ހުޅުމާލޭގައި ދެ މިސްކިތް ބިނާކުރުމަށް ބޭނުންވާ ބިން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިސްލާމިކް މިނިސްޓްރީ އާ ހަވާލުކޮށްފިއެވެ.
އެޗްޑީސީން މިއަދު ބުނީ އިސްލާމިކް މިނިސްޓްރީ އާ ހަވާލުކޮށްފައި ވަނީ ހުޅުމާލެ ތިންވަނަ ފިޔަވަހީގައި ބިނާކުރާ ފުރަތަމަ މިސްކިތަށް ބޭނުންވާ ބިމާއި ދެވަނަ ފިޔަވަހީގައި އިމާރާތްކުރާ މިސްކިތަކަށް ބޭނުންވާ ބިން ކަމަށެވެ.
މިސްކިތް ބިނާކުރުމަށް ބިން ހަވާލުކުރުމުގެ އެއްބަސްވުމުގައި އެޗްޑީސީގެ ފަރާތުން ސޮއިކުރެއްވީ އެ ކޯޕަރޭޝަނުގެ މެނޭޖިންގ ޑިރެކްޓަރު އިބްރާހިމް ފަޒުލް ރަޝީދެވެ. އިސްލާމިކް މިނިސްޓްރީގެ ފަރާތުން ސޮއި ކުރައްވާފައި ވަނީ މިނިސްޓަރ ޑރ. މުޙައްމަދު ޝަހީމް ޢަލީ ސަޢީދެވެ.
މިސްކިތް ބިނާކުރަން ތިންވަނަ ފިޔަވަހިން ދޫކޮށްފައި ވަނީ 21،952 އަކަފޫޓުގެ ބިމެކެވެ. އަދި ދެވަނަ ފިޔަވަހިން ދޫކުރީ 27،920 އަކަފޫޓުގެ ބިމެކެވެ.
ހުޅުމާލޭގައި 2 މިސްކިތެއް ތަރައްގީކުރުމަށް އެޗްޑީސީން މިއަދު ވަނީ އިސްލާމިކް މިނިސްޓްރީއާއި ބިން ހަވާލުކޮށް އެއްބަސްވުމެއްގައި ސޮއިކޮށްފައެވެ.
މި ރަސްމިއްޔާތުގައި އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދު ވަނީ ބައިވެރިވެ ވަޑައިގެންފައެވެ.… pic.twitter.com/wKKgHDQ5vs
— Housing Development Corporation (@hdcmaldives) April 15, 2024
ހުޅުމާލޭގައި ދިރިއުޅޭ އާބާދީއަށް ބޭނުންވާ ހިދުމަތްތަކާއި ވަސީލަތްތައް ފުރިހަމަކޮށްދިނުމަށް އެ ކޯޕަރޭޝަނުން އަބަދުވެސް މަސައްކަތް ކުރަމުން އަންނަ ކަމަށް އެޗްޑީސީން ބުނެއެވެ.
މިފަހުން އިސްލާމިކް މިނިސްޓްރީން ވަނީ ހިޔާ ސަރަހައްދުގައި މިސްކިތެއް އިމާރާތް ކުރުމަށް އަމިއްލަ ފަރާތަކާ ހަވާލުކޮށްފައެވެ. ނިމިދިޔަ ރަމަޟާން މަހު ހުޅުމާލެ ދެވަނަ ފިޔަވަހީގައި ދާއިމީ މިސްކިތެއް ހުޅުވާފައިވެއެވެ.
