ބޭންކް އޮފް މޯލްޑިވްސް (ބީއެމްއެލް) ގެ ރުފިޔާ ކާޑުތަކުން ރާއްޖެއިން ބޭރުގެ އީ-ކޮމާސް ސައިޓްތަކުން މުއާމަލާތްތައް ކުރުމަށް ކަނޑައަޅާފައިވާ ލިމިޓްތަކަށް ދޭ ލުއިތައް ވަރަށް އަވަހަށް އާންމުކުރާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ރައީސް ވިދާޅުވީ، ދިވެހިން އާންމުކޮށް ވިޔަފާރިކުރާ ބޭރުގެ އީ-ކޮމާސް ސައިޓުތަކުން މުއާމަލާތްކުރުމުގައި މިހާރު ހުރި ދަތިތަކަށް ހައްލެއް ހޯއްދަވައިދެއްވާނެ ކަމަށެވެ. އެގޮތުން މި ހަފުތާ ނިމޭތާ ނުވަތަ އަންނަ ހަފުތާގެ ކުރީކޮޅު ބީއެމްއެލްގެ ފަރާތުން މިކަމާ ގުޅޭ އިތުރު ތަފްސީލުތަކާއި އާ ކަންތައްތަކެއް ތައާރަފުކުރާނެ ކަމަށް އެމަނިކުފާނު ވިދާޅުވިއެވެ.
ބީއެމްއެލްއިން ވެސް ވަނީ ބޭރުގެ އީ-ކޮމާސް ސައިޓްތަކުން ކުރާ މުއާމަލާތްތަކަށް މިހާރު ކަނޑައަޅާފައިވާ ލިމިޓްތަކަށް ހެޔޮ ބަދަލުތަކެއް ގެނައުމަށް މަސައްކަތް ކުރަމުންދާކަން ހާމަކޮށްފައެވެ. ބޭންކުން ބުނި ގޮތުގައި މި މަސް ނިމުމުގެ ކުރިން ކަސްޓަމަރުންނަށް މި ބަދަލުގެ ފައިދާ ލިބިގެންދާނެއެވެ.
މިދިޔަ މަހުން ފެށިގެން ބީއެމްއެލްއިން ވަނީ ދިވެހި ރުފިޔާ ކާޑުތަކުން ރާއްޖެއިން ބޭރުގެ އީ-ކޮމާސް ސައިޓްތަކުން ކުރާ މުއާމަލާތްތައް ލިމިޓްކޮށްފައެވެ. މީގެ ކުރިން ޑެބިޓް ކާޑުތަކުން މަހެއްގެ މައްޗަށް 250 ޑޮލަރުގެ މުއާމަލާތް ކުރެވޭއިރު، މިދިޔަ އަހަރު އެ ލިމިޓް 500 ޑޮލަރަށް ބޮޑުކުރި ނަމަވެސް، ޑޮލަރުގެ ތާށިކަން ކުރިމަތިވެ ބޭންކަށް ލިބޭ ޑޮލަރަށް ވުރެ ޑިމާންޑް ބޮޑުވުމުގެ ސަބަބުން، މިހާރު ވަނީ ހުރިހާ ޑެބިޓް ކާޑުތަކަށް ވަކި ލިމިޓެއް ކަނޑައަޅައިފައެވެ.
ސަރުކާރުން މަސައްކަތް ކުރަމުންދަނީ މިފަދަ މައްސަލަތައް ހައްލުކޮށް، ވަކިން ހާއްސަކޮށް ކާޑު ލިމިޓްގެ ސަބަބުން ކުރިމަތިވެފައިވާ ދަތިތަކަށް އަވަސް ހައްލެއް ހޯދައިދިނުމަށެވެ.
