ފީފާ ވޯލްޑްކަޕް 2026 ގެ ރައުންޑް އޮފް 32 ގައި ރޭ ސްވިޑެން އާއި ދެކޮޅަށް ކުޅުނު މެޗު ފަސޭހަކަމާއެކު 3-0 ގެ ނަތީޖާއަކުން ކާމިޔާބުކޮށް، އެންމެ ފަހުގެ ރަނަރަޕް ފްރާންސް އިން މުބާރާތުގެ ރައުންޑް އޮފް 16 ގެ ޖާގައެއް ކަށަވަރުކޮށްފިއެވެ.
މި މުބާރާތުގެ ގްރޫޕް ސްޓޭޖުގައި ކުޅުނު ތިން މެޗުން ވެސް މޮޅުވެ، ފްރާންސް ރައުންޑް އޮފް 32 އަށް ދަތުރުކުރީ ގްރޫޕް އައިގެ އެއްވަނަ ޓީމުގެ ގޮތުގައި ނުވަ ޕޮއިންޓާއެކުގައެވެ. އަދި ސްވިޑެން މި ބުރަށް ކޮލިފައިވީ ގްރޫޕް އެފްގެ ތިންވަނަ ޓީމުގެ ގޮތުގައި، ކުޅުނު ތިން މެޗުން ހަތަރު ޕޮއިންޓް ހޯދައިގެންނެވެ.
މުޅި މެޗުގައި ވެސް މޮޅަށް ކުޅެ ފްރާންސް އިން މެޗު ޑޮމިނޭޓްކުރިއިރު، އެޓީމުން މެޗުގެ ލީޑު ހޯދީ ފުރަތަމަ ހާފުގެ 45 ވަނަ މިނެޓުގައި ކެޕްޓަން ކިލިއަން އެމްބާޕޭ ކާމިޔާބުކޮށްދިން ލަނޑުންނެވެ. އޭގެ ކުރިން މެޗުގެ 21 ވަނަ މިނެޓުގައި ވެސް ފްރާންސް އިން ލަނޑެއް ކާމިޔާބުކުރިއެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.
މެޗުގެ ދެވަނަ ހާފުގައި ފްރާންސް އިން އެޓީމުގެ އެޓޭކުތައް އިތުރަށް ވަރުގަދަކުރިއެވެ. އެގޮތުން މެޗުގެ 53 ވަނަ މިނެޓުގައި ޒުވާން ފޯވާޑް ބްރެޑްލީ ބާކޯލާ ވަނީ ލަނޑެއް ޖަހައި ފްރާންސްގެ ލީޑު ފުޅާކޮށްދީފައެވެ. އެޓީމުގެ ތިންވަނަ ލަނޑު މެޗުގެ 74 ވަނަ މިނެޓުގައި ކާމިޔާބުކޮށްދިނީ އަނެއްކާވެސް އެމްބާޕޭއެވެ. މިއީ މި މުބާރާތުގައި ކުޅުނު ހަތަރު މެޗުގައި އެމްބާޕޭ ކާމިޔާބުކުރި ހަވަނަ ލަނޑެވެ.
ރޭގެ މެޗުގައި ކާމިޔާބުކުރި ދެ ލަނޑާއެކު، ވޯލްޑްކަޕް ތާރީޚުގައި އެމްބާޕޭ ޖެހި ލަނޑުގެ ޖުމްލަ އަދަދު މިވަނީ 18 އަށް އަރާފައެވެ. މިއާއެކު އޭނާ ވަނީ ވޯލްޑްކަޕްގެ ތާރީޚުގައި އެންމެ ގިނަ ލަނޑުޖެހި އާޖެންޓީނާގެ ކެޕްޓަން ލިއޮނަލް މެސީގެ ރެކޯޑާ އަރައި ހަމަކޮށްފައެވެ.
