ދުނިޔޭގެ ތަށީގެ ފުޓްބޯޅަ މުބާރާތުގެ ތެރެއިން އެމެރިކާގެ ޑަލަސްގައި ހިނގި ހާދިސާއެއްގައި، މިޞްރުގެ ޤައުމީ ޓީމުގެ ޑައިރެކްޓަރު އިބްރާހިމް ޙަސަނާއި ކުޅުންތެރިޔާ ޓްރެޒެގޭއަށް އެ ސިޓީގެ ފުލުހަކު ކޮއްޕައި ހަމަލާދީފައިވާ ކަމަށް އެ ޓީމުން ބުނެފިއެވެ.
މި ހާދިސާ ހިނގާފައިވަނީ ހުކުރު ދުވަހު މިޞްރުން އޮސްޓްރޭލިއާއާ ދެކޮޅަށް ކުޅުނު މެޗުގެ ކުރިން ޓީމު މަޑުކޮށްގެން ތިބި ހޮޓަލުގައެވެ. މިޞްރުގެ މީޑިއާ އޮފިސަރު މުޙައްމަދު މުރާދު ރޮއިޓާސްއަށް މަޢުލޫމާތު ދެމުން ބުނީ، ސަޕޯޓަރަކާއި އޭނާގެ ދަރިފުޅު، އިބްރާހިމް ޙަސަނާއި ޓްރެޒެގޭއާއެކު ފޮޓޯއެއް ނަގަން އެދުމުން އެކަމަށް ޑައިރެކްޓަރު ހުއްދަ ދިން ކަމަށެވެ.
ނަމަވެސް އެ ވަގުތު އެތަނުގައި ހުރި ސެކިއުރިޓީ އޮފިސަރަކު ވަނީ އެ ސަޕޯޓަރާއި، ޓްރެޒެގޭ އަދި އިބްރާހިމް ޙަސަން ކޮއްޕާލާފައެވެ. މުރާދު ފާހަގަކުރި ގޮތުގައި މި ހާދިސާ ހިނގިއިރު ކުޅުންތެރިޔާއާއި ޑައިރެކްޓަރު ތިބީ އެމީހުންނަށް ޚާއްޞަކޮށްފައިވާ ސަރަޙައްދުގައެވެ. އަދި ސަޕޯޓަރާ މެދު އިހާނެތިކޮށް އަމަލު ނުކުރުމަށާއި، އާދައިގެ ގޮތަކަށް މުޢާމަލާތް ކުރުމަށް އިބްރާހިމް ޙަސަން އެ ވަގުތު އެދިފައިވާ ކަމަށްވެސް އޭނާ ބުންޏެވެ.
US Police sparked a confrontation with Egypt's national team as they posed with fans at their hotel in Dallas. The incident happened ahead of Egypt's Round of 16 match against Australia.
Footage shows Egypt national team director Ibrahim Hassan being forcefully pushed by a… pic.twitter.com/PKri2NaMxm
— AJE Sport (@AJE_Sport) July 3, 2026
މި ހާދިސާއާ ގުޅިގެން ޑަލަސް ޕޮލިސް ޑިޕާޓްމަންޓުން (ޑީޕީޑީ) ނެރުނު ބަޔާނެއްގައި ބުނީ، ސޯޝަލް މީޑިއާގައި ދައުރުވަމުންދާ ވީޑިއޯގެ މައްސަލަ އެ ފަރާތަށް އެނގޭ ކަމަށެވެ. ފުލުހުން ބުނި ގޮތުގައި އެމީހުން ހޮޓަލަށް ދިޔައީ ހުއްދަ ނެތް މީހަކު ވަންނަން އުޅޭ ކަމަށް ހޮޓަލުގެ ސެކިއުރިޓީން ރިޕޯޓް ކުރުމުންނެވެ. އަދި ފަހުން އެނގުނު ގޮތުގައި އެމީހުން ތިބީ ދައްކަންޖެހޭ ކާޑުތައް (credentials) ރަނގަޅަށް ނުފެންނަ ގޮތަށް ކަމަށާއި، އެއީ އެ ސަރަޙައްދުގައި އުޅޭއިރު ކޮންމެހެން ބޭނުންވާ އެއްޗެއް ކަމަށްވެސް ފުލުހުން ބުންޏެވެ.
We are aware of the video circulating on social media regarding an officer and interaction with members from a soccer team.
The Dallas Police Department responded to an area hotel at the request of hotel security regarding an individual without event credentials attempting to…
— Dallas Police Dept (@DallasPD) July 3, 2026
ޑަލަސް ފުލުހުން އިތުރަށް ބުނީ، މި މައްސަލަ އެވަގުތު ހައްލުކުރެވިފައިވާ ކަމަށާއި، ޓީމުގެ މަންދޫބުންނާ ބައްދަލުކޮށް އެފަރާތްތަކުގެ ކަންބޮޑުވުންތައް އަޑުއަހާފައިވާ ކަމަށެވެ.
މި މުބާރާތަކީ އެމެރިކާ، ކެނެޑާ އަދި މެކްސިކޯ ގުޅިގެން ބާއްވާ 2026 ވަނަ އަހަރުގެ ވޯލްޑް ކަޕެވެ. ހުކުރު ދުވަހު ޑަލަސްގައި ކުޅުނު މި މެޗަކީ މުބާރާތުގެ ގަދަ 32 ޓީމުގެ ބުރުގެ މެޗެކެވެ.
