ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ދާއިރާތަކުގެ އިންތިހާބުގެ އިންތިޒާމުތައް ހަމަޖެއްސުމުގެ މަސައްކަތްތައް ކުރިއަށްދާ ގޮތް ޕާޓީގެ ލީޑަރޝިޕުގެ އިސް ބޭފުޅުން ބައްލަވާލައްވައިފިއެވެ.
އެގޮތުން ޕާޓީގެ ޗެއަރޕާސަން އަދި ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ އާއި ޕާޓީގެ ޕާލިމަންޓްރީ ގުރޫޕުގެ ލީޑަރު، އިނގުރައިދޫ ދާއިރާގެ މެންބަރު އިބްރާހީމް ފަލާޙު ވަނީ އެޕާޓީގެ އޮފީހަށް ޒިޔާރަތްކުރައްވައި، ދާއިރާތަކުގެ ރައީސުންނާ ބައްދަލުކުރައްވާފައެވެ. މި ބައްދަލުކުރެއްވުމުގައި އިންތިހާބާ ގުޅޭ އެންމެފަހުގެ ތައްޔާރީތަކާ ބެހޭގޮތުން މަޝްވަރާކުރައްވާފައިވެއެވެ.
މީގެ އިތުރުން، ޕާޓީގެ ލީޑަރޝިޕުން ވަނީ އިންތިހާބީ ކޮމިޓީގެ މެންބަރުންނާއި، އިންތިހާބުގެ އިދާރީ މަސައްކަތްތަކުގައި އަމަލީގޮތުން ހަރަކާތްތެރިވާ އޮފިޝަލުންނާ ވެސް ބައްދަލުކުރައްވާފައެވެ. މި ބައްދަލުވުންތަކުގެ މައިގަނޑު ބޭނުމަކީ އިންތިހާބުގެ ކަންކަން އިންސާފުވެރިކަމާއި އޮމާންކަމާއެކު ކުރިއަށް ގެންދިއުމަށްޓަކައި ވާންޖެހޭ ތައްޔާރީތައް ކަށަވަރުކުރުމެވެ.
މި މަހުގެ 11 ވަނަ ދުވަހު ބޭއްވުމަށް ހަމަޖެހިފައިވާ މި އިންތިބަހާށް ކުރިމަތިލުމުގެ ފުރުސަތު އިއްޔެގެ ނިޔަލަށް ވަނީ ހަމަވެފައެވެ. ޕާޓީން މައުލޫމާތު ދޭ ގޮތުގައި، ދާއިރާތަކުގެ ރައީސުން އިންތިހާބު ކުރުމަށް ހަމަޖެހިފައިވަނީ ހަމައެކަނި ޕީއެންސީ ތަމްސީލުކުރާ ރައްޔިތުންގެ މަޖިލީހުގެ މެންބަރަކު ނެތް ދާއިރާތަކުގައެވެ. ރައްޔިތުންގެ މަޖިލީހުގެ މެންބަރުން ތިއްބެވި ދާއިރާތަކުގެ ރައީސުންނަކީ އޮޓޮމެޓިކުން އެ ދާއިރާއެއް ތަމްސީލުކުރައްވާ މަޖިލީސް މެންބަރެވެ.
މި އިންތިހާބަށްފަހު، ޕީއެންސީގެ ދާއިރާތައް ވަރުގަދަކޮށް، ޕާޓީގެ ހިންގުން މިހާރަށްވުރެ ބޮޑަށް ހަރުދަނާވެގެންދާނެ ކަމަށް އެ ޕާޓީން ބުނެއެވެ.
