2026 ވަނަ އަހަރުގެ ފީފާ ވޯލްޑް ކަޕްގެ ގަދަ 16 އިން މިސްރު ފުރުސަތު ހޯދައިފިއެވެ. މިސްރުން މި ތާރީޚީ ކާމިޔާބީ ހޯދީ، އެމެރިކާގެ ޓެކްސަަސްގައި ކުޅުނު ފޯރިގަދަ މެޗުގައި އޮސްޓްރޭލިއާގެ މައްޗަށް ޕެނަލްޓީ ޖަހައިގެން 4-2 އިން ކުރިހޯދައިގެންނެވެ.
މެޗުގެ ފުރިހަމަ ވަގުތާއި އިތުރު ވަގުތު ހަމަވިއިރު ދެ ޓީމު ވަނީ 1-1 އިން އެއްވަރުވެފައެވެ. މިސްރުގެ މޮޅުވި ޕެނަލްޓީ ކާމިޔާބުކޮށްދިނީ ހުސާމް އަބްދުލްމަޖީދުއެވެ. މިއީ ވޯލްޑް ކަޕެއްގެ މި މަރުހަލާއަށް މިސްރު ދަތުރުކުރި ފުރަތަމަ ފަހަރެވެ.
މެޗުގެ 13 ވަނަ މިނެޓުގައި އިމާމް އަޝޫރު ޖެހި ލަނޑުން މިސްރުން ކުރިހޯދިއެވެ. ނަމަވެސް، ދެވަނަ ހާފުގެ ކުރީކޮޅު މިސްރުގެ މުހައްމަދު ހާނީ އަތުން ބައިކޮޅަށް ވަން ލަނޑަކުން އޮސްޓްރޭލިއާއަށް ނަތީޖާ ހަމަހަމަވިއެވެ. މިސްރުގެ ތަރި މުހައްމަދު ސަލާހަށް މި މެޗުގައި މާ އެދެވޭ ކުޅުމެއް ނުދެއްކުނު ނަމަވެސް، ޕެނަލްޓީ ޝޫޓްއައުޓްގައި އޭނާ ވަނީ ކާމިޔާބު ޕެނަލްޓީއެއް ޖަހާފައެވެ.
އޮސްޓްރޭލިއާގެ ކޯޗު ޓޯނީ ޕޮޕޮވިޗް، ޕެނަލްޓީއަށް އަމާޒުކޮށް ތަޖުރިބާކާރު ކީޕަރު މެތިއު ރަޔަން ކުޅެން އެރުވި ނަމަވެސް، އޮސްޓްރޭލިއާގެ ހެރީ ސޫޓާ އާއި ލޫކަސް ހެރިންގްޓަން އަށް ޕެނަލްޓީ ކާމިޔާބު ކުރެވޭގޮތެއް ނުވިއެވެ. މެޗުން މޮޅުވުމާއެކު ސަލާހުގެ ލޮލުން އުފާވެރިކަމުގެ ކަރުނަ ފާޅުވެފައިވެއެވެ.
ގަދަ 16 ގެ މަރުހަލާގައި މިސްރު ދެން ބައްދަލުކުރަން ޖެހޭނީ އާޖެންޓީނާ އާއި ކޭޕް ވާޑޭ ކުޅެގެން މޮޅުވާ ޓީމަކާއެވެ. ގިނަ ބަޔަކު އުންމީދު ކުރަނީ އަންގާރަ ދުވަހު އެޓްލާންޓާގައި ކުޅޭ މި މެޗުގައި ސަލާހާއި މެސީގެ ކުރިމަތިލުމެއް ފެންނާނެ ކަމަށެވެ.
