މާލެ ސަރަހައްދުގެ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމަށް ސަރުކާރުން ކުރިއަށްގެންދާ ”ރަސްމާލެ“ ތަރައްގީކުރުމުގެ މަޝްރޫއުގެ މާސްޓާ ޕްލޭން އެކުލަވާލުމަށް، ކޮންސަލްޓަންސީ ސާވިސް ދޭނެ ފަރާތެއް ހޯދުމަށް ބިނާރާއި ގެދޮރުވެރިކަމާ އުމްރާނީ ތަރައްގީއާ ބެހޭ ވުޒާރާއިން މިއަދު އިޢުލާންކޮށްފިއެވެ.
މި ކޮންސަލްޓަންސީގެ ދަށުން މައިގަނޑު ގޮތެއްގައި ކުރަން ހަމަޖެހިފައިވާ މަސައްކަތްތަކުގެ ތެރޭގައި، ބޭސްލައިން ސްޓަޑީ ހެދުމާއި، އާބަން ޑވެލޮޕްމަންޓް ފްރޭމްވޯކް އެކުލަވާލުމުގެ އިތުރުން ބިން ބޭނުންކުރާނެ ގޮތުގެ ޕްލޭން އެކުލަވާލުން ހިމެނެއެވެ. އަދި ހިއްކާ ބިން ހިމާޔަތްކޮށް ތަރައްގީކުރުމުގެ މަސައްކަތްތައް ކަމާގުޅޭ އިދާރާތަކާ ގުޅިގެން ރާވާ ކުރިއަށްގެންދާނެ ގޮތުގެ އިންތިޒާމުތައް ތަރުތީބުކުރުންވެސް މި މަސައްކަތުގެ ތެރޭގައި ހިމެނެއެވެ.
މި ޕްލޭން އެކުލަވާލުމުގައި ރަސްމާލޭގައި ތިމާވެއްޓާ ރަށްޓެހި މަސައްކަތްތައް ކުރުމާއި، ޔުޓިލިޓީގެ ހިދުމަތްތަކުގެ ޕްލޭނާއި، ދަތުރުފަތުރުގެ ނިޒާމުގެ އިތުރުން، ހާއްސަ އެހީތެރިކަމަށް ބޭނުންވާ މީހުންނަށް ފަސޭހައިން އުޅެވޭނެ ފަދަ (އެކްސިސިބިލިޓީ) ވަސީލަތްތަކަށް ހާއްސަ ސަމާލުކަމެއް ދޭނެއެވެ.
މި މަސައްކަތަށް ޝައުގުވެރިވާ ފަރާތްތަކުން ބިޑް ހުށަހެޅުމުގެ ފުރުސަތު އަންނަ މަހުގެ 13 ވަނަ ދުވަހުގެ ހެނދުނު 10:00 އާ ހަމައަށް ވަނީ ހުޅުވާލާފައެވެ.
ރަސްމާލެ މަޝްރޫއަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ބޯހިޔާވަހިކަމުގެ މައްސަލައަށް ހައްލެއް ހޯދުމަށް ގެންގުޅުއްވާ އެންމެ ބޮޑު ތަސައްވަރެވެ. މި މަޝްރޫއުގެ ދަށުން ޖުމްލަ 1010 ހެކްޓަރުގެ ބިން ހިއްކުމަށް ހަމަޖެހިފައިވާއިރު، މިހާތަނަށް ވަނީ 500 ހެކްޓަރަށްވުރެ ބޮޑު ސަރަހައްދެއް ހިއްކާ ނިންމާފައެވެ.
ސަރުކާރުގެ އަމާޒަކީ ކުރިއަށް އޮތް 20 އަހަރު ދުވަހުގެ ތެރޭގައި ރަސްމާލެއިން 200,000 ހައުސިން ޔުނިޓްގެ ބޯހިޔާވަހިކަން ފޯރުކޮށްދިނުމެވެ. މިއީ ރާއްޖޭގެ މޫސުމާއި ތިމާވެއްޓަށް ރިއާޔަތްކޮށް ހިންގޭ ”އިކޯ-ސިޓީ“ އެކެވެ. އެގޮތުން ރަސްމާލެއަށް ކަރަންޓު ފޯރުކޮށްދިނުމަށް ނިންމާފައިވަނީ އިއާދަކުރަނިވި ހަކަތައިގެ ވަސީލަތްތައް ބޭނުންކޮށްގެންނެވެ. އަދި ތިމާވެށީގެ އެކި ނުރައްކާތަކުން ރައްކާތެރިވެވޭނެ ފަދަ ގޮތަކަށް ހުރިހާ ވަސީލަތްތަކެއް ގާއިމުކުރުމަށް ވަނީ ރޭވިފައެވެ.
