭ ހިދުމަތްތައް ޑިޖިޓަލައިޒް ކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ސަރުކާރުން ވަރަށް ބޮޑު އިސްކަމެއްދީގެން ކުރަމުން އަންނަ މަސައްކަތެކެވެ.
