ބިޒްނަސް ޕޯޓަލް މެދުވެރިކޮށް ހުށަހަޅާފައިވާ އެޕްލިކޭޝަންތަކުގެ ތެރެއިން ފުރިހަމަނުވެ ހުރި 12،500 އެޕްލިކޭޝަން ފުރިހަމަކުރުމަށް އިކޮނޮމިކް މިނިސްޓްރީން 14 ދުވަހުގެ މުއްދަތެއް ދީފިއެވެ.
ދައުލަތުގެ މީޑިއާގެ ”ރާއްޖެ މިއަދު“ ޕްރޮގްރާމްގައި ވާހަކަދައްކަވަމުން، އެ މިނިސްޓްރީގެ ސްޓްރެޓެޖީ އެންޑް ރަޖިސްޓްރީ ސަރވިސް ކޮންސަލްޓަންޓް ބިޒްނަސް ރަޖިސްޓްރޭޝަން ޔޫސުފް ނައީމް ވިދާޅުވީ، ޕޯޓަލްގައި ހުރި ބައެއް ހުށަހެޅުންތަކުގެ މަރުހަލާތައް ފުރިހަމަނުކޮށް އަދި ބައެއް ހުށަހެޅުންތަކަށް ފައިސާ ނުދައްކާ ހުރިކަން ފާހަގަކުރެވިފައިވާ ކަމަށެވެ. މިގޮތަށް ފުރިހަމަނުވެ ހުރި އެޕްލިކޭޝަންތަކުގެ ޖުމްލަ އަދަދު 12،500 އަށް އަރާ ކަމަށް އޭނާ ވިދާޅުވިއެވެ.
”މި އެޕްލިކޭޝަންތައް ފުރިހަމަކުރުމަށް އަޅުގަނޑުމެން މި ދެނީ 14 ދުވަހުގެ މުއްދަތެއް. މިކަން މިދިޔަ ބުރާސްފަތި ދުވަހު ވާނީ ސަރުކާރުގެ ގެޒެޓްގައި އިއުލާންކޮށްފައި. އެހެންކަމުން މި މުއްދަތު ހަމަވާނީ ޖުލައި މަހުގެ 16 ވާ ބުރާސްފަތި ދުވަހުގެ މެންދުރު 14:00 އަށް،“ – ޔޫސުފް ނައީމް ވިދާޅުވިއެވެ.
އޭނާ އިތުރަށް ވިދާޅުވީ ކަނޑައެޅިފައިވާ މުއްދަތުގެ ތެރޭގައި ފުރިހަމަނުކުރާ އެޕްލިކޭޝަންތައް ޕޯޓަލްއިން އުނިކުރެވޭނެ ކަމަށާއި ނަން ރިޒާވްކުރުމަށްފަހު ފުރިހަމަނުކޮށް ހުރުމުގެ ސަބަބުން އެޕްލިކޭޝަން ބާތިލްވެއްޖެނަމަ، އަލުން އެ ނަން ހޯދަން ހުށަހަޅާއިރު އެ ނަން ލިބުމުގެ ފުރުސަތު ކުޑަވެދާނެ ކަމަށެވެ. އެހެންކަމުން، މި ފުރުސަތުގެ ބޭނުންހިފާ، ވީ އެންމެ އަވަހަކަށް އެޕްލިކޭޝަންތައް ފުރިހަމަކުރުމަށް މިނިސްޓްރީން ވަނީ އިލްތިމާސްކޮށްފައެވެ.
ސިސްޓަމަށް ގެނެވުނު ބަދަލުތަކާއެކު ކުރިއަށް އޮތް ތަނުގައި އެޕްލިކޭޝަނެއްގެ އެއްވެސް މަރުހަލާއެއް ފުރިހަމަކުރަން ޖެހިއްޖެނަމަ، އެކަން އީމެއިލް، މޯބައިލް އަދި ޕޯޓަލް ނޮޓިފިކޭޝަން މެދުވެރިކޮށް އަންގާނެ ކަމަށް މިނިސްޓްރީން ވަނީ ބުނެފައެވެ. އަދި އެ ނޮޓިފިކޭޝަން ލިބޭތާ ތިން ދުވަހުގެ ތެރޭގައި އެކަމެއް ފުރިހަމަ ނުކޮށްފިނަމަ، ސިސްޓަމުން އޮޓަމެޓިކުން އެޕްލިކޭޝަން ކެންސަލްވާނެ ކަމަށް މިނިސްޓްރީން މައުލޫމާތުދެއެވެ.
