ބޭންކް އޮފް މޯލްޑިވްސް (ބީއެމްއެލް) އިން ފީގެ ގޮތުގައި އާމްދަނީ ލިބޭ ވިޔަފާރީގެ މުޢާމަލާތްތަކަށް އިންވެސްޓްކުރުމުގެ ފުރުސަތު ހުޅުވާލައި، އެގޮތަށް އިންވެސްޓްކުރާ ޑޮލަރުން ވިޔަފާރިކޮށްގެން ލިބޭ އާމްދަނީ އިން ބޮޑު ފައިދާއެއް ކަސްޓަމަރުންނަށް ދިނުމަށް ނިންމައިފިއެވެ.
ބޭންކުން އަލަށް ތަޢާރަފުކުރި މި ޚިދުމަތުގެ ދަށުން، ކޮންމެ ދުވަހަކުވެސް އެކި މިންވަރަށް ފައިދާލިބޭ އިންވެސްޓްމެންޓް ޕޫލްތައް ހުޅުވާލެވޭނެއެވެ. މި ޕޫލްތަކުގެ މަޢުލޫމާތު ބޭންކުގެ މޯބައިލް އެޕް އަދި އިންޓަރނެޓް ބޭންކިންގ މެދުވެރިކޮށް ފަސޭހަކަމާއިއެކު ބަލާލެވޭނެއެވެ. އަދި އޮންލައިންކޮށް އިންވެސްޓްކުރުމުގެ މުޢާމަލާތްތައް ވަގުތުން ފުރިހަމަކުރެވޭނެ އިންތިޒާމުވެސް މިހާރު ވަނީ ހަމަޖައްސާފައެވެ.
މި އިންވެސްޓްމެންޓްތަކުން %25 އާ ހަމައަށް ފައިދާ ލިބޭނެ ފުރުސަތު ފަހިކޮށްދީފައިވާއިރު، އިންވެސްޓްކުރާ ޑޮލަރުގެ އަދަދަށްވާ ދިވެހި ރުފިޔާ އިންވެސްޓްކުރާ ފަރާތުގެ އެކައުންޓަށް ވަގުތުން ޖަމާވާނެއެވެ. އަދި އިންވެސްޓްމަންޓްގެ ފައިދާ ޖެހިގެން އަންނަ ދުވަހު ކަސްޓަމަރުގެ ރުފިޔާ އެކައުންޓަށް ޖަމާވާނެ ކަމަށް ބީއެމްއެލް އިން މަޢުލޫމާތުދެއެވެ.
މި ޚިދުމަތް ތަޢާރަފްކުރުމަށް ބޭއްވި ހަފްލާގައި ވާހަކަދައްކަވަމުން ބޭންކް އޮފް މޯލްޑިވްސްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވީ، ރާއްޖެއިން ބޭރުން ޚިދުމަތް ހޯދުމަށާއި ތަކެތިގަތުމަށް ޑެބިޓް އަދި ކްރެޑިޓް ކާޑުން ކުރާ މުޢާމަލާތްތައް ފާއިތުވި 5 އަހަރު ތެރޭގައި 3.7 ގުނަ އިތުރުވެފައިވާ ކަމަށެވެ. މިގޮތުން މަހެއްގެ މައްޗަށް އެވްރެޖްކޮށް 39.3 މިލިއަން ޑޮލަރު ވިއްކަމުންދާ ކަމަށާއި، ކޮންމެ މަހަކު ދެލައްކަ ފަންސާސް ހާހާއި ތިންލައްކަ އާއި ދެމެދުގެ ޢަދަދަކަށް މީހުން ރުފިޔާ ކާޑުތަކުން ރާއްޖެއިން ބޭރުގެ މުޢާމަލާތް ކުރަމުންދާކަން އޭނާ ފާހަގަކުރެއްވިއެވެ.
”މީގެ އެންމެ މުހިންމު ސަބަބަކީ ދިވެހިން ބޭރުގެ ގައުމުތަކުން އޮންލައިންކޮށް މުދާ ގަތުމުގެ މުއާމަލާތްތައް (ކްރޮސް-ބޯޑަރ އީ-ކޮމާސް) އިތުރުވެގެން ދިޔުން. މިއީ ރާއްޖެއިން ޑިޖިޓަލް އީޖާދުތައް ހަލުވިކަމާއެކު ބަލައިގަންނަމުންދާ ކަމުގެ ހެއްކެއް،“ ޝަރީފް ވިދާޅުވިއެވެ.
ސީއީއޯ އިތުރަށް ވިދާޅުވީ، ވޭތުވެދިޔަ 36 މަސް ދުވަހުގެ ތެރޭގައި ބޭންކުން 1.6 ބިލިއަން ޑޮލަރު ޢާންމު ފަރުދުންނަށާއި ކާޑު މުޢާމަލާތްތަކަށް ވިއްކާފައިވާ ކަމަށެވެ. މި އާ ނިޒާމުގެ ސަބަބުން ބޭންކަށް ޑޮލަރު ލިބި، ކަސްޓަމަރުންގެ ޒަރޫރީ ބޭނުންތައް ކަމަށްވާ ކާޑު ޕޭމަންޓްތަކާއި، އީ-ކޮމާސް ވިޔަފާރި އަދި މުދާ އިމްޕޯޓްކުރުމަށް ބޭނުންވާ ޑޮލަރު ދެމެހެއްޓެނިވި ގޮތެއްގައި ފޯރުކޮށްދެވޭނެއެވެ.
މި ހަފްލާގައި ވަނީ އެފް.އެކްސް އިންވެސްޓްމަންޓް ޚިދުމަތް ބޭނުންކުރާނެ ގޮތުގެ ޑެމޯއެއް ދައްކާލާފައެވެ. އަދި ސީއީއޯ ވަނީ މީޑިއާގެ ސުވާލުތަކަށް ޖަވާބުދެއްވައި، ބޭންކުގެ ބޭރު ފައިސާގެ ސްޓްރެޓެޖީއާ ގުޅޭ އިތުރު ތަފްސީލުތައް ހިއްސާކުރައްވާފައެވެ.
