ދައުލަތުން ނަގާފައިވާ ދަރަނިތައް އަދާކުރުމަކީ ހަމައެކަނި ސަރުކާރަށް ފައިދާވާނެ ކަމެއް ނޫން ކަމަށާއި، އެއީ ސީދާ ރައްޔިތުންގެ ދިރިއުޅުމާ، ދިވެހިރާއްޖޭގެ މިނިވަންކަމާއިވެސް، ގުޅިފައިވާ ކަމެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، ދަރަނި އަދާކުރުމުގެ މަސައްކަތަކީ އިޤްތިސާދީ މިނިވަންކަން ދެމެހެއްޓުމަށްޓަކައި ކުރަންޖެހޭ އެންމެ މުހިންމު އެއް މަސައްކަތް ކަމަށެވެ.
މި މޭރުމުން ވާހަކަފުޅު ދައްކަވަމުން ރައީސް ވަނީ، އިދިކޮޅު ލީޑަރަކު ދާދިފަހުން ދެއްކެވި ވާހަކަފުޅުތަކަށް ރައްދު ދެއްވާފައެވެ. އެގޮތުން، ނަގާފައިވާ ދަރަނިތަކަކީ ”ވެފައި އޮތް ކަމެއް“ ކަމަށް ބަލައި، އެ ވާހަކަ ދެއްކުމުގެ ބޭނުމެއް ނެތް ކަމަށް ކުރީގެ ރައީސް އަދި އެމްޑީޕީގެ ޗެއާޕާސަން މުޙައްމަދު ނަޝީދު ދެއްކެވި ވާހަކަފުޅަށް ރައީސް އިޝާރާތް ކުރެއްވިއެވެ. ރައީސް ވިދާޅުވީ ދަރަނި އަދާނުކޮށް ދޫކޮށްލުމަކީ ޤައުމަށް އޭގެ ނޭދެވޭ އަސަރު ސީދާގޮތުން ކުރާނެ ކަމެއް ކަމަށެވެ.
”ދަރަނި ދެއްކުމަކީ ރާއްޖެއަށް އިތުރު އެހީ ހޯދުމަށާއި، ބައިނަލްއަޤްވާމީ އިންވެސްޓަރުންގެ އިތުބާރު ހޯދުމަށް ކޮންމެހެން ބޭނުންތެރި ކަމެއް. މީގެ ސަބަބުން ރާއްޖޭގެ ރިޒާވް ރަނގަޅުވެ، އޭގެ ސީދާ ފައިދާ އާންމު ރައްޔިތުންނަށް ކުރާނެ،“ ރައީސް ވިދާޅުވިއެވެ.
ރައީސް އިތުރަށް ފާހަގަކުރެއްވި ގޮތުގައި، މިހާރު ހުރި ދަރަނިތަކަކީ ރައްޔިތުންގެ ހަރުމުދާ މޯގޭޖްކޮށްގެން ނަގާފައިވާ ދަރަނިތަކެކެވެ. އެހެންކަމުން، ސަރުކާރުން މަސައްކަތް ކުރަމުންދަނީ ކޮންމެ ރައްޔިތެއްގެ ބޮލަށް ޖެހޭ ދަރަނީގެ ނިސްބަތް ކުޑަކުރުމަށެވެ. ދަރަނިތައް ނުދެއްކިއްޖެނަމަ ޤައުމުގެ އިޤްތިސާދަށް ބޮޑު ހީނަރުކަމެއް އަންނާނެ ކަމަށާއި، އެއީ ޤައުމުގެ މިނިވަންކަމަށްވެސް އޮތް ނުރައްކަލެއް ކަމަށް އެމަނިކުފާނު ވިދާޅުވިއެވެ.
ރައީސް ޑރ. މުޢިއްޒު ވިދާޅުވީ، އިޤްތިސާދީ މިނިވަންކަން ދިފާއުކުރުމަކީ މި ސަރުކާރުގެ އެންމެ އިސް އެއް އަމާޒު ކަމަށާއި، ދަރަނިތައް މެނޭޖްކޮށްގެން ނޫނީ އެ މިނިވަންކަން ކަށަވަރު ނުކުރެވޭނެ ކަމަށެވެ.
