ކޮރަޕްޝަނަކީ އިޖުތިމާޢީ ޢަދުލުވެރިކަން ނެތިވެ، ފަޤީރުކަން އިތުރުވެ، އިޤުތިޞާދުގެ ތަނބުތައް ފުނޑުފުނޑުވާކަމެއް ކަމަށް މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
”ކޮރަޕްޝަނާއި ރިޝްވަތުގެ ނުރައްކާތެރިކަން“ މި މައުޟޫޢަށް ރާއްޖޭގެ އެކިކަންކޮޅުތަކުގައި މިއަދު އިއްވި ހުކުރު ޚުޠުބާގައި ވިދާޅުވީ، ކޮރަޕްޝަނަކީ މަޤާމުގެ ނުފޫޒު ނުވަތަ ލިބިފައިވާ އިޚުތިޔާރެއް ނަހަމަ ގޮތުގައި ބޭނުންކޮށްގެން، އަމިއްލަ ފައިދާއެއް ހޯދުމަށް ނުވަތަ ހޯދައިދިނުމަށް ކުރެވޭ ކޮންމެ ކަމެއް ކަމަށެވެ. އަދި ތިމާއާ ޙަވާލުވެވިފައިވާ މަސްއޫލިއްޔަތާއި ޒިންމާއަކީ، އެއާ މެދު ސުވާލުވެވޭނޭ އަމާނާތެއް ކަމަށާއި، ތިމާގެ ނުފޫޒު އަމިއްލަ އެދުމަކަށްޓަކައި ބޭނުންކުރުމަކީ ޚިޔާނަތްތެރި ޢަމަލެއްކަން ޚުޠުބާގައި ފާހަގަކުރެއްވިއެވެ.
ޚުޠުބާގައި އިތުރަށް ވިދާޅުވީ، އިންސާނާގެ ފިޠުރަތުގައި އަމާންކަމާއި، ސަލާމަތްތެރިކަމާއި، މިނިވަންކަމާއި، ޢަދުލުވެރިކަމަށް ލޯބިކުރުން ލައްވާފައިވާ ކަމަށެވެ. ނަމަވެސް ކޮރަޕްޝަނަކީ އިންސާނާގެ ފިޠުރަތު އެކަމަށް ނުރުހޭ، އިޖުތިމާޢީ ނިޒާމު ފުނޑުފުނޑުކޮށްލާ ބަލިމަޑުކަމެއް ކަމަށް ވިދާޅުވިއެވެ. މިއީ ބިން ފަސާދަކުރާ، ސަލާމަތްބުއްދިއާ ފުށުއަރާ، އަދި ނަފުސުގެ ޢިއްޒަތް ފޭރިގަންނަ ދަށު ދަރަޖައިގެ ޢަމަލުތަކެއް ކަމަށާއި، މިއީ އިލާހީ ކޯފާއަށް ހުށަހެޅޭ ބޮޑުވެގެންވާ ފާފައެއްކަން ވެސް ހަނދާންކޮށްދެއްވިއެވެ.
މުޖުތަމަޢުގައި ފެތުރިފައިވާ ކޮރަޕްޝަނުގެ އެންމެ ނުރައްކާތެރި ބާވަތަކީ ރިޝްވަތުކަން ފާހަގަކުރައްވައި ޚުޠުބާގައި ވިދާޅުވީ، ރިޝްވަތަކީ ޙައްޤުނޫން އެއްޗެއް ހޯދުމަށް ނުވަތަ ބާޠިލުކަމެއް ޙައްޤުކަމަކަށް ހެދުމަށް ދެވޭ ކޮންމެ އެއްޗެއް ކަމަށެވެ. ރިޝްވަތު ދިނުމާއި ހިފުމަކީ ލަޢުނަތް ލެއްވިގެންވާ ކަމެއް ކަމުގައިވެސް ވިދާޅުވިއެވެ.
ބައެއް މީހުންނަށް ކޮރަޕްޝަނަކީ ކަން އޮންނަންވީ މަގު ކަމުގައި ހީވެފައި އޮތް ނަމަވެސް، އެއީ ނުހަނު ނުރައްކާތެރި ކަމެއް ކަމަށާއި، ކިތަންމެ ކުޑަ ޒިންމާއެއް ޙަވާލުވެފައިވީ ނަމަވެސް ނަހަމަ މަންފާއާ ދުރުހެލިވެ، ޒިންމާދާރުކަމާއެކު ޙައްޤުތައް އަދާކުރުމަށް ޚުޠުބާގައި ވަނީ ގޮވާލައްވާފައެވެ.
”ނަހަމަ ގޮތުގައި ލިބިގަންނަ މަންފާއެއްގެ މައްޗަށް ދިރިއުޅުން ބިނާކުރާ މީހާއަށް ހުރި ހަލާކެއްގެ ބޮޑުކަމާއެވެ! މާތް ﷲގެ ކޯފާއާއި އެކަލާނގެ ރަސޫލާގެ ލަޢުނަތް އެ މީހެއްގެ މައްޗަށް ހުއްޓެވެ! އެފަދަ މީހަކީ އީމާންކަމުގެ ނޫރު ކަނިވެ، ޙަޔާތް އަބާއްޖަވެރިވެ، ނަރަކައިގެ އަލިފާނަށް ހުށަހެޅޭނޭ މީހެއް،“ ޚުޠުބާގައި ވިދާޅުވިއެވެ.
މިއަދުގެ ޚުޠުބާ ނިންމާލައްވަމުން ވަނީ، ކޮރަޕްޝަނާއި ރިޝްވަތަށް މަގުފަހިވާ މައިގަނޑު ސަބަބަކީ ނަފުސުގެ ދަހިވެތިކަން ކަމަށްވާތީ، އެފަދަ ނުބައި އަނދަވަޅަކަށް ވެއްޓުމުން ސަލާމަތްވުމަށްޓަކައި ކީރިތި ރަސޫލާ ﷺ ގެ ބަސްފުޅުތަކުން ޢިބުރަތް ލިބިގަތުމަށް ހުރިހާ ފަރާތްތަކަށް އިލްތިމާސްކުރައްވާފައެވެ.
