ހިޔާ ފްލެޓްތައް ލިބިފައިވާ ފަރާތްތަކަށް ދިރިއުޅުން އިތުރަށް ތަނަވަސްކުރަން ބޯހިޔާވަހިކަމުގެ އާ ފުރުސަތުތައް ހޯއްދަވާދެއްވަން މަސައްކަތް ކުރައްވާނެ ކަމަށް ހައުސިންގ މިނިސްޓަރު ޑރ. ޢަބްދުﷲ މުއްޠަލިބު މިރޭ ވިދާޅުވެއްޖެއެވެ.
ހިޔާގެ 16 ޓަވަރުގައި އިތުރު ލިފްޓް ހަރުކޮށް ނިމުން ފާހަގަކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރު ޑރ. ޢަބްދުﷲ މުއްޠަލިބް ވިދާޅުވީ، ހިޔާ ފްލެޓްތަކުގެ ދެ ކޮޓަރީގެ އެޕާޓްމަންޓްތަކަށް ބަދަލުވި ގިނަ އާއިލާތަކެއްގެ ދިރިއުޅުމުގެ ހާލަތު ބަދަލުވުމުގެ ސަބަބުން އެހެން ތަންތަނަށް ބަދަލުވާން އެ އާއިލާތަކުން ބޭނުންވެފައިވާ ކަމަށެވެ.
ނަމަވެސް، އެފަދަ ބަދަލެއް ގެނައުމަކީ ދަތި ކަމެއްކަން ފާހަގަކުރައްވައި މިނިސްޓަރު ވިދާޅުވީ، މި ވަގުތު ސަރުކާރުން އެންމެ ބޮޑު އިސްކަމެއް ދޭންޖެހެނީ އެއްވެސް ބޯހިޔާވަހިކަމެއް ނެތް ފަރާތްތަކަށް އަމާޒުކޮށްގެން ބޯހިޔާވަހިކަން ފޯރުކޮށްދިނުން ކަމަށެވެ.
މިނިސްޓަރު ވިދާޅުވީ، ހިޔާ ފުލެޓްތަކުގައި ދިރިއުޅޭ ފަރާތްތަކަށް ދިމާވެފައިވާ ދަތިތަކަށް ހައްލެއް ހޯދައިދީ، މިހާރަށްވުރެ ތަނަވަސް ދިރިއުޅުމެއްގެ ފުރުސަތު ފަހިކޮށްދިނުމަށް ސަރުކާރުން މަސައްކަތް ކުރައްވާނެ ކަމަށެވެ. ނަމަވެސް އެކަމާ ގުޅޭ އިތުރު ތަފްސީލުތައް ހާމަކުރައްވަން މި ވަގުތު ދަތި ކަމަށް މިނިސްޓަރު ވިދާޅުވިއެވެ.
ބޮޑު އާބާދީއަކަށް ބޭނުންވާ ޒަރޫރީ ހިދުމަތްތައް ފޯރުކޮށްދިނުމުގައި ސަރުކާރަށް ހުރި ގޮންޖެހުންތަކަށް އަލިއަޅުވާލައްވަމުން މިނިސްޓަރު ވިދާޅުވީ، ހިޔާ ސަރަހައްދުގެ ހުސްބިންތައް ނުވަތަ ”އޯޕަން ސްޕޭސް“ ތަކުން ކުރީ ސަރުކާރުން ގޯތި ދޫކޮށްފައިވުމުގެ ސަބަބުން، އިތުރު ހިދުމަތްތައް ގާއިމުކުރުމަށް ބިން ނެތުމުގެ ދަތިކަން ކުރިމަތިވެފައިވީ ނަމަވެސް ވޭތުވެދިޔަ ދެ އަހަރުގެ ތެރޭގައި ހިޔާ ފުލެޓްގައި ދިރިއުޅޭ ރައްޔިތުންގެ ލާބަޔާއި މަންފާއަށްޓަކައި ގިނަގުނަ މަސައްކަތްތަކެއް ކުރެވިފައިވާ ކަމަށެވެ.
ކުރިއަށް އޮތް ތަނުގައި ވެސް ހިޔާ ފުލެޓުގައި ދިރިއުޅޭ ފަރާތްތަކުގެ ދިރިއުޅުން ފަސޭހަ ކުރުމަށް ސަރުކާރުން ހާއްސަ އިސްކަމެއް ދެއްވާނެކަމުގެ ޔަގީންކަން މިނިސްޓަރު ދެއްވިއެވެ.
