ދިވެހިރާއްޖޭގެ އެންމެ ބޮޑު އިދިކޮޅު ސިޔާސީ ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަށް 21 އަހަރު ފުރުން ފާހަގަކޮށް ނިމުނުއިރުވެސް، އެ ޕާޓީގެ ޗެއަރޕާސަން މުޙައްމަދު ނަޝީދު ރާއްޖޭގައި ނޫޅުއްވާތީ ޕާޓީގެ އާންމު މެންބަރުންގެ މެދުގައި ނުތަނަވަސްކަން އުފެދިއްޖެއެވެ.
އެމްޑީޕީން ޖޫން 24 ވަނަ ދުވަހު ސޯޝަލް މީޑިއާގައި ކުރި ޕޯސްޓެއްގައި ބުނެފައިވަނީ، ޗެއަރޕާސަން ނަޝީދު އިނގިރޭސިވިލާތަށް ފުރާވަޑައިގަންނަވާނީ އެ ދުވަހު ކަމަށެވެ. މި ދަތުރުފުޅުގައި ޔޫކޭގެ ކޮންޒަވެޓިވް ޕާޓީގެ އޮފިޝަލުންނާއި ޔޫކޭ ބާ ކައުންސިލާ ބައްދަލުކުރެއްވުމަށް ހަމަޖެހިފައިވާއިރު، އެމަނިކުފާނު އެނބުރި ރާއްޖެ ވަޑައިގަންނަވާނީ އަންނަ ޖުލައި މަހުގެ 2 ވަނަ ދުވަހު ކަމަށްވެސް އެ ޕާޓީން ބުނެފައިވެއެވެ.
ނަޝީދު އިނގިރޭސިވިލާތަށް ވަޑައިގެން، އެ ގައުމުގެ ކޮންޒަވެޓިވް ޕާޓީގެ ފިލިޕާ ބްރޫމްއާ ބައްދަލުކުރައްވާ ކުރެއްވި ޕޯސްޓެއްގައި ވިދާޅުވެފައިވަނީ، އެމްޑީޕީ އުފެއްދުމާއި ރާއްޖެއަށް މަލްޓި-ޕާޓީ ޑިމޮކްރަސީ ތައާރަފުކުރުމުގައި ފިލިޕާ އާއި ޔޫކޭ ކޮންޒަވެޓިވްސްގެ ދައުރު ބޮޑު ކަމަށެވެ. އަދި ޕާޓީގެ އަހަރީ ދުވަހު އޭނާއާ ބައްދަލުވުމަކީ ލިބުނު އުފަލެއް ކަމަށްވެސް ވިދާޅުވިއެވެ.
Philippa Broom and the UK Conservatives were instrumental in building the MDP and multiparty politics in the Maldives. She was key in training and building the party’s first campaign teams. A pleasure to meet her on the MDP's anniversary. pic.twitter.com/T4jt8Rga8r
— Mohamed Nasheed (@MohamedNasheed) June 26, 2026
ނަމަވެސް، ޕާޓީގެ މުހިންމު މުނާސަބަތެއްގައި ޗެއަރޕާސަން ރާއްޖޭގައި ނެތުމުން ގިނަ ބައެއްގެ ފާޑުކިޔުން ވަނީ އަމާޒުވެފައެވެ. ނަޝީދަކީ އާދައިގެ މަތިން ދިރިއުޅުމުގެ ބޮޑުބައި ވިލާތުގެ ގައުމުތަކުގައި ހޭދަކުރައްވާ ބޭފުޅެއްކަން ފާހަގަކުރަމުން، ބައެއް ފަރާތްތަކުން ތުހުމަތުކުރާ ގޮތުގައި މި ދަތުރުތަކަކީ ރާއްޖޭގެ ދީނީ އަދި އިޖްތިމާއީ ހަމަޖެހުން ނަގާލުމަށް ބޭރުގެ ފަރާތްތަކުން ފަންޑު ހޯދުމަށް ކުރައްވާ ދަތުރުތަކެކެވެ.
ސިޔާސީ މަސްރަހަށް ބަލާއިރު، ނަޝީދު ވަނީ މީގެ ކުރިން އެމްޑީޕީގެ ވެރިކަން ރޫޅާލުމަށްފަހު ”ދަ ޑިމޮކްރެޓްސް“ ގެ ނަމުގައި އާ ޕާޓީއެއް އުފައްދަވާފައެވެ. އެހެންނަމަވެސް، އެ ޕާޓީއަށް ސިޔާސީ ކުރިއެރުމެއް ނުލިބި ފެއިލްވުމުން، އަނެއްކާވެސް ވަނީ އެމްޑީޕީއާ ގުޅިވަޑައިގެންފައެވެ. ނަޝީދުގެ މި ނިންމެވުމާއެކު، އޭނާއަށްޓަކައި އެމްޑީޕީއަށް މީގެ ކުރިން ބަދުބަސް ބުނި މެންބަރުންނަށް ވަނީ ”އުނބަށް ޖެހިފައި“ ކަމަށް ބުނެ ފާޑުކިޔުންތައް އިތުރުވެފައެވެ.
މީގެ އިތުރުން، ނަޝީދު ދައުލަތުގެ ޚަރަދުގައި ނުވަތަ ރައްޔިތުންގެ ޓެކްސް ފައިސާގައި ދުނިޔޭގެ އެކި ގައުމުތަކަށް ދަތުރުކުރައްވާ، މަހުޖަނުންގެ ކައިވެނި ހަފްލާތަކާއި އެކި މަޖާ ސަކަރާތްތަކުގައި އުޅުއްވުމަށްފަހު، ރާއްޖެ ވަޑައިގަންނަވަނީ ހަމައެކަނި މަގާމެއް ބޭނުންވުމުން ކަމަށްވެސް ފާޑުކިޔާ ފަރާތްތަކުން ބުނެއެވެ.
މިފަހަރުވެސް ޕާޓީގެ 21 ވަނަ އަހަރީ ދުވަހުގެ މަސައްކަތްތަކުގައި އުޅޭ އާންމު މެންބަރުންނާއި ޕާޓީގެ ހަރަކާތްތެރިން ދޫކޮށްލުމަށްފަހު، އަމިއްލަ މަންފާއަށް ފަންޑު ހޯދުމަށް ފުރާވަޑައިގަތީކަމަށް ބުނެ، އެމްޑީޕީގެ އެތެރޭގައިވެސް ބޮޑެތި ޚިޔާލުތަފާތުވުންތަކެއް ވަނީ އުފެދިފައެވެ.
