އެރޯހެޑް ސްޓޭޑިއަމްގައި ކުޅުނު ވޯލްޑް ކަޕްގެ ގަދަ 32 ގެ ފޯރިގަދަ މެޗުގައި 1-0 އިން ގާނާ ބަލިކޮށް، ކޮލަމްބިއާ މުބާރާތުގެ ގަދަ 16 އަށް ދަތުރުކޮށްފިއެވެ. މިއީ 2014 ވަނަ އަހަރުގެ ފަހުން ވޯލްޑް ކަޕެއްގެ ނޮކްއައުޓް ބުރުން ކޮލަމްބިއާ ހޯދި ފުރަތަމަ މޮޅެވެ.
މެޗުގެ ވަރަށް ކުރީކޮޅު ކޮލަމްބިއާގެ ފޯވާޑް ޖޯން ކޯޑޯބާގެ ފަލަމަސްގަނޑަށް ލިބުނު އަނިޔާއަކާ ގުޅިގެން، ކޯޗު ނެސްޓޯ ލޮރެންޒޯއަށް ވަނީ ބަދަލެއް ގެންނަން މަޖުބޫރުވެފައެވެ. ކޯޑޯބާގެ ބަދަލުގައި ކުޅެން އެރި ލުއިސް ސުއަރޭޒް ވަނީ ކުޅެން އެރިތާ ކުޑަވަގުތުކޮޅެއްގެ ތެރޭގައި މެޗުގެ ނަތީޖާ ބަދަލުކޮށްލާފައެވެ. މެޗުގެ 14 ވަނަ މިނެޓުގައި ޑެނިއަލް މުނޯޒް ދިން ބޯޅައެއް، ސުއަރޭޒް ގޯލު ކުރިމައްޗަށް ހުރަސްކޮށްލުމުން ޖޯން އަރިއަސް ވަނީ އެ ބޯޅަ ގޯލުގެ ތެރެއަށް ފޮނުވާލައި ކޮލަމްބިއާއަށް ލީޑު ނަގައިދީފައެވެ.
މި މެޗުގައި ކޮލަމްބިއާގެ ތަޖުރިބާކާރު ކުޅުންތެރިޔާ ހަމޭސް ރޮޑްރިގޭޒް ވަނީ ވޯލްޑް ކަޕްގައި އޭނާގެ 10 ވަނަ މެޗު ފަށައި، ކާލޯސް ވަލްޑެރާމާ އާއި ފްރެޑީ ރިންކޮންގެ ރެކޯޑާ އަރާ ހަމަކޮށްފައެވެ. ނަމަވެސް، އުމުރުން 34 އަހަރުގެ ހަމޭސް ވަނީ ހާފް ޓައިމްގައި ބަދަލުކޮށްފައެވެ.
މެޗު ކުޅުނު ވަގުތަކީ އެ ސަރަހައްދަށް ވަރަށް ހޫނުގަދަ ވަގުތަކަށް ވުމުން، ދެ ޓީމުގެ ކުޅުންތެރިންނަށް ވެސް ވަނީ އޭގެ އަސަރުކޮށްފައެވެ. މެޗު ފެށިއިރު ހޫނުމިން ހުރީ 31.1 ޑިގްރީ ސެލްސިއަސްގައެވެ. ހޫނުގަދަވުމުގެ ސަބަބުން ކުޅުންތެރިންނަށް ފެން ބުއިމަށް ދިން ބްރޭކްތައް ވެގެންދިޔައީ ކުޅުންތެރިންނަށް ލިބުނު ބޮޑު ހިތްހަމަޖެހުމަކަށެވެ.
މުޅި މެޗުގައި ވެސް ގާނާއަށް ކޮލަމްބިއާގެ ގޯލާ އަމާޒުކޮށް އެންމެ ހަމަލާއެއްވެސް ފޮނުވާލެވިފައެއް ނުވެއެވެ. މިއީ މި މުބާރާތުގައި ވިދިވިދިގެން ކޮލަމްބިއާގެ ގޯލަށް ލަނޑެއް ނުވަދެ ނިންމާލި ތިންވަނަ މެޗެވެ.
މި މޮޅާއެކު ކޮލަމްބިއާ ދެން ނުކުންނާނީ އަންގާރަ ދުވަހު ކެނެޑާގެ ވެންކޫވަރުގައި ސްވިޒަލޭންޑާ ދެކޮޅަށެވެ. އެ މެޗުން މޮޅުވާ ޓީމަކަށް މުބާރާތުގެ ކުއާޓާ ފައިނަލުން ފުރުސަތު ލިބޭނެއެވެ.
