މާލޭގެ ގެއެއްގައި މިއަދު ހެނދުނުގެ ވަގުތެއްގައި ހިނގި އަލިފާނުގެ ހާދިސާގައި ދުމުގެ އަސަރުކުރި މީހަކަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ފަރުވާ ދެމުން އަންނަ ކަމަށް އެމްއެންޑީއެފުން ބުނެފިއެވެ.
އެ ހާދިސާ ހިނގާފައިވަނީ މައްޗަންގޮޅި ސުއްކަތުރާ ގޭގައެވެ. އެމްއެންޑީއެފްއިން ބުނީ، މި ހާދިސާ ހިނގިކަމުގެ ރިޕޯޓު ލިބިފައިވަނީ މިއަދު ހެނދުނު 09:46 އެހާއިރު ކަމަށެވެ. އެމްއެންޑީއެފްއިން ބުނި ގޮތުގައި، އަލިފާން ރޯވީ އެ ގޭގެ ބަދިގެއާއި ސިޓިންގ ރޫމް ހިމެނޭ ބައިގައި ހުރި ކަބަޑު ސެޓެއްގެ ތިރީ ބައިގައި ކަމަށެވެ.
ފަޔަރ އެންޑް ރެސްކިއު އިން ކުރި މަސައްކަތުން، އަލިފާންގަނޑު ނިއްވާލެވިފައިވާ ކަމަށާއި، އެ ހާދިސާގައި ދުމުގެ އަސަރުކުރި މީހާއަށް ފަރުވާ ދިނުމަށް ހޮސްޕިޓަލަށް ގެންގޮސްފައިވާ ކަމަށެވެ. ނަމަވެސް އިތުރު އެއްވެސް ތަފުސީލެއް އެމްއެންޑީއެފްއިން މިކަމުގައި ދީފައެއް ނުވެއެވެ.
އަލިފާނުގެ ހާދިސާ ހިނގަން މެދުވެރިވި ސަބަބު އަންނަނީ ތަހުގީގު ކުރަމުންނެވެ.
