ކުރީގެ ރައީސް ޢަބްދުﷲ ޔާމީން އިސްވެހުންނަވައިގެން އުފެއްދެވި ޕީޕަލްސް ނެޝަނަލް ފްރޮންޓު (ޕީއެންއެފް) ގެ ލޯގޯ އާއި ދިދަ ދައްކާލައިފިއެވެ.
ޕީއެންއެފް އުފެއްދުމުގެ ޖަލްސާ ބައްވާފައި ވަނީ މިދިޔަ އީދު ވިލޭރޭގައެވެ. ޖަލްސާ ބޭއްވުމަށް ނިންމީ ޣިޔާސުއްދީން އިންޓަނޭޝަނަލް ސްކޫލުގައި ކަމަށް ވީނަމަވެސް އެތަނުގައި ބާއްވަން އުޅުނު ޖަލްސާ ބޭއްވޭ ގޮތް ނުވުމާ އެކު، ފަހުން އެ ޖަލްސާ ބާއްވާފައި ވަނީ ބްރިޖް ވިއު ޕްލެޓްފޯމުގައެވެ.
ޕީއެންއެފްގެ ވަގުތީ ސެކްރެޓަރީ ޖެނެރަލް މުޙައްމަދު މަލީޙް ޖަމާލު މިއަދު ’އެކްސް‘ ގައި ކުރެއްވި ޕޯސްޓެއްގައި ވަނީ އެ ޕާޓީގެ ލޯގޯ އާއި ދިދަ އާންމުކޮށްފައެވެ. ލޯގޯގައި ހިމެނެނީ ތަރިއެއްގެ ތެރޭގައި އިން ހުޅެވިހަނދެކެވެ. ދިދައިގައި ހިމެނެނީ ޕާޓީގެ ކުލައަކަށް ފާސްކޮށްފައިވާ ގުރާފެހި ކުލަ އާއި ނޫ ކުލައެވެ.
PNF pic.twitter.com/sUVKzXYeZm
— Mohamed Maleeh Jamal (@maleehjamal) April 11, 2024
ޕާޓީގެ ވަގުތީ ރައީސްއަކަށް ޕީއެންއެފް އުފެެއްދުމަށް ބޭއްވި ޖަލްސާގައި ބައިވެރިވި 329 މެންބަރުންގެ އިއްތިފާގުން ފާސްކޮށްފައި ވަނީ ޕާޓީގެ މުއައްސިސް އަދި ރައީސް ޔާމީންގެ ދަރިކަލުން ޒޭން ޔާމީނެވެ.
ޕީއެންއެފްގެ ދާއިމީ މަގާމުތަކަށް މީހުން އިންތިހާބު ކުރެވެންދެން އެ މަގާމުތަކަށް ވަގުތީ ގޮތުން މީހުން ވަނީ ހަމަޖައްސާފައެވެ. އެގޮތުން ސެކްރެޓަރީ ޖެނެރަލްގެ މަގާމަށް މަލީޙް އައްޔަންކުރެއްވިއިރު، ޓްރެޝަރާއަށް އަޙްމަދު މުސްތަފާ މުޙައްމަދު އަދި ރަޖިސްޓްރާއަށް ޢަލީ ޝިޔާން ވަނީ ހަމަޖައްސަވާފައެވެ. އެ ޕާޓީގެ ދާއިމީ ސެނެޓު ފާސްކުރެވެން ދެން އެކުލަވާލި ވަގުތީ ސެނެޓުގައި 20 މެންބަރުން ތިއްބަވައެވެ. އެ މެންބަރުންގެ ތެރޭގައި ރައީސް ޔާމީނާއި ޒޭން ޔާމީނާއި ކުރީގެ ނައިބު ރައީސް ޑރ. މުޙައްމަދު ޖަމީލް އަޙްމަދާއި މަލީޙް ހިމެނެއެވެ.
