އިންޑިއާގެ އުއްތަރް ޕްރަދޭޝްގެ ބަރާބަންކީ ޑިސްޓްރިކްޓްގައި ހަރުކަށި ހިންދޫ ”ގޯރަކްޝަކް“ (އަމިއްލައަށް ޤާނޫނު އަތަށް ނަގައިގެން އުޅޭ ގެރި ހިމާޔަތްކުރާ ވީޖިލާންޓީން) ޖަމާޢަތްތަކުން މުސްލިމް ޒުވާނަކު ހިފަހައްޓައި، އޭނާއަށް ވަރަށް ބޮޑަށް އަނިޔާކޮށް، ގެރިއަކަށް ސަޖިދަޖަހަން މަޖުބޫރުކުރާ ވީޑިއޯއެއް ސޯޝަލް މީޑިއާގައި ފެތުރި، މަޝްރަހު ވަރަށް ބޮޑަށް ހޫނުވެއްޖެއެވެ. މި ނުލަފާ ޖަރީމާ ހިންގާފައިވަނީ ”ސަނާތަން ގޯރަކްޝާ ދަލް“ ކިޔާ ހަރުކަށި ހިންދޫ ގްރޫޕަކުންނެވެ.
The assault and humiliation of a Muslim man in Barabanki, including forcing him to perform religious acts against his will, is deeply disturbing. Such acts are not expressions of faith but crimes that violate human dignity and the Constitution.
When vigilante groups believe they… pic.twitter.com/jq7Hlgb0Ki
— Dr Syed Naseer Hussain, M P (@NasirHussainINC) July 4, 2026
އިހާނެތިކޮށް ހިތައި މަޖުބޫރުން ޝިރުކުގެ ޢަމަލުތައް ކުރުވުން
މި ނިރުބަވެރި ހިންދޫ ޖަމާޢަތުން 15 އަށްވުރެ ގިނަ މީހުން ވެގެން އެ މުސްލިމް މީހާ ވަށާލައި، އޭނާ ގެރިއަކަށް ފާޑުކީކަމަށް ބުނެ ވަނީ ރަހުމެއް ނެތްގޮތުގައި ތަޅާފައެވެ. އޭނާ މާފަށް އެދެމުން ދިޔައިރުވެސް އަނިޔާކުރުން ހުއްޓައެއް ނުލައެވެ.
އަދި އޭނާގެ ބައްޕައަށް ފޯނުން ގުޅުވައި، ބަދުބަސް ބުނެ ބިރުދެއްކުމަށްފަހު، ކޮއްޓަކަށް ވައްދައި ގެރިއަކަށް ކަކޫޖައްސައި، އޭގެ ފައިގާ ބީއްސުވައި، ހިންދޫ ދީނީ ޝިއާރުތައް ކިޔަން މަޖުބޫރުކޮށް، ސަޖިދަޖަހާނެ ގޮތް ވަނީ ދައްކާފައެވެ. މި ވީޑިއޯ ސޯޝަލް މީޑިއާއަށް އަޕްލޯޑް ކުރަމުން އެމީހުން ވަނީ އެ މުސްލިމް މީހާއަކީ ”ޖިހާދީއެއް“ ކަމަށް ސިފަކޮށް، އޭނާ ލޭއޮހޮރުވުމެއް ހިންގަން އުޅުނު ކަމަށް ބުނެ ދޮގު ޕްރޮޕަގަންޑާ ފަތުރާފައެވެ.
ފުލުހުންގެ އިދާރާގެ ނިޒާމީ ފުށުއެރުންތައް
ވީޑިއޯ އާންމުވުމާއެކު، އިންޓަނެޓްގައި ފުލުހުންގެ ރަސްމީ އެކައުންޓުން ވަނީ މިކަމުގެ މައުލޫމާތު ދިނުމަށާއި މައްސަލަ ހުށަހެޅުމަށް އެދިފައެވެ. ނަމަވެސް، ނޫސްވެރިން ސީދާ ބަރާބަންކީގެ ފުލުހުންގެ މައި އޮފީހާ ސުވާލުކުރުމުން، އެތަނުގެ ޕަބްލިކް ރިލޭޝަންސް އޮފިސަރު ބުނީ މިފަދަ އެއްވެސް ހާދިސާއެއް ހިނގައިގެން އުޅޭކަން ފުލުހުންނަށް ރަސްމީކޮށް އެނގިފައިނެތް ކަމަށެވެ.
މިފަދަ ފުށުއެރުންތަކުން ހާމަވަނީ، ސޯޝަލް މީޑިއާ ޓީމުތަކުން އާންމުންގެ ޕްރެޝަރަށް ފިޔަވަޅު އަޅަން އުޅޭކަން ދެއްކިއެއް ކަމަކު، ގްރައުންޑް ކޮމާންޑުން އަޅާނުލާ އޮންނަ އޮތުމެވެ. މިއީ މިފަދަ ހަރުކަށި ގްރޫޕްތަކަށް ޤާނޫނީ ފިޔަވަޅުން ސަލާމަތްވުމަށް ދައުލަތުގެ ނިޒާމުގެ ތެރެއިން ނުސީދާގޮތުން ލިބޭ ޙިމާޔަތެއްގެ ގޮތުގައި އިންސާނީ ޙައްޤުތަކަށް މަސައްކަތްކުރާ ފަރާތްތަކުން ސިފަކުރެއެވެ.
ދައުލަތުގެ ހިމާޔަތާއި ނިޒާމީ ނަފްރަތު އާންމުވުން
އިންސާނީ ޙައްޤުތަކަށް މަސައްކަތްކުރާ ޖަމާޢަތްތަކުން ފާހަގަކުރާގޮތުގައި، ބީޖޭޕީ ވެރިކަންކުރާ ސްޓޭޓްތަކުގައި މުސްލިމުންނާ ދެކޮޅަށް ހިންގާ ޖަރީމާތަކާއި ބޭއިންސާފު ދަނީ ދުވަހުން ދުވަހަށް އިތުރުވަމުންނެވެ. ބީޖޭޕީގެ ސަރުކާރުތަކުން މިފަދަ އަނިޔާވެރި ޢަމަލުތަކަށް ނުސީދާގޮތުން ހިތްވަރުދީ، މުސްލިމުންނާ ދެކޮޅަށް ހިންގާ ހަރުކަށި ހަމަލާތަކަކީ އާދައިގެ ކަންކަމުގެ ގޮތުގައި ވަނީ ހަދާފައެވެ.
މި ވީޑިއޯއިން ފެންނަ ފަދަ ހަރުކަށި ހިންދޫ ގްރޫޕްތަކުން ޤާނޫނަށް ބެލުމެއްނެތް ގޮތްގޮތަށް ކުށްތައް ކުރަނީ، އެމީހުން ކޮންމެފަދަ ޖަރީމާއެއް ހިންގިޔަސް ބީޖޭޕީގެ މަޖިލިސް މެންބަރުންނާއި ސަރުކާރުގެ އިސްވެރިން އެމީހުން ކޯޓުތަކުން ސަލާމަތްކޮށް، ބެއިލް ހޯދައިދޭނެކަން ޔަޤީންވާތީއެވެ. ދައުލަތުގެ މިފަދަ ފުރިހަމަ ޙިމާޔަތާއި ”އިމްޕިއުނިޓީ“ ލިބޭތީ، މި ހައްދުފަހައެޅި ހިންދޫ ޖަމާޢަތްތަކާ އާންމު ފަރުދުން ދަނީ އެމީހުންގެ ނަސްލު ނައްތާލުމުގެ ނުބައި ނިޔަތް ފާޅުގައި ސޯޝަލް މީޑިއާގައި ދައްކައި، އަނިޔާވެރި ލާއިންސާނީ ޖަރީމާތައް ހިންގައި، އިންޑިއާގައި ދިރިއުޅެމުންދާ މުސްލިމުންގެ ސަލާމަތްތެރިކަން މުޅިން ނަގާލަމުންނެވެ.
