މޭރީ ގްރޭސް މަރާލުމުގައި ބައިވެރިވިކަމުގެ ކުށް ސާބިތުވެ، ޙަލީމަތު ލަމްހާ އަބްދުއްރަޙުމާން 15 އަހަރަށް ޖަލަށްލުމަށް ކްރިމިނަލް ކޯޓުން ޙުކުމްކޮށްފިއެވެ. އަދި މި މައްސަލައިގައި މޭރީގެ ފިރިމީހާގެ މައްޗަށް ކުށް ސާބިތުވެ އޭނާ 25 އަހަރަށް ޖަލަށްލުމަށްވެސް ކޯޓުން ވަނީ ކަނޑައަޅާފައެވެ.
މޭރީ ގްރޭސްގެ މަރުގެ މައްސަލައިގައި ދައުލަތުން ވަނީ ކުށްވެރިންގެ އަދަބުގެ ދަރަޖަ މަތިކޮށްދިނުމަށް އެދިފައެވެ. ދައުލަތުން ފާހަގަކުރި ގޮތުގައި، ކުށްވެރިންނަކީ ސިއްޙީ ދާއިރާގައި މަސައްކަތްކުރާ ބަޔަކަށް ވެފައި، މި އަމަލު ހިންގާފައިވަނީ އިންސާނީ ކަރާމާތަށް ބެލުމެއް ނެތި، ރަހުމު ކުޑަކޮށް، އަމިއްލަ އެދުމުގެ މަތިންނެވެ.
މީގެ އިތުރުން، މި އަމަލުގެ ސަބަބުން އަމިއްލަ ގައުމު ނޫން އެހެން ގައުމެއްގައި މައިމީހާ މަރުވެ، ކުޑަ ދަރިފުޅަށް ނިކަމެތިކަން ލިބިފައިވާކަންވެސް ދައުލަތުން ފާހަގަކުރިއެވެ.
އަދަބާ ގުޅޭގޮތުން ވާހަކަ ދެއްކުމަށް ލިބުނު ފުރުސަތުގައި ލަމްހާގެ ދިފާއީ ވަކީލު ވަނީ ލަމްހާގެ ޖަލު އަދަބު ލުއިކޮށްދީ، ގޭބަންދު ނުވަތަ ޖޫރިމަނާގެ އަދަބަކަށް ބަދަލުކޮށްދިނުމަށް އެދިފައެވެ. ސަބަބެއްގެ ގޮތުގައި ވަކީލު ފާހަގަކުރެއްވީ، ލަމްހާއަކީ އެކަނިވެރި މައެއްގެ ހުރި ހަމައެކަނި ދަރިފުޅަށް ވުމާއި، ތަޢުލީމާއި ހުނަރު ލިބިފައިވާ މީހަކަށް ވާތީ މުޖުތަމަޢަށް އަނބުރާ ނެރުމަށް ފުރުސަތު ދިނުމެވެ. ނަމަވެސް، މައްސަލަ ބެއްލެވި ގާޒީ ނިންމެވީ ލަމްހާގެ އަދަބު ލުއިކުރަންޖެހޭ ފަދަ ޝަރުޢީ އަދި ޤާނޫނީ ޙާލަތެއް ނެތްކަމަށެވެ.
އެނގިހުރެ މީހަކު މެރުމުގައި ބައިވެރިވުމުގެ ކުށުގެ އިތުރުން، އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށާއި، ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ދަޢުވާވެސް ލަމްހާގެ މައްޗަށް ވަނީ ސާބިތުވެފައެވެ.
މި ދެ ދަޢުވާއާ ގުޅިގެން 3 މަހާއި އަދި 1 މަހާއި 15 ދުވަހުގެ ޖަލު ޙުކުމެއް ވަނީ އިއްވާފައެވެ. ލަމްހާ ބަންދުގައި ހޭދަކުރި 3 އަހަރަށްވުރެ ގިނަ ދުވަސް އުނިކުރުމުން، އޭނާ ދެން ތަންފީޒުކުރަން ޖެހޭނީ 11 އަހަރުގެ ޖަލު އަދަބެކެވެ.
