އިންޑިއާގެ ގުޖުރާތުގެ ކަޗު ސަރަޙައްދުގެ ގާންދީދާމް ތާލޫކާގައި ހުރި ތާރީޚީ ޖޫނާ ކަންޑްލާ މިސްކިތް، އާދީއްތަ ދުވަހުގެ ރޭ ބީޖޭޕީ ސަރުކާރުން އެއްވެސް ނޯޓިހަކާ ނުލައި ބިމާ ހަމަކޮށްލައިފިއެވެ. މިއީ މުސްލިމުންގެ މިލްކުވެރިކަމުގައި ހުރި 30 އަށްވުރެ ގިނަ ގެދޮރާއި ވިޔަފާރިތައް ފާއިތުވި ދުވަސްތަކުގައި ތަޅާލައި، މުސްލިމުންގެ ނިޝާންތައް އިންޑިއާގެ ބިމުން ފޮހެލުމަށް ހިންގާ ނިޒާމީ ޖަރީމާގެ އެންމެ ފަހުގެ ހަރަކާތެވެ.
ޤާނޫނުތަކާއި ޙައްޤުތަކަށް އަރައިގަތުން
– ތާރީޚީ ހެކި: މި މިސްކިތަކީ 1965 ވަނަ އަހަރުން ފެށިގެން ގުޖުރާތު ސްޓޭޓް ވަޤްފު ބޯޑުގައި ރަޖިސްޓްރީކޮށްފައިވާ، ޤާނޫނީ ހައިސިއްޔަތު އޮތް ތަނެކެވެ. ނަމަވެސް ބީޖޭޕީގެ ސަރުކާރުން އެއްވެސް ޤާނޫނީ ހަމައަކަށް ނުބަލައި، ރޭގަނޑުގެ ވަގުތެއްގައި މި ތަންތަން ތަޅާލަނީއެވެ.
– ޣައްޒާ މޮޑެލް: ބީޖޭޕީގެ ލީޑަރުން ދަނީ އިޒްރޭލުން ޣައްޒާގައި ހިންގާ ފަދަ ނިޒާމީ ބިން ފޭރުމާއި، އިމާރާތްތައް ބިމާ ހާމަކުރުމުގެ އޮޕަރޭޝަންތައް (ޣައްޒާ މެޕިންގ) އިންޑިއާގައިވެސް ތަންފީޒުކުރުމަށް ފާޅުގައި ގޮވާލަމުންނެވެ. މިއީ މުސްލިމުންގެ ގެދޮރާއި ވިޔަފާރިތައް ފޮހެލައި، އެމީހުންގެ ޤައުމީ އަދި ދީނީ ފައިތިލަ ބިންހަމަކުރުމަށް ކުރާ ރޭވުންތެރި މަސައްކަތެކެވެ.
މުޅި އިންޑިއާގައި ހިންގާ ”ބުލްޑޯޒަރ ޖަސްޓިސް“
ގުޖުރާތުގައި ހިންގި މި ޖަރީމާއަކީ މުޅި އިންޑިއާގައި މިހާރު ހިންގަމުންދާ ބޮޑު ނިޒާމީ ޕްލޭނެއްގެ ބައެކެވެ. އެމްނެސްޓީ އިންޓަނޭޝަނަލް ފަދަ އިންސާނީ ޙައްޤުތަކަށް މަސައްކަތްކުރާ ޖަމާޢަތްތަކުގެ ތަފާސްހިސާބުތަކުން ދައްކާގޮތުގައި 2019 އިން 2023 އަށް އިންޑިއާގައި ގެދޮރު ތަޅާލުމުގެ މިންވަރު ވަނީ %379 އަށް އިތުރުވެފައެވެ.
– މުސްލިމުންނަށް އަމާޒުކުރުން: ފާއިތުވި އަހަރުތަކުގައި ތަޅާލާފައިވާ އިމާރާތްތަކުގެ ގާތްގަނޑަކަށް %90 އަކީ މުސްލިމުންނާއި ނިކަމެތިންގެ ގެދޮރާއި މުދަލެވެ.
– ސްޓޭޓްތަކުގެ ޖަރީމާތައް: 2023 ވަނަ އަހަރު ހަރިޔާނާގެ ނޫހް ޑިސްޓްރިކްޓްގައި ހިނގި ހަމަނުޖެހުންތަކަށްފަހު، އެންމެ 5 ދުވަހުގެ ތެރޭގައި 1,200 އަށްވުރެ ގިނަ މުސްލިމުންގެ ގެދޮރާއި ފިހާރަ ތަޅާލިއެވެ. ޖޫން 2024 ގައި އުއްތަރު ޕްރަދޭޝްގައި 1,800 އަށްވުރެ ގިނަ އިމާރާތް ތަޅާލިއިރު، އޮގަސްޓް 2025 ގައި ގުޖުރާތުގެ އަހުމަދާބާދުން ވަނީ ބިދޭސީން ބޭރުކުރުމުގެ ނަމުގައި 12,500 އަށްވުރެ ގިނަ ގެދޮރު ބިމާ ހަމަކޮށްފައެވެ.
މި ތަފާސްހިސާބުތަކުން ސާފުވަނީ، ބުލްޑޯޒަރު ބޭނުންކޮށްގެން މުސްލިމުންގެ ގެދޮރު ތަޅާލުމަކީ ވަކި ހާދިސާއެއް ނޫން ކަމާއި، އެއީ ބީޖޭޕީ ސަރުކާރުން މުޅި އިންޑިއާގެ ޑެމޮގްރަފީ ބަދަލުކުރުމަށް ހަތިޔާރެއްގެ ގޮތުގައި ބޭނުންކުރާ ނިޒާމީ ޖަރީމާއެއް ކަމެވެ.
