ގްރޭޓަރ މާލެ ކަނެކްޓިވިޓީ ބްރިޖް ނުވަތަ ތިލަމާލެ ބްރިޖުން ޓޯލް ފީއެއް ނެގުމުގެ ވިސްނުންފުޅެއް ނުގެންގުޅުއްވާ ކަމަށާއި އެކަމާ ގުޅުންހުރި އެއްވެސް މަޝްވަރާއެއް ވެސް ކުރިއަށްނުދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ރައީސް މުޢިއްޒު ވިދާޅުވީ، ތިލަމާލެ ބްރިޖްގެ ޓޯލް ފީ ނެގުމުގެ މަޝްވަރާއެއް އަދި ދިރާސާއެއް އަދި ކުރިއަށްނުދާ ކަމަށާއި ސަރުކާރުން އެކަމަށް ވަކި ގޮތެއް ނިންމާފައިނުވާ ކަމަށެވެ.
މީގެ އިތުރުން ސިނަމާލެ ބްރިޖުން ވެސް ޓޯލް ފީއެއް ނެގުމާ ގުޅޭ އެއްވެސް މަޝްވަރާއެއް ވެސް ކުރިއަށްނުދާކަން ރައީސް ފާހަގަކުރެއްވިއެވެ. ސިނަމާލެ ބްރިޖާއި ހައިވޭއިން ދަތުރުކުރާ އުޅަނދުތަކުން ޓޯލް ފީއެއް ނެގުމުގެ ދިރާސާތައް އެމަނިކުފާނު ހައުސިންގ މިނިސްޓަރު ކަމުގައި ހުންނެވި ދުވަސްވަރު ކުރިއަށްދިޔަ ނަމަވެސް، މި ސަރުކާރުން އެކަމުގައި ކުރިއަށްދާނީ ނިމިދިޔަ އެމްޑީޕީ ސަރުކާރުން ހިފަހައްޓާފައިވާ އުސޫލާއެކުގައި ކަމަށް ރައީސް ވިދާޅުވިއެވެ.
2018 ވަނަ އަހަރު ސިނަމާލެ ބްރިޖު ހުޅުވުނީއްސުރެ މިއަދާއި ހަމައަށް ވެސް އެ ބްރިޖާއި ހައިވޭއިން ދަތުރުކުރާ އުޅަނދުތަކުން ޓޯލް ފީއެއް ނުނަގާކަން ފާހަގަކޮށްލަންޖެހެއެވެ.
