ފީފާ ވޯލްޑްކަޕްގެ ގަދަ 16 ޓީމުގެ ތެރޭގައި މުބާރާތް ބާއްވާ އެއް ގައުމު ކަމަށްވާ އެމެރިކާ ހިމެނިއްޖެއެވެ. އެމެރިކާ މި ބުރަށް ދަތުރުކުރީ ރޭ ކުޅުނު މެޗުގައި ބޮސްނިޔާއާ ވާދަކޮށް 2-0 ގެ ނަތީޖާއަކުން މެޗު ކާމިޔާބުކޮށްގެންނެވެ.
މި މެޗުގެ ބޮޑު ބައެއް އެމެރިކާއިން ކުޅެން ޖެހުނީ އެއް ކުޅުންތެރިޔަކު މަދުކޮށެވެ. މެޗުގެ ދެވަނަ ހާފު ފަށައިގެން 19 ވަނަ މިނިޓްގައި އެމެރިކާގެ ބަލޮގަން، ބޮސްނިޔާގެ މުހަރެމޮވިޗަށް ކުރި ނުރައްކާތެރި ފައުލަކާ ގުޅިގެން ރެފްރީ ވަނީ އޭނާއަށް ސީދާ ރަތްކާޑެއް ދައްކާފައެވެ. މި ކާޑު ދައްކާފައިވަނީ ވީއޭއާރުން ބެލުމަށްފަހުގައެވެ.
ބަލޮގަން އަށް ރަތްކާޑު ދެއްކިއިރު، އެމެރިކާ އޮތީ ފުރަތަމަ ހާފުގެ ފަހު މިނިޓްގައި އޭނާ ޖެހި ލަނޑުން ލީޑުގައެވެ. މިއީ ޓިލްމަން ތަނަވަސްކޮށްދިން ފުރުސަތެއްގައި ބަލޮގަން ކާމިޔާބުކުރި ލަނޑެކެވެ. މީގެ އިތުރުންވެސް ފުރަތަމަ ހާފުގައި ބަލޮގަން ލަނޑެއް ޖަހައި އުފާފާޅުކުރި ނަމަވެސް، ލައިސްމަން ދިދަ ނަގާފައި ހުރުމުން ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.
އެއް ކުޅުންތެރިޔަކު މަދުކޮށް އެމެރިކާއިން ކުޅެމުން ދަނިކޮށް، އެ ޓީމުގެ ދެވަނަ ލަނޑު ޖަހައި ލީޑު ފުޅާކޮށްދިނީ ޓިލްމަންއެވެ. އޭރިޔާ ބޭރުން ލިބުނު ހިލޭ ޖެހުމަކުން އޭނާ ފޮނުވާލި ބޯޅަ ގޯލަށް ވަނީ ކީޕަރުގެ އަތުގައި ޖެހިފައެވެ. ދެވަނަ ހާފުގައި އެމެރިކާގެ ޕުލިސިޗް ވެސް ލަނޑެއް ޖެހި ނަމަވެސް، އެއީ ވެސް އޮފްސައިޑް ބޯޅައެއް ކަމަށް ރެފްރީ ވަނީ ނިންމާފައެވެ.
މި މެޗުން ބަލިވުމާއެކު ބޮސްނިޔާ ވަނީ މުބާރާތުން ކަޓާފައެވެ. އެމީހުންގެ ދެވަނަ ވޯލްޑްކަޕް ނިންމާލަން ޖެހުނީ ގަދަ 32 ޓީމުގެ ތެރޭގައި ހިމެނިގެންނެވެ. މެޗުގެ ބޮޑު ބައި ކުޅުންތެރިއަކު އިތުރަށް ކުޅުނު ނަމަވެސް، އެމެރިކާގެ ވަރުގަދަ ޑިފެންސް ފޫއަޅުވާލައި ލަނޑެއް ޖެހޭނެ ފުރުސަތެއް ބޮސްނިޔާއަކަށް ނުލިބުނެވެ.
މައުރީސިއޯ ޕޮޗެޓީނޯގެ އިރުޝާދުގެ ދަށުން ކުޅެމުންދާ އެމެރިކާ، ގަދަ 16 ގެ ބުރުގައި ބައްދަލުކުރަން ޖެހޭނީ ބެލްޖިއަމްއާއެވެ.
