އެމްއެމްޓީވީ އުފެއަދުމަށް އެންސްޕާއިން އެއްވެސް ހަރަދެއް ކޮށްފައިނުވާނެ ކަމަށް ހެރިޓޭޖް މިނިސްޓަރު ހީނާ ވަލީދު މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މައިދުގެ ޖަލްސާގައި ކެންދޫ ދާއިރާ ތަމްސީލުކުރައްވާ އެމްޑީޕީގެ މެންބަރު މައުރޫފް ޒާކިރު ކުރެއްވި ސުވާލަށް ޖަވާބުދެއްވަމުން މިނިސްޓަރު ހީނާ ވިދާޅުވީ، އެމްއެމްޓީވީ ހަދަން އެންސްޕާގެ ބަޖެޓުން އެއްވެސް ހަރަދެއް ކޮށްފައިނުވާނެ ކަމަށެވެ. އަދި އެ މައްސަލައަކީ އޭސީސީން ތަހުގީގުކޮށް ނިންމާފައިވާ މައްސަލައެއްކަން ވެސް ހީނާ ފާހަގަކުރެއްވިއެވެ.
”އެކަމާ ގުޅޭގޮތުން އިއްޒަތްތެރި މެމްބަރުންނަށް އެ މައްސަލަ ހިނގާފައިވާގޮތް ވަރަށް ސާފުކޮށް އެނގިވަޑައިގަންނަވާނެ އޮޑިޓަރ ޖެނެރަލްގެ ރިޕޯޓުން ވެސް އަދި އޭސީސީން ތަހުގީގުކޮށް ނިންމާފައި އޮތް ރިޕޯޓުން ވެސް،“ – މިނިސްޓަރު ހީނާ ވިދާޅުވިއެވެ.
އޭސީސީން މި މައްސަލަ ބަލަން ފެށީ، އިދިކޮޅު އެމްޑީޕީން ކުރަމުން އައި ތުހުމަތުތަކާ ގުޅިގެން އެންސްޕާގެ އިސްނެގުމުގެ މަތިން މި މައްސަލަ ބަލައިދިނުމަށް އޭސީސީގައި އެދުމުންނެވެ. އެ ދުވަސްވަރު ހީނާއަކީ އެންސްޕާގެ ސީއީއޯ ކަމުން، އެމްޑީޕީގެ އިސްފަރާތްތަކުން ވަނީ ހީނާއާ ގުޅުވައިގެން ހަގީގަތެއް ނެތް ދޮގު ވާހަކަތަކެއް ދައްކައިފައެވެ.
މި މައްސަލަ ތަހުގީގުކޮށް އޮޑިޓަރ ޖެނެރަލްގެ އޮފީހުން ވެސް ރިޕޯޓެއް ނެރެފައިވެއެވެ. އެ ރިޕޯޓުގައި ވެސް ވަނީ އެމްއެމްޓީވީ އުފައްދަން އެންސްޕާއިން އެއްވެސް ހަރަދެއް ކޮށްފައިނުވާކަން ފާހަގަކޮށް އެމްޑީޕީގެ ތުހުމަތުތައް ދޮގުކޮށްފައެވެ. މިކަމާ ގުޅިގެން އެމްއެމްޓީވީ ހިންގާ ކުންފުނިން ވެސް އޭރު ވަނީ އެމްޑީޕީގެ ތުހުމަތުތައް ދޮގުކޮށްފައެވެ. އެގޮތުން އެ ޓީވީ ޗެނަލް އުފެއްދުމަށް ސަރުކާރުގެ އެއްވެސް މުއައްސަސާއެއްގެ ފައިސާއެއް ބޭނުންކޮށްފައިނުވާނެ ކަމަށް އެމްއެމްޓީވީން ބުނެފައިވެއެވެ.
