އައިޖީއެމްއެޗްގައި މަސައްކަތްކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސް މަރާލި މައްސަލާގައި އޭނާގެ ފިރިމީހާ މާވިން (މިހާރުގެ ނަމުން ޔޫސުފް) 25 އަހަރަށް ޖަލަށްލުމަށް ކްރިމިނަލް ކޯޓުން މިއަދު ހުކުމްކޮށްފިއެވެ.
އޮކްޓޫބަރު 2021 ގައި މޭރީ ގްރޭސްއަށް ހަމަލާދީ އޭނާ މަރާލި ކަމުގެ ތުހުމަތުގައި ދައުލަތުން މާވިންގެ މައްޗަށް ދައުވާކުރިއެވެ. މޭރީ ދަންޖެހިގެން މަރުވީ ކަމަށް ބުނެ މާވިން އޭނާގެ ހަށިގަނޑު ހޮސްޕިޓަލަށް ގެންދިޔަ ނަމަވެސް، ތަހުގީގަށްފަހު ދައުލަތުން ތުހުމަތުކުރީ މޭރީ މަރާލީ މާވިން ކަމަށެވެ. މި މައްސަލާގައި މާވިންގެ މައްޗަށް ކުށް ސާބިތުވާ ކަމަށް ކްރިމިނަލް ކޯޓުން ވަނީ މިދިޔަ މަހު ކަނޑައަޅާފައެވެ.
މިއަދު ބޭއްވި އަދަބު ކަނޑައެޅުމުގެ މަޖިލީހުގައި ދައުލަތުން އެދުނީ މާވިންގެ އަދަބު އަށް ދަރަޖަ މަތިކޮށް، 25 އަހަރަށް ޖަލަށްލުމަށެވެ. އެނގިހުރެ މީހަކު މަރާލުމުގެ ކުށުގެ އަސާސީ އަދަބަކީ 10 އަހަރަށް ޖަލަށްލުން ކަމަށްވާއިރު، މާވިންގެ ފަރާތުން އެދުނީ އެންމެ ކުޑަ އަދަބެއް ކަނޑައަޅައިދިނުމަށެވެ. ނަމަވެސް މައްސަލަ ބެއްލެވި ގާޒީ މުޒައްމިލް ނާސިރު ނިންމެވީ ދައުލަތުން އެދުނު ގޮތަށް 25 އަހަރުގެ ޖަލު ހުކުމެއް އިއްވުމަށެވެ. ގާޒީ ފާހަގަކުރެއްވި ގޮތުގައި މިފަދަ ހަރުކަށި އަދަބެއް ދިނީ މޭރީގެ އެއްވެސް ކުށެއް ނެތި މަރާލާފައިވުމާއި، މަރު ފޮރުވަން މަސައްކަތް ކުރުމާއި، އަދި އެމީހުންގެ ދަރިފުޅު މަންމަގެ ލޯބިން މަހުރޫމްވެފައިވާތީއެވެ.
މި މައްސަލައާ ގުޅިގެން މާވިން ބަންދުގައި ހަތަރު އަހަރާއި ހަ މަހާއި ހަތަރު ދުވަސް ހޭދަކޮށްފައިވާތީ، އޭނާ ދެން ތަންފީޒު ކުރަން ޖެހޭނީ 20 އަހަރާއި ތިން މަހާއި ފަސް ދުވަހުގެ ޖަލު އަދަބެކެވެ. މޭރީގެ މަރަށްފަހު މާވިން ވަނީ އިސްލާމްދީން ގަބޫލުކޮށް އޭނާގެ ނަން ޔޫސުފް އަށް ބަދަލުކޮށްފައެވެ.
މި މައްސަލާގައި މާވިންއާ ލޯބީގެ ގޮތުން ގުޅިގެން އުޅުނު ދިވެހި ނަރުހެއް ކަމަށްވާ ލަމްހާގެ މައްޗަށް ވެސް ކުށް ސާބިތުވާ ކަމަށް ކޯޓުން ނިންމާފައިވާއިރު، އޭނާގެ މައްޗަށް ވެސް މިއަދު އަދަބު ކަނޑައަޅަން ވަނީ ހަމަޖެހިފައެވެ.
