ވ. އާރަށުގެ މައްސަލައިގައި ދައުލަތުން ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމާ ދެކޮޅަށް ހުށަހެޅި އައު ހެކިތައް ބަލައިނުގަތުމަށް ހައިކޯޓުން ނިންމި ނިންމުމަށް ސުޕްރީމް ކޯޓުން މިއަދު ތާއީދުކޮށްފިއެވެ.
ވ. އާރަށް ކުއްޔަށްދިނުމުގެ މުއާމަލާތުގައި ޚިޔާނާތްތެރިވިކަމުގެ ތުހުމަތު ސާބިތުވެ، ކްރިމިނަލް ކޯޓުން ރައީސް ޔާމީންގެ މައްޗަށް އިއްވި 11 އަހަރުގެ ޖަލު ހުކުމް ބާތިލުކޮށް، އެ މައްސަލަ އަލުން ބެލުމަށް ހައިކޯޓުން ނިންމީ 2024 ވަނަ އަހަރުގެ އެޕްރިލް މަހުގެ 18 ވަނަ ދުވަހުއެވެ.
އެ މައްސަލަ އަލުން ބަލާއިރު ދައުލަތުން ހުށަހެޅި އައު ހެކިތައް ބަލައިނުގަތުމަށް ހައިކޯޓުން ކަނޑައެޅުމުން، ދައުލަތުން އެ ނިންމުން ސުޕްރީމް ކޯޓުގައި އިސްތިއުނާފުކުރިއެވެ. ސުޕްރީމް ކޯޓުން މިއަދު އިއްވި ހުކުމުގައި ވަނީ، އައު ހެކިތައް ބަލައިނުގަތުމަށް ހައިކޯޓުން ނިންމި ނިންމުން ބަދަލުކުރަންޖެހޭ ސަބަބެއް ނެތްކަމަށް ކަނޑައަޅާފައެވެ. މި މައްސަލައިގައި ފަނޑިޔާރު އައިޝާ ޝުޖޫން މުޙައްމަދު އިއްވެވި ރައުޔަށް، ފަނޑިޔާރު ޑރ މުޙައްމަދު އިބްރާހީމް އަދި ފަނޑިޔާރު ޢަބްދުﷲ ޙަމީދު ވަނީ ތާއީދުކުރައްވާފައެވެ.
ފަނޑިޔާރު ޝުޖޫންގެ ރައުޔުގައި ފާހަގަކުރެއްވި ގޮތުގައި، ހައިކޯޓުގައި އައު ހެކިތަކާ މެދު ދައުލަތުން ފާހަގަކޮށްފައިނުވާ ނުކުތާތަކެއް ސުޕްރީމް ކޯޓަށް ހުށަހަޅާފައިވާއިރު، އެ ނުކުތާތަކަށް ގޮތެއް ކަނޑައަޅަންޖެހޭ ފަދަ އިސްތިސްނާ ހާލަތެއް ދައުލަތަށް ބުނެދެވިފައެއް ނުވެއެވެ. އަދި ދައުލަތުގެ ފަރާތުން ހަދާ އިޖުރާއީ ގޯސްތަކަށް ކޯޓުތައް މެދުވެރިކޮށް ފަރުވާ ހޯދައިދިނުމަކީ ޝަރީއަތް ހިންގުމުގެ ހަމަހަމަ އުސޫލާ ޚިލާފު ކަމެއްކަމަށްވެސް އެކަމަނާ ވިދާޅުވިއެވެ. މީގެއިތުރުން، އައު ހެކި ބަލައިގަނެވޭނީ އެ ހެއްކަކީ ދަށު ކޯޓުގެ މަރުހަލާގައި ހޯދިފައިނުވާ، މައްސަލައިގެ މައުޟޫއަށް އަސަރުކުރާ، އަދި ސައްހަކަމާމެދު ސުވާލު ނުއުފެދޭ ހެއްކަކަށް ވާނަމަ ކަމަށް ކަނޑައަޅުއްވާފައިވެއެވެ.
ސުޕްރީމް ކޯޓުން މި މައްސަލައާމެދު ގޮތެއް ނިންމަންދެން، ކްރިމިނަލް ކޯޓުގައި އަލުން ބަލަމުންދިޔަ އާރަށު މައްސަލައިގެ ޝަރީއަތް އޮތީ މަޑުޖައްސާލާފައެވެ. ސުޕްރީމް ކޯޓުގެ މި ނިންމުމާއެކު، ދެން ކްރިމިނަލް ކޯޓުން މި މައްސަލަ ބަލަމުންދާނީ ދައުލަތުން ހުށަހެޅި އައު ހެކިތައް އެއްފަރާތްކުރުމަށްފަހުގައެވެ. މި މައްސަލައިގައި ހިމެނޭ ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެންބަރު ޔޫސުފް ނައީމްގެ މައްޗަށް އިއްވާފައިވާ ޖަލު ހުކުމްވެސް ހައިކޯޓުން ބާތިލުކޮށްފައިވާއިރު، އޭނާގެ މައްސަލަވެސް އަލުން ބަލާނީ އައު ހެކިތަކަށް ރިއާޔަތްކުރުމެއް ނެތިއެވެ.
ވ. އާރަށުގެ މައްސަލައިގެ އިތުރުން، މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން މެދުވެރިކޮށް ހިންގި ޚިޔާނާތުގެ ތެރޭގައި ހިމެނޭ ރ. ފުއްގިރީގެ މުއާމަލާތާ ގުޅިގެންވެސް ރައީސް ޔާމީންގެ މައްޗަށް ވަނީ ދައުވާ އުފުލާފައެވެ. މި މައްސަލައިގައި ކްރިމިނަލް ކޯޓުން އިއްވި ހުކުމްވެސް ހައިކޯޓުން ބާތިލުކޮށް އަލުން ބެލުމަށް އަންގާފައިވާއިރު، އެ މައްސަލައިގެ ޝަރީއަތްވެސް މިހާރު ދަނީ ކްރިމިނަލް ކޯޓުގައި ކުރިއަށްދަމުންނެވެ. އަދި ހަމައެއާއެކު، އެންޓި ކޮރަޕްޝަން ކޮމިޝަނާއެކު ހަދާފައިވާ އެސްކްރޯ އެކައުންޓެއްގައި ހުރި 1 މިލިއަން އެމެރިކާ ޑޮލަރު ހޯދުމަށް ރައީސް ޔާމީން ކުރައްވާ ދައުވާގެ މައްސަލަވެސް ހައިކޯޓުގައި ދަނީ ކުރިއަށްދަމުންނެވެ.
