އިލެކްޝަންސް ކޮމިޝަން (އީސީ) ގެ ރައީސް ކަމަށް މުހައްމަދު ޝަކީލް އައްޔަންކުރުމަށް ރުހުން ހޯދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޖިލީހަށް ހުށަހަޅުއްވައިފިއެވެ.
އީސީގެ މެންބަރު ކަމަށް ޝަކީލް އައްޔަންކުރެއްވީ މިދިޔަ ބުދަ ދުވަހުއެވެ. އެ މަގާމު ހުސްވީ އެ ކޮމިޝަންގެ ރައީސްގެ މަގާމުގައި ހުންނެވި މުޙައްމަދު ޒާހިދު މިދިޔަ މެއި މަހުގެ 1 ވަނަ ދުވަހު އިސްތިއުފާ ދެއްވުމާ ގުޅިގެންނެވެ. އީސީގެ ރައީސް ކަމަށް ޝަކީލް އައްޔަންކުރަން ރުހުން ހޯދުމަށް ރައީސް މަޖިލީހަށް ހުށަހެޅުއްވި ސިޓީ މިއަދުގެ ޖަލްސާގައި އިއްވާފައިވެއެވެ.
”ގާނޫނު ނަންބަރު 8/2008 އިލެކްޝަންސް ކޮމިޝަންގެ ގާނޫނުގެ ހަތްވަނަ މާއްދާގެ ހ. ގައިވާ ގޮތުގެ މަތިން އިލެކްޝަންސް ކޮމިޝަންގެ ރައީސް އައްޔަންކުރުމަށްޓަކައި އެ މާއްދާގެ ށ. ގައިވާގޮތުގެ މަތިން އެ ކޮމިޝަންގެ މެންބަރުކަމަށް އައްޔަންކޮށްފައިވާ ދަފުތަރު ނަމްބަރު ރސ. 1349 އަލްފާޞިލް މުޙައްމަދު ޝަކީލްގެ ނަން ރައްޔިތުންގެ މަޖިލީހަށް ހުށަހަޅުއްވައިދެއްވައި މަޖިލީހަށް ފެނިވަޑައިގަންނަވާ ގޮތެއްގެ މަތިން މި ނަންފުޅު ފާސްކޮށްދެއްވުން އެދި ދެންނެވީމެވެ,“ – ރައީސް ފޮނުއްވި ސިޓީގައިވެއެވެ.
ފާހަގަކޮށްލަންޖެހޭ ގޮތުގައި ޝަކީލަކީ މީގެ ކުރިން ބޭންކް އޮފް މޯލްޑިވްސް (ބީއެމްއެލް) އާއި އިލެކްޝަންސް ކޮމިޝަންގެ ޑިރެކްޓަރ ޖެނެރަލްކަމުގެ މަގާމާއި އެ ކޮމިޝަންގެ މެންބަރުކަން ކުރައްވާފައިވާ ބޭފުޅެކެވެ.
