ވޯލްޑް ކަޕް 2026 ގައި ރޭ ކުޅުނު ފޯރިގަދަ މެޗުން ޖަޕާން 2-1 އިން ބަލިކޮށް، ފަސް ފަހަރުގެ ޗެމްޕިއަން ބްރެޒިލް މުބާރާތުގެ ގަދަ 32 ކަށް ދަތުރުކޮށްފިއެވެ.
މެޗުގެ ފުރިހަމަ ވަގުތު ހަމަވެ، އިތުރު ވަގުތުގެ ގޮތުގައި ދެއްކި ހަ މިނެޓުގެ ތެރޭގައި ބްރެޒިލް މޮޅުކޮށްދިން ލަނޑު ޖަހައިދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ގަބްރިއަލް މާޓިނެލީއެވެ. މި ލަނޑާއެކު މެޗު އިތުރު ވަގުތަށް ދިޔަނުދީ ބްރެޒިލް ވަނީ ސަލާމަތްވެފައެވެ.
މެޗުގެ ފުރަތަމަ ލަނޑު ޖަހައި ކުރިހޯދީ ޖަޕާނުންނެވެ. މެޗުގެ 29 ވަނަ މިނެޓުގައި މި ލަނޑު ޖަހައިދިނީ ކައިޝޫ ސާނޯއެވެ. އޭނާ މި ލަނޑު ޖެހީ ބްރެޒިލްގެ ކުޅުންތެރިއަކަށް ހެދުނު ގޯހެއްގެ ފައިދާ ނަގައި، މެދުތެރެއިން ބޯޅަ ހޯދައިގެން ގޮސް އޭރިއާ ބޭރުން ފޮނުވާލި ބާރު ހަމަލާއަކުންނެވެ.
ބްރެޒިލުން މެޗުގެ ނަތީޖާ ހަމަހަމަކުރީ 56 ވަނަ މިނެޓުގައެވެ. ގަބްރިއަލް މަގަލްހައެސް ތަނަވަސްކޮށްދިން ފުރުސަތަކުން މި ލަނޑު ބޮލުން ޖަހައިދިނީ ކެސެމީރޯއެވެ. ނަމަވެސް، މެޗުގެ ފަހުކޮޅު ކެސެމީރޯގެ ފަޔަށް ލިބުނު އަނިޔާއަކާ ގުޅިގެން އޭނާ ވަނީ ދަނޑުން ބާލާފައެވެ. މި މުބާރާތުގައި މިހާތަނަށް ހަތަރު ލަނޑު ޖަހާފައިވާ ވިނީޝިއަސް ޖޫނިއަރަށް ވެސް ލަނޑު ޖަހާނެ ރަނގަޅު ފުރުސަތެއް ލިބި ބޭކާރުވެފައިވެއެވެ.
ޖަޕާނުގެ ގޯލްކީޕަރު ޒިއޮން ސުޒުކީ ވަނީ މި މެޗުގައި މުހިންމު ހަތަރު ސޭވްއެއްކޮށް، ބްރެޒިލްގެ ނުރައްކާތެރި ހަމަލާތަކެއް ހުއްޓުވާފައެވެ. މި ބައްޔާއެކު ޖަޕާނުން މުބާރާތާ ވަކިވާން ޖެހުނުއިރު، އެ ގައުމަކީ އަދިވެސް ވޯލްޑް ކަޕްގެ ނޮކްއައުޓް މެޗަކުން މޮޅުވެފައިނުވާ ގައުމެކެވެ.
މި މޮޅާއެކު ބްރެޒިލް ދެން ބައްދަލުކުރަން ޖެހޭނީ އައިވަރީ ކޯސްޓް ނުވަތަ ނޯވޭއާއެވެ. އެ މެޗު އޮންނާނީ އަންނަ އާދިއްތަ ދުވަހު ނިއު ޖާޒީގެ އީސްޓް ރަދަފޯޑްގައެވެ. ފާހަގަކޮށްލެވޭ ގޮތުގައި މި މޮޅު ބްރެޒިލަށް ލިބުނީ، 1958 ވަނަ އަހަރު ޕެލޭގެ ދެ ލަނޑާއެކު އެ ގައުމުން ފުރަތަމަ ފަހަރަށް ވޯލްޑް ކަޕް ކާމިޔާބުކުރި ތާރީޚީ ދުވަހާ ދިމާކޮށެވެ.
