ވެލާނާ އިންޓަރނޭޝަނަލް އެއަރޕޯޓުގައި މަސައްކަތްކުރާ މުވައްޒަފުންނަށް ދޫކޮށްފައިވާ ސެކިއުރިޓީ ފާސްތައް، ކަނޑައެޅިފައިވާ އުސޫލުތަކާ ހިލާފަށް ބޭނުންކުރާނަމަ ހަރުކަށި ފިޔަވަޅު އަޅާނެކަމުގެ އިންޒާރު މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ދީފިއެވެ.
އެ ކުންފުނީގެ މުވައްޒަފުންނާއި ކަމާގުޅުންހުރި އިދާރާތަކަށް އަމާޒުކޮށް ނެރުނު ސާކިއުލާއެއްގައި ބަޔާންކޮށްފައިވަނީ، އެއަރޕޯޓް ސެކިއުރިޓީ ފާހަކީ ހަމައެކަނި ރަސްމީ މަސައްކަތްތަކަށް ކަނޑައެޅިފައިވާ ވަކި ސަރަހައްދުތަކަކަށް ވަނުމަށް ދޫކުރެވޭ ހުއްދައެއް ކަމަށެވެ. ނަމަވެސް، ބައެއް މުވައްޒަފުން އޮޕަރޭޝަނަލް އެއްވެސް ޒަރޫރަތެއް ނެތި، ފަސިންޖަރުންގެ ފޮށިތައް ނަގާ ސަރަހައްދަށާއި ކަސްޓަމްސް ކޮންޓްރޯލް އޭރިއާތަކަށް ވަދެ، ފަސިންޖަރުންނާ މުއާމަލާތް ކުރަމުންދާކަން ފާހަގަކުރެވިފައިވާ ކަމަށް އެމްއޭސީއެލް އިން ބުނެފައިވެއެވެ.
މިފަދަ އަމަލުތަކުގެ ސަބަބުން ވައިގެ ބަނދަރުގެ ސަލާމަތާއި ރައްކާތެރިކަމަށް ބުރޫއަރައި، ކަސްޓަމްސްގެ އޮޕަރޭޝަންތަކަށް ހުރަސްއެޅޭނެ ކަމަށް އެ ކުންފުނިން ފާހަގަކުރެއެވެ. އެމްއޭސީއެލް އިން ބުނި ގޮތުގައި، ސެކިއުރިޓީ ފާސް ނަހަމަ ގޮތުގައި ބޭނުންކުރުމަކީ އޭވިއޭޝަން ސެކިއުރިޓީއަށް އޮތް ނުރައްކަލެކެވެ.
އެހެންކަމުން، ސެކިއުރިޓީ ފާސް ބޭނުންކުރަންވާނީ ހަމައެކަނި ރަސްމީ ޑިއުޓީގެ މަސްއޫލިއްޔަތު އަދާކުރުމަށް ކަމަށާއި، އަމިއްލަ އެއްވެސް ބޭނުމަކު ފާސް ބޭނުންކުރުމަކީ މަނާކަމެއް ކަމަށް އެ ކުންފުނިން ވަނީ ކަނޑައަޅާފައެވެ. މި އުސޫލުތަކާ ހިލާފުވާ ފަރާތްތަކާ މެދު އިދާރީ ގޮތުން ހަރުކަށި ފިޔަވަޅު އަޅާނެ ކަމަށާއި، އެފަދަ ކަމެއް ކުރާ މުވައްޒަފަކަށް ދޫކޮށްފައިވާ ސެކިއުރިޓީ ފާސް އަތުލުން ނުވަތަ ކެންސަލް ކުރެވޭނެ ކަމަށް އެމްއޭސީއެލްއިން ވަނީ ބުނެފައެވެ.
އެހެންކަމުން، އެއަރޕޯޓުގެ ހުރިހާ ސެކިއުރިޓީ ގަވާއިދުތަކަށް ފުރިހަމައަށް އަމަލުކޮށް، ގަވައިދުތަކަށް ބޯލެނބުމަށް އެ ކުންފުނިން ވަނީ ހުރިހާ މުވައްޒަފުންނަށް އިލްތިމާސްކޮށްފައެވެ.
