ކުރީގެ ރައީސުން ކަމަށްވާ މުހައްމަދު ނަޝީދު، އަބްދުﷲ ޔާމީން އަދި އިބްރާހިމް މުހައްމަދު ސޯލިހު އެކުގައި މަސައްކަތް ކުރެއްވުމަށް އުފެއްދި އިއްތިހާދުގެ މަސައްކަތްތައް އެކަށީގެންވާ ބާރުމިނެއްގައި ކުރިއަށް ނުދާ ކަމަށް ރައީސް ނަޝީދު މިއަދު ވިދާޅުވެއްޖެ އެވެ.
ނޫސްވެރިކަމާއި ހިޔާލުފާޅު ކުރުމުގެ މިނިވަންކަން ހިމާޔަތް ކުރުމަށް އެއްބަސްވެ، ތިން ރައީސުން އެކުލަވާލެއްވި އިއްތިހާދުގެ މަސައްކަތްތައް ކުރިއަށް ގެންދިއުމަށްޓަކައި މަންދޫބުންގެ ކޮމިޓީއެއް ވަނީ އުފައްދާފަ އެވެ. އެ ބޭފުޅުން މީގެ ކުރިން ހާމަކުރެއްވި ގޮތުގައި، އެ މަސައްކަތްތައް ކުރިއަށް ގެންދާނެ ވަކި ސްޓްރެޓެޖީތަކަކާއި ޓައިމްލައިންތަކެއް ފަންނީ ބޭފުޅުންނާ ގުޅިގެން އެކުލަވާލުމަށް ވަނީ ހަމަޖެހިފައެވެ.
އެމްޑީޕީގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ނަޝީދު ވިދާޅުވީ، މަންދޫބުންގެ ކޮމިޓީން މިހާތަނަށް ދެ ބައްދަލުވުމެއް ބޭއްވި ނަމަވެސް، އުންމީދު ކުރެއްވި މިންވަރަށް މަސައްކަތްތައް ބާރު ސްޕީޑުގައި ކުރިއަށް ނުދާ ކަމަށެވެ. ނަމަވެސް، އެ މަސައްކަތް މުޅިން ހުއްޓިފައިވާ ކަމަށް ވިދާޅުވެވޭކަށް ނެތް ކަމަށް އެމަނިކުފާނު ވިދާޅުވި އެވެ.
”އެއް ރައީސަކު އަނެއް ރައީސަކާ ގުޅޭގޮތުން ފާޅުކުރާ ހިޔާލެއްގެ ސަބަބުން އަޅުގަނޑުމެންގެ ބައްދަލުވުމަކަށް އެއްވެސް ކަހަލަ ހިޔަންޏެއް ނާންނާނެ. ހުރަހެއް ނާންނާނެ. ދެން ސިޔާސީ ބޭނުންފުޅަށް ސިޔާސީ ބޭފުޅުން ސިޔާސީ ވާހަކަ އެބަ ދައްކަވާ. ދެން އެއަކީ އަޅުގަނޑުމެން ކަންބޮޑުވާ ކަމެއް ނޫން“ ނަޝީދު ވިދާޅުވި އެވެ.
ސިޔާސީ މަސްރަހުގައި އެއް ބޭފުޅަކު އަނެއް ބޭފުޅަކަށް ފާޑުވިދާޅުވުމަކީ އިއްތިހާދުގެ މަސައްކަތަށް ހުރަސް އެޅޭނެ ކަމެއް ނޫން ކަމަށް ނަޝީދު ވިދާޅުވި އެވެ. އެ މަނިކުފާނު ފާހަގަކުރެއްވި ގޮތުގައި، ސިޔާސީ ބޭފުޅުން ސިޔާސީ ބޭނުންފުޅަށް އެކި ވާހަކަތައް ދެއްކެވި ނަމަވެސް، އެއީ އިއްތިހާދުގެ މަސައްކަތްތަކާ މެދު ކަންބޮޑުވާން ޖެހޭ ކަމެއް ނޫނެވެ.
އިއްތިހާދެއްގެ ގޮތުގައި މަސައްކަތް ކުރުމަކީ އޮނިގަނޑެއްގެ ތެރެއިން ކުރަން އުނދަގޫ ކަމެއްކަން ނަޝީދު ފާހަގަކުރެއްވި އެވެ. ނަމަވެސް، ގައުމީ ކަންކަމުގައި އެކުގައި މަސައްކަތް ކުރުމަކީ ވިސްނިދާނެ ކަމެއް ކަމަށާއި، ތިން ފަރުދުންނަށް ވެސް ކަންބޮޑުވުންތަކެއް ހުރި އިރު، އެ ކަންކަމަށް ހައްލު ހޯދުމަށް އެކުގައި މަސައްކަތް ކުރުމުގެ ފުރުސަތު އަދިވެސް އެބައޮތް ކަމަށް ވިދާޅުވިއެވެ.
ކުރީގެ ތިން ރައީސުން ކަމަށްވާ މުހައްމަދު ނަޝީދާއި އަބްދުﷲ ޔާމީން އަބްދުލްގައްޔޫމް އަދި އިބްރާހިމް މުހައްމަދު ސޯލިހު ޤައުމީ މަސްލަހަތަށްޓަކައި ޤައުމާ ރައްޔިތުންނާއި، ނޫސްވެރިންގެ ޙައްޤުގައިކަމަށްބުނެ އެކުވެގެން މަސައްކަތްކުރަން ފެށި ނަމަވެސް، އެ މަސައްކަތްތަކުގެ އެއްވެސް ތަފްސީލެއް އަދި ނަތީޖާއެއް މިއަދާއި ހަމަޔަށް އައިއިރުވެސް އާންމުންނާ ހިއްސާކޮށްފައި ނުވެއެވެ.
’އެކިއެމްވީ‘ އިން މިކަމާ ގުޅިގެން 2 ފަހަރެއްގެ މަތިން ސުވާލުކުރުމުންވެސް މި ތިން ރައީސުން ގުޅިގެން ކުރެވުނު އެއްވެސް މަސައްކަތެއްގެ ތަފްސީލެއް އެބޭފުޅުންގެ މީޑިއާ ޓީމުން ހިއްސާކޮށްފައިނުވެއެވެ.
މީގެއިތުރުން ކުރީގެ ރައީސް ޔާމީން ދާދިފަހުން ވިދާޅުވީ އެބޭފުޅުންނަށް ސަރުކާރާ ދެކޮޅަށް މުޒާހަރާއެއް ނުކުރެވެނީ ރައީސް ޔާމީން ސިޓިންރޫމުގައި އިންނަވާފައި ރައީސް ނަޝީދު މުންޑު އަނދެގެން ގޭގައި އޮންނެވުމުންކަމަށެވެ.
