ފުލުހުންނާއި ފުލުހުންގެ އާއިލާތަކަށް ދާއިމީ ބޯހިޔާވަހިކަން ކަށަވަރުކޮށްދިނުމަކީ މި ސަރުކާރުގެ އަމާޒު ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ، ފުލުހުންގެ 93 ވަނަ އަހަރީ ދުވަސް ފާހަގަކުރުމަށް ސޯޝަލް ސެންޓަރުގައި ބޭއްވި ޖަލްސާގައި ވާހަކަފުޅުދައްކަވަމުންނެވެ. އެމަނިކުފާނު ވިދާޅުވީ، ފުލުހުންނަށް އަމާޒުކޮށްހގެން ބޯހިޔާވަހިކަމުގެ މަޝްރޫއުތައް ކުރިއަށްގެންދިއުމަކީ އަމާޒެއް ކަމަށާއި މި ސަރުކާރުން އެކަން ކޮށްދެއްވާނެ ކަމަށެވެ.
ރައީސް ވިދާޅުވީ، ސިފައިންނާއި ފުލުހުން ކުރަނީ ވަރުގަދަ ގައުމީ މަސައްކަތްތަކެއް ކަމަށްވުމުން އަސާސީ ބޯހިޔާވަހިކަމުގައި ސަރުކާރުގެ ސިޔާސަތުތައް ތަންފީޒުކުރުމުގައި އިސްކަންދިނުމަކީ އެންމެ އިންސާފުވެރި ގޮތް ކަމަށެވެ. އަލަށް ފަށާ ބޯހިޔާވަހިކަމުގެ މަޝްރޫއުތަކުގައި ސިފައިންނާއި ފުލުހުންނަށް ކަނޑައަޅާފައިވާ އަދަދަށްވުރެ އިތުރަށް ކުރިއަށް އޮތް ތަނުގައި ބޯހިޔާވަހިކަން ކަނޑައެޅުމަކީ ސަރުކާރުގެ ސިޔާސަތު ކަމަށް ރައީސް ވަނީ ވިދާޅުވެފައެވެ.
”ކުރިއަށް އޮތް ދުވަސްތަކުގައި ބޯހިޔާވަހިކަމުގައި ވެސް އިތުރު ފަހި ފުރުސަތުތައް ފުލުހުންނަށާއި ފުލުހުންގެ އާއިލާތަކަށް ހޯދައިދިނުމަކީ އަޅުގަނޑުމެންގެ ސިޔާސަތު. އެކަމުގައި އަމަލީ ގޮތުން ރަނގަޅު ނަތީޖާތަކެއް އިރާދަކުރެވިއްޔާ ގެނެސްދޭނަން،“ – ރައީސް ވިދާޅުވިއެވެ.
ފާހަގަކޮށްލަންޖެހޭ ގޮތުގައި މި ސަރުކާރުން އަންނަނީ ސިފައިންނާއި ފުލުހުންނަށް އަމާޒުކޮށްގެން މުހިއްމު އެތައް މަސައްކަތްތަކެއް ކުރަމުންނެވެ. އެގޮތުން އެ ފަރާތްތަކަށް ފޯރުކޮށްދޭންޖެހޭ ރައްކާތެރިކަމާއި، ބޯހިޔާވަހިކަމުގެ މަޝްރޫއުތަކުގެ އިތުރުން މުސާރައާއި އިނާޔަތްތަކަށް ރަނގަޅު ބަދަލެއް ގެނެސްދިނުން ހިމެނެއެވެ.
