ލ. އަތޮޅުގައި ތަރައްގީކުރާ ދެވަނަ އެއަރޕޯޓު އެ އަތޮޅު އިސްދޫ-ކަލައިދޫގައި ތަރައްގީކުރުމަކީ އިގުތިސާދީ ގޮތުން އެންމެ ފައިދާ ބޮޑު ގޮތް ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިއަދު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ރައީސް މުޢިއްޒު ވިދާޅުވީ، އެކަން އެ ގޮތަށް ނިންމީ މުޅި ހައްދުންމައްޗަށް ވެސް އެންމެ ފައިދާ ވާނެ ގޮތަކީ އެއީ ކަމަށް ގަބޫލުފުޅުކުރެއްވޭތީ ކަމަށެވެ. އެމަނިކުފާނު ވިދާޅުވީ އިގްތިސާދީ ގޮތުންނާއި ޖިއޮގްރަފީ ގޮތުން ވެސް އެންމެ ފައިދާވާނީ އެ ރަށުގައި އެއަރޕޯޓް ތަރައްގީކުރުމުން ކަމަށެވެ.
ހަމައެހެންމެ މިދިޔަ ދެ އަހަރު އެކި ގޮތްގޮތުން ބަލަންޖެހޭ ކަންކަން ބަލައި، ކުރަންޖެހޭ ދިރާސާތައް ވެސް މި މަޝްރޫއު ކުރިއަށްގެންދިއުމުގެ ކުރިން ބަލާފައިވާ ކަމަށް ރައީސް ވިދާޅުވިއެވެ.
”އަޅުގަނޑު ވައުދުވީ ލ. އަތޮޅުގައި އިތުރު އެއް އެއާޕޯޓު ޖުމުލަ ދެ އެއާޕޯޓު، ދެން އަޅުގަނޑާ ހަމައަށް އެކަމަށް އެދި ތިން ރަށަކުން އައި. އެއިން އެންމެ ރަނގަޅު ކަމަށް ފެންނަ ރަށް ސަރުކާރުން މިދިޔަ ދެ އަހަރު އެކި ގޮތްގޮތަށް ބަލައި ދިރާސާތައް ހަދާފައި ނިންމީ,“ – ރައީސް ވިދާޅުވިއެވެ.
ލ. އަތޮޅުގައި މިހާރު އެއަރޕޯޓެއް އޮންނަނީ ހަމައެކަނި ކައްދޫގައެވެ. އެއީ އެ އަތޮޅުގެ ވެރިކަންކުރާ ރަށް ފޮނަދޫއާއި އަތޮޅުގެ އެންމެ އާބާދީ ބޮޑު ރަށް ގަމާއި ލިންކް ރޯޑަކުން ގުޅާލާފައި އޮންނަ ރަށެކެވެ. ލ. އަތޮޅުގެ ދެވަނަ އެއާޕޯޓް އަޅާނެ ރަށެއް ހައުސިންގ މިނިސްޓްރީން އިއުލާންކުރީ މިދިޔަ ހަފުތާގެ ބުރާސްފަތި ދުވަހުއެވެ. ސަރުކާރުން ނިންމާފައި ވަނީ އިސްދޫ-ކަލައިދޫގައި އެ އެއަރޕޯޓް ތަރައްގީކުރުމަށެވެ.
