ފީފާ ވޯލްޑް ކަޕް 2026 ގެ ގަދަ 32 ގެ ބުރުގައި އެމެރިކާގެ ޑާލަސްގައި ކުޅުނު ފޯރިގަދަ މެޗު 2-1 ގެ ނަތީޖާއަކުން ކާމިޔާބުކޮށް، ނޯވޭއިން މުބާރާތުގެ ގަދަ 16 ބުރަށް ދަތުރުކޮށްފިއެވެ. މި މެޗުން ބަލިވުމާއެކު އައިވޮރީ ކޯސްޓް ވަނީ މުބާރާތުން ވަކިވާން ޖެހިފައެވެ.
ގައި ނޯވޭއަށް ކުރިހޯދައިދިނީ އެންޓޯނިއޯ ނޫސާއެވެ. އޭނާ ވަނީ އޭރިއާގެ ބޭރުން ވަރަށް ރީތި ގޯލެއް ކާމިޔާބުކޮށްފައެވެ. މި ގޯލާއެކު އުމުރުން 21 އަހަރުގެ ނޫސާ ވެފައިވަނީ ބޮޑު މުބާރާތެއްގައި ނޯވޭއަށް ގޯލު ޖަހައިދިން އެންމެ ޒުވާން ކުޅުންތެރިޔާއަށެވެ.
ނަމަވެސް، ދެވަނަ ހާފުގައި އައިވޮރީ ކޯސްޓުން ކުޅުން ރަނގަޅުކޮށް ނޯވޭގެ ގޯލަށް ބާރުބޮޑުކުރިއެވެ. ނަތީޖާއެއްގެ ގޮތުން މެންޗެސްޓަރ ޔުނައިޓެޑަށް ކުޅޭ އަމަދު ދިއާލޯ ވަނީ ހިތްގައިމު ސޯލޯ ގޯލަކުން ނަތީޖާ އެއްވަރުކޮށްފައެވެ. އަމަދު ވަނީ އޭގެ ކުޑައިރުކޮޅެއް ކުރިން ނޯވޭގެ ޓޯބްޔޯން ހެގްމް ފޮނުވާލި ހަމަލާއެއް ގޯލުގެ ރޮނގުމަތިން ދިފާއުކޮށްފައެވެ.
މެޗު އެއްވަރުވެގެން ނިމެން ދަނިކޮށް، ނޯވޭ މޮޅުކޮށްދިނީ ދުނިޔޭގެ އެންމެ މޮޅު އެއް ފޯވާޑް އާލިން ހާލަންޑެވެ. މެޗުގެ 86 ވަނަ މިނެޓުގައި އޮސްކާ ބޮބް އާއި ޕެޓްރިކް ބާގް ތަނަވަސްކޮށްދިން ފުރުސަތަކުން ހާލަންޑް ވަނީ ގާތުގައި ހުރެ ގޯލުގެ ތެރެއަށް ބޯޅަ ފޮނުވާލާފައެވެ. މިއީ މިފަހަރުގެ ވޯލްޑް ކަޕްގައި އޭނާ ޖެހި 5 ވަނަ ގޯލެވެ. އަދި ނޯވޭއަށް ކުޅުނު ފަހު 13 ރަސްމީ މެޗުގައިވެސް އޭނާ ވަނީ ގޯލު ޖަހާފައެވެ.
މި މެޗުގައި ނޯވޭގެ ކެޕްޓަން މާޓިން އޮޑެގާޑް ވަނީ ތާރީޚީ ރެކޯޑެއް ގާއިމުކޮށްފައެވެ. އޭނާ ވެފައިވަނީ 1966 ވަނަ އަހަރަށްފަހު، ވޯލްޑް ކަޕްގައި ކުޅުނު ފުރަތަމަ ތިން މެޗުންވެސް އެސިސްޓް ހެދި ތިންވަނަ ކުޅުންތެރިޔާއަށެވެ.
ގަދަ 16 ގެ ބުރުގައި ނޯވޭ ބައްދަލުކުރާނީ ވަރުގަދަ ބްރެޒިލާއެވެ. އަދި މި މުބާރާތުގެ ކުރިއަށް ހުރި މެޗުތަކަށް ބަލާއިރު، އިނގިރޭސިވިލާތާއި ޑީއާރު ކޮންގޯ ބައްދަލުކުރާ މެޗާއި، ފްރާންސާއި ސްވިޑަން ބައްދަލުކުރާ މެޗުވެސް ކުރިއަށް އެބައޮތެވެ.
