ބިންވެރިޔާ ސްކީމްގެ ދަށުން ގޯތި ލިބުމަށް ޝަރުތު ފުރިހަމަވި އެންމެހާ ފަރާތްތަކަށް ގޯތި ދޫކުރާނެކަމުގެ ޔަގީންކަން ހައުސިންގ، ލޭންޑް އެންޑް އަރބަން ޑިވެލޮޕްމަންޓްއިން ދީފިއެވެ.
ހައުސިންގ މިނިސްޓްރީން މިއަދު ނެރުނު ނޫސް ބަޔާނެއްގައި ބުނީ މާލޭގެ ރައްޔިތުންނަށް ގޯތި ދޫކުރުމަށް ހިންގުނު ބިންވެރިޔާ ސްކީމްގެ ދަށުން ބަންޑާރަ ގޯތި ލިބުނު ފަރާތްތަކަށް، ލިބިފައިވާ ގޯތިތައް މި ސަރުކާރުން ހަވާލުނުކުރާނެ ކަމަށް ބުނެ ބައެއް ސިޔާސީ ފަރާތްތަކުން ހަގީގަތާ ހިލާފު ވާހަކަ ފަތުރަމުންދާތީ، މި ސްކީމްގެ ދަށުން ގޯތި ލިބިފައިވާ ފަރާތްތަކުގެ ޝަކުވާތައް އެ މިނިސްޓްރީއަށް ލިބެމުން އަންނަ ކަމަށެވެ.
ސަރުކާރުން މީގެ ކުރިން ވެސް ބަޔާންކޮށްފައިވާ ފަދައިން، ބިންވެރިޔާ ސްކީމްގެ ދަށުން ގޯތި ލިބިފައިވާ ފަރާތްތަކަށް ލިބިފައިވާ ގޯތިތައް އެ ފަރާތްތަކާ، ވީ އެންމެ އަވަސް މުއްދަތެއްގެ ތެރޭގައި ހަވާލުކޮށް ނިންމުމުގެ މަސައްކަތް ކުރަމުން އަންނަ ކަަމަށް ހައުސިންގ މިނިސްޓްރީން ބުނެއެވެ.
”މި މަސައްކަތް ކުރަމުންދާއިރު، ގޯތިތައް ލިބިފައިވާ ފަރާތްތަކަށް އިތުރު ޔަގީންކަމެއް ދިނުމުގެ ގޮތުން މި ސަރުކާރުން ލިޔުމެއް ހޯދުމަށް ގިނަ ފަރާތްތަކަކުން އެދެމުންދާތީ، ގޯތި ލިބުމަށް ޝަރުތު ފުރިހަމަވި އެންމެހާ ފަރާތްތަކަށް ގޯތި ދޫކުރާނެކަމުގެ ޔަގީންކަން ދިނުމުގެ ގޮތުން ގެދޮރުވެރިކަމާއި ބިމާއި އުމްރާނީ ތަރައްގީ އާ ބެހޭ ވަޒީރު ޑރ. ޢަލީ ޙައިދަރު އަޙްމަދު ސޮއިކުރައްވައި 8 އޭޕްރިލް 2024 ގައި ހިޔާވަހި ޕޯޓަލް މެދުވެރިކޮށް ”ގޯތި ލިބިފައިވާ ކަމުގެ ލިޔުން“ ވާނީ ދޫކޮށްފައެވެ،“ ހައުސިންގ މިނިސްޓްރީގެ ބަޔާނުގައިވެއެވެ.
ހައުސިންގ މިނިސްޓްރީން ވަނީ ބިންވެރިޔާ ސްކީމްގެ ދަށުން އެ މިނިސްޓްރީން ދޫކޮށްފައިވާ ގޯތީގެ ރަޖިސްޓްރީ އާއި ގޯތި ލިބިފައިވާ ކަމުގެ ލިޔުމުގައި ބަޔާންކޮށްފައިވާ ކަންކަމަށް ސަރުކާރުން ފުރިހަމައަށް އިހުތިރާމްކޮށް، އެ ލިޔުންތަކުގައި ބަޔާންކޮށްފައިވާ ކަންކަމާ އެއްގޮތަށް އަމަލުކުރާނެކަމުގެ ޔަގީންކަން ދީފައެވެ. އަދި ގޯތި ލިބުމަށް ޝަރުތު ފުރިހަމަވި އެންމެހާ ފަރާތްތަކަށް ގޯތި ދޫކުރާނެކަމުގެ ޔަގީންކަން ވެސް ދޭ ކަމަށް އެ މިނިސްޓްރީން ނެރުނު ބަޔާނުގައި ބުނެފައިވެއެވެ.
ގޯތި ލިބޭނެ ކަމުގެ ޔަގީންކަން އަނެއްކާވެސް ދީފައިވާއިރު، ގިރާވަރުފަޅުން ދޫކުރި 1،347 ގޯތި، ގުޅީފަޅަށް ބަދަލުކުރަން ނިންމާފައިވާ ކަމަށް މިފަހުން ސަރުކާރުން ވަނީ ހާމަކޮށްފައެވެ.
ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ދޫކޮށްފައި ވަނީ އެ ސަރަހައްދަށް ކޮންމެހެން ބޭނުންވާ މުހިންމު ހިދުމަތްތަކަށް އެކަށީގެންވާ ވަރަށް ބިން އެކަށައެޅުމެއް ނެތި ކަމަށް ހައުސިންގ މިނިސްޓްރީން މީގެ ކުރިން ވަނީ ބުނެފައެވެ. އެ މިނިސްޓްރީން ބުނެފައިވާ ގޮތުގައި އެ ހިދުމަތްތަކާ އެކު ގިރާވަރުފަޅުގެ ލޭންޑް ޔޫސް ޕްލޭނަށް ބަދަލު ގެނައުމުން ގިރާވަރުފަޅުން ބިން ދޫކޮށްފައިވާ އަދަދަށް ގޯތި ނުނެގޭތީ ގިރާވަރުފަޅުން ދޫކޮށްފައިވާ ބައެއް ގޯތިތައް ބަދަލުކުރުމަށް ހަމަޖެހިފައި ވަނީ ގުޅީފަޅަށް ކަމުގައެވެ.
ގުޅީފަޅަށް ގޯތި ބަދަލުކުރަން މި މަހުގެ 14 ވަނަ ދުވަހާ ހަމައަށް، ހިޔާވަހި ޕޯޓަލް މެދުވެރިކޮށް ހުށަހެޅުމުގެ ފުރުސަތު ވެސް އެ މިނިސްޓްރީން ވަނީ ހުޅުވާލާފައެވެ. ހައުސިންގ މިނިސްޓްރީން ބުނެފައި ވަނީ ބަދަލުކުރުމަށް ހަމަޖެހިފައިވާ އަދަދަށް ވުރެ ބަދަލުވާން ހުށަހަޅާ ފަރާތްތަކުގެ އަދަދު އިތުރުވާނަމަ ގުޅީފަޅުން ގޯތި ލިބޭ ފަރާތްތައް ކަނޑައަޅާނީ ގުރުއަތުން ކަމަށާއި ގުރުއަތު ނެގުން އޮންނާނެ ތާރީހެއް ފަހުން އާންމުކޮށް އިއުލާނު ކުރާނެ ކަމަށެވެ.
