ފަލަޞްޠީނު ރެފިއުޖީންނަށް އެހީތެރިކަން ފޯރުކޮށްދޭ އދ. ގެ އެޖެންސީ (ޔޫ.އެން.އާރު.ޑަބްލިއު.އޭ) އަށް ކުރިމަތިވެފައިވާ 100 މިލިއަން ޑޮލަރުގެ ބަޖެޓް ތަފާތު ފޫބެއްދުމަށް ބައިނަލްއަޤްވާމީ މުޖުތަމަޢަށް އދ. ގެ ސެކްރެޓަރީ ޖެނެރަލް އަންޓޯނިއޯ ގުޓަރޭޒް، ގޮވާލައްވައިފިއެވެ. ގުޓަރޭޒް ވިދާޅުވީ މި ފައިސާ ނުލިބިއްޖެނަމަ މިލިއަނަކަށްވުރެ ގިނަ ފަލަޞްޠީނު ރައްޔިތުންގެ ފުރާނަ ނުރައްކަލުގެ ތެރެއަށް ވެއްޓިގެންދާނެ ކަމަށެވެ.
އަންގާރަ ދުވަހު ބޭއްވުނު އެހީދޭ ފަރާތްތަކުގެ ކޮންފަރެންސެއްގައި ވާހަކަދައްކަވަމުން ގުޓަރޭޒް ވަނީ، އިސްރާއީލުން އެ އެޖެންސީއާ ދެކޮޅަށް ހިންގާ ”ދޮގު މަޢުލޫމާތު ފެތުރުމާއި ބަދުނާމުކުރުމުގެ ކެމްޕޭންތައް“ ވަރަށް ބޮޑަށް ކުށްވެރިކުރައްވާފައެވެ. އަދި އިސްރާއީލުން ޣައްޒާ އާއި ހިފާފައިވާ ހުޅަނގު އައްސޭރީގައި އެޖެންސީގެ މަސައްކަތްތަކަށް ހުރަސްއަޅަމުންދާ ދިއުމަކީ ބަލައިގަނެވޭނެ ކަމެއް ނޫން ކަމަށްވެސް އޭނާ ވިދާޅުވިއެވެ.
ޣައްޒާގެ ހާލަތަށް އިޝާރާތްކުރައްވައި ގުޓަރޭޒް ވިދާޅުވީ، އެތަނުގެ ދިރިއުޅުމުގެ ހާލަތު އޮތީ ”އިންތިހާއަށް ބިރުވެރި“ ދަރަޖައެއްގައި ކަމަށެވެ. މީގެ އިތުރުން ހުޅަނގު އައްސޭރީގައި އިސްރާއީލު މީހުން ހިންގާ ހަރުކަށި އަމަލުތަކާއި، ލުބުނާނަށް ދެމުންދާ ހަމަލާތަކުގެ ސަބަބުން ރެފިއުޖީންގެ ރައްކާތެރިކަން ގެއްލިފައިވާކަން އޭނާ ފާހަގަކުރެއްވިއެވެ.
1949 ވަނަ އަހަރު އުފެއްދި ޔޫ.އެން.އާރު.ޑަބްލިއު.އޭ އަކީ ޣައްޒާ، ހުޅަނގު އައްސޭރި، އިރުމަތީ ޤުދުސް، ލުބުނާން، އުރުދުން އަދި ސީރިއާގައި ތިބި 2.6 މިލިއަން ފަލަޞްޠީނު ރެފިއުޖީންނަށް ތަޢުލީމާއި، ޞިއްޙީ ޚިދުމަތާއި، އިޖުތިމާޢީ އެހީތެރިކަން ފޯރުކޮށްދޭ މައިގަނޑު ވަސީލަތެވެ. ނަމަވެސް، އިސްރާއީލުން ކުރި ހެކިނެތް ތުހުމަތުތަކަކާ ގުޅިގެން، އެޖެންސީއަށް އެންމެ ބޮޑު އެހީއެއް ދެމުން އައި އެމެރިކާއިން ވަނީ މިއަހަރުގެ ޖެނުއަރީ މަހުން ފެށިގެން އެހީ ދިނުން މެދުކަނޑާލާފައެވެ.
މި ބައްދަލުވުމުގައި ތުރުކީވިލާތުން އދ. އަށް ކަނޑައަޅާފައި ހުންނަވާ ދާއިމީ މަންދޫބު އަޙްމަދު ޔިލްޑިޒް ވިދާޅުވީ، އިސްރާއީލުގެ އަމަލުތަކަކީ ބައިނަލްއަޤްވާމީ ޤާނޫނުތަކާ ކަނޑައެޅިގެން ޚިލާފު އަމަލުތަކެއް ކަމަށެވެ. އަދި މިއީ ފަލަޞްޠީނު ރައްޔިތުން އެނބުރި އެމީހުންގެ ވަޒަނަށް ދިއުމަށް އޮތް ޙައްޤު ނިގުޅައިގަތުމަށް ކުރާ މަސައްކަތެއް ކަމަށްވެސް އޭނާ ތުހުމަތުކުރެއްވިއެވެ.
އޮކްޓޯބަރު 2023 އިން ފެށިގެން އިސްރާއީލުން ޣައްޒާއަށް ދެމުންދާ ހަމަލާތަކުގައި ޔޫ.އެން.އާރު.ޑަބްލިއު.އޭ ގެ 390 މުވައްޒަފުން ވަނީ ޝަހީދުކޮށްލާފައެވެ. ގުޓަރޭޒް ވިދާޅުވީ، މެންބަރު ޤައުމުތަކުގެ މާލީ އެހީތެރިކަން އަވަސް ފުރުޞަތެއްގައި ނުލިބިއްޖެނަމަ، އެޖެންސީގެ ޚިދުމަތްތައް މުޅިން ހުއްޓުމަކަށް އަތުވެދާނެ ކަމުގެ ބިރު އެބައޮތް ކަމަށެވެ.
