ހުސްވި މެއި މަހުގެ މުދަލު ޒަކާތުގެ ގޮތުގައި މޯލްޑިވްސް ޒަކާތު ހައުސްއަށް ޖުމުލަ 7,587,956.14 ރުފިޔާ ބަލައިގަނެ ޒަކާތު ފަންޑުން އެހީތަކާއި މަޝްރޫއުތަކަށް 2,685,834.30 ރުފިޔާ ދޫކޮށްފައިވާ ކަމަށް މޯލްޑިވްސް ޒަކާތު ހައުސްއިން ހާމަކޮށްފިއެވެ.
މިކަމާ ގުޅިގެން ޒަކާތު ހައުސްއިން ބުނެފައިވަނީ، މިދިޔަ 2025 ވަނަ އަހަރުގެ މެއި މަހު މުދަލު ޒަކާތުގެ ގޮތުގައި 4.33 މިލިއަން ރުފިޔާ ލިބިފައިވާ ކަމަށާއި މި އަހަރުގެ މެއި މަހުގެ އެ އަދަދު 7.59 ރުފިޔާއަށް އިތުރުވެފައިވާ ކަމަށެވެ. މިއީ 75.3 އިންސައްތައިގެ ކުރިއެރުމެއް ކަމަށް ޒަކާތު ހައުސްއިން މައުލޫމާތުދެއެވެ.
ޒަކާތް ދެއްކި މިންވަރު މިހާ ބޮޑަށް އިތުރުވުމަކީ ރަސްމީ ނިޒާމުގެ ތެރެއިން ޒަކާތް ދެއްކުމަށް ޢާންމުން ހޭލުންތެރިވަމުންދާ ކަމުގެ ހެއްކެއް ކަމަށް ޒަކާތު ހައުސްއިން ބުނެފައިވެއެވެ.
ޒަކާތު ފަންޑުން އެންމެ ބޮޑު އިސްކަމެއް ދީފައިވަނީ ފަގީރުންނާއި މިސްކީނުންގެ ގިންތިއަށެވެ. އެގޮތުން މި ގިންތިއަށް ކަނޑައެޅުނު ޖުމުލަ 1,483,960.50 ރުފިޔާގެ ތެރެއިން 1,452,960.50 ރުފިޔާ ހަރަދުކޮށްފައިވަނީ ބޭސްފަރުވާގެ އެހީއަށެވެ. މީގެ އިތުރުން، ދިރިއުޅުމުގެ ޒަރޫރީ ބޭނުންތައް ފުއްދުމަށް ދަތިވެފައިވާ ފަރާތްތަކަށް 31,000 ރުފިޔާ ދޫކޮށްފައިވެއެވެ. ޒަކާތު ހައުސްގެ ތަފާސްހިސާބުތަކުން ދައްކާގޮތުގައި، ފަންޑުން ދޫކުރި ޖުމުލަ ފައިސާގެ ގާތްގަނޑަކަށް ހަތަރުބައިކުޅަ ތިންބައި ހޭދަވެފައިވަނީ ސިއްހީ ފަރުވާގެ އެހީތެރިކަމަށެވެ.
ފީސަބީލިﷲ ގިންތިން ތައުލީމީ، ދީނީ އަދި އިލްމީ އެކި މަސައްކަތްތަކަށް ޖުމުލަ 1,037,236.42 ރުފިޔާ ހޭދަކޮށްފައިވެއެވެ. މީގެ ތެރޭގައި ކީރިތި ގުރުއާން ހިތުދަސްކުރުމުގެ ޕްރޮގްރާމްތަކަށާއި ގުރުއާނުގެ އިލްމު ފެތުރުމަށް 753,239.02 ރުފިޔާ ހޭދަކޮށްފައިވާއިރު، އިސްލާމީ ފޮތްތައް ތަރުޖަމާކުރުމަށް 246,989.40 ރުފިޔާ އަދި މަތީ ތައުލީމު ހާސިލުކުރާ ފަރާތްތަކަށް 37,008 ރުފިޔާ އެހީގެ ގޮތުގައި ދޫކޮށްފައިވެއެވެ.
މި ތަފާސްހިސާބުތަކަކީ މިނިސްޓްރީ އޮފް ފިނޭންސްގެ އެސްއޭޕީ ސިސްޓަމްގެ ރެކޯޑުތަކަށް ރިއާޔަތްކޮށް ތައްޔާރުކޮށްފައިވާ ހިސާބުތަކެކެވެ. އެހެންކަމުން، ފަހުން ލިބޭ އިތުރު މައުލޫމާތުތަކާ ގުޅިގެން މި ހިސާބުތަކަށް ބަދަލު އައުމަކީ އެކަށީގެންވާ ކަމެއްކަމަށް މޯލްޑިވްސް ޒަކާތު ހައުސްއިން ފާހަގަކުރެއެވެ.
