މޯލްޑިވްސް އެކުއަޓިކްސްއިން އިންތިޒާމުކޮށްގެން ބާއްވާ ދެވަނަ ވަނަ ކްލަބް ކިޑްސް ސްވިމިން ފެސްޓިވަލް ރަސްމީކޮށް ފަށައިފިއެވެ.
ހުޅުމާލޭ ސްޕޯޓްސް ކޮމްޕްލެކްސްގެ ސުވިމިންގ ޕޫލުގައި ކުރިއަށްދާ މި ފެސްޓިވަލްގައި ޖުމްލަ ފަސް ކްލަބަކުން 362 ކުދިން ބައިވެރިވެއެވެ. އޭގެ ތެރޭގައި ހިމެނެނީ 172 އަންހެން ކުދިންނާއި 190 ފިރިހެން ކުދިންނެވެ.
މި ފެސްޓިވަލާ ގުޅޭގޮތުން މައުލޫމާތު ދެއްވަމުން މޯލްޑިވްސް އެކުއަޓިކްސްގެ ނައިބު ރައީސް އިސްމާޢީލް ޢަލީ ވިދާޅުވީ، މި އަހަރުގެ ފެސްޓިވަލަށް ވަރަށް ބޮޑު ތަރުހީބެއް ލިބެމުންދާ ކަމަށެވެ. މި ހަރަކާތް ކުރިއަށްދަނީ ތިން އުމުރުފުރާއަކަށް ބަހާލައިގެންނެވެ. އެއީ ހަ އަހަރާއި ހަތް އަހަރާ ދެމެދުގެ ”ކިޑްސް އޭ“، އަށް އަހަރާއި ނުވަ އަހަރާ ދެމެދުގެ ”ކިޑްސް ބީ“ އަދި 10 އަހަރާއި 11 އަހަރާ ދެމެދުގެ ކުދިން ހިމެނޭ ”ކިޑްސް ސީ“ ކެޓެގަރީއެވެ.
އިސްމާއިލް ވިދާޅުވި ގޮތުގައި، މުބާރާތުގެ ކަންކަން ވަރަށް ފޯރިއާއެކު ކުރިއަށްދާއިރު، މި ތިން ގްރޫޕުގެ ކުދިންގެ މެދުގައި އޮތް ވާދަވެރިކަން ވެސް ބޮޑެވެ.
މި މަހުގެ ހަ ވަނަ ދުވަހުގެ ނިޔަލަށް ހުޅުމާލޭ ސްވިމިންގ ޕޫލުގައި ކުރިއަށްދާ މި ފެސްޓިވަލަކީ ކުޑަކުދިންގެ މެދުގައި ފެތުމުގެ ހުނަރު ކުރިއަރުވައި، ކްލަބް ފެންވަރުގައި ވާދަވެރި މާހައުލެއް އުފެއްދުމަށް ބާއްވާ މުހިންމު ހަރަކާތެކެވެ.
