މާލެއިން ދ. ވާނީއަށް ދަތުރުކުރަމުންދިޔަ ފުލުހުންގެ ލޯންޗަކަށް، ކަނޑުމަތިން އޮޔާދިޔަ ޗައިނާ ފަތުރުވެރިއަކު ފެނިގެން ސަލާމަތްކޮށްފިއެވެ.
މި ހާދިސާ ހިނގާފައިވަނީ މިއަދު މެންދުރުފަހު 14:26 އެހާކަންހާއިރުއެވެ. ފުލުހުން ހާމަކުރި ގޮތުގައި، ކ. އަތޮޅުގެ ރިސޯޓަކުން ސްނޯކްލިންގަށް ގޮސް އުޅުމުގެ ތެރޭގައި އޮޔާދިޔަ މި ފަތުރުވެރިޔާ ފެނިފައިވަނީ، ފުލުހުންގެ ”ލޯންޗް 54“ މާލެއިން ދ. ވާނީއަށް ދަތުރުކުރަމުން ދަނިކޮށެވެ.
މި ފަތުރުވެރިޔާ ފެނިފައިވަނީ އޭނާ ސްނޯކްލިންގަށް ދިޔަ ރިސޯޓާ ގާތްގަނޑަކަށް މޭލެއްހާ ބޭރަށް އޮޔާ ގޮސްފައި ވަނިކޮށެވެ.
ފުލުހުން ވަނީ ވަގުތުން އެ މީހާ ކަނޑުމަތިން ނަގައި، އެހީތެރިކަން ފޯރުކޮށްދީފައެވެ.
ފުލުހުންގެ ލޯންޗަށް ނެގި ފަތުރުވެރިޔާ ވަނީ ރައްކާތެރިކަމާއެކު އަނބުރާ އޭނާ މަޑުކޮށްގެން ހުރި ރިސޯޓަށް ގެންގޮސްދީފައެވެ. މި ހާދިސާގައި ސަލާމަތްކުރި ފަތުރުވެރިޔާގެ ހާލު ރަނގަޅު ކަމަށް ފުލުހުން މައުލޫމާތު ދެއެވެ.
