ފަހި ދިރިއުޅުން ކޯޕަރޭޝަން (އެފްޑީސީ) އިން އިމާރާތްކުރާ ފްލެޓްތަކުގެ ރަޖިސްޓްރީ ކަންތައްތަކުގައި މާލެ ސިޓީ ކައުންސިލުން ރައްޔިތުންނަށް ޚިދުމަތް ނުދީ ބަހަނާ ދައްކަމުންދާ ކަމަށް ބުނެ، އެ ކޯޕަރޭޝަންގެ މެނޭޖިންގ ޑިރެކްޓަރު ހަމްދާން ޝަކީލް، ކައުންސިލަރު ފާތިމަތު ޒަހިއްޔާއަށް ވަރުގަދަ ރައްދެއް ދެއްވައިފިއެވެ.
މި މައްސަލަ ބޮޑުވެފައިވަނީ ހުޅުމާލެ އުތުރު ދާއިރާގެ މާލެ ސިޓީ ކައުންސިލް މެންބަރު ފާތިމަތު ޒަހިއްޔާ، އެފްޑީސީން ސިޓީ ކައުންސިލަށް އެއްބާރުލުން ނުދޭ ކަމަށް ބުނެ ސޯޝަލް މީޑިއާގައި ސަރުކާރަށް ފާޑުވިދާޅުވުމާ ގުޅިގެންނެވެ. ޒަހިއްޔާ ތުހުމަތު ކުރެއްވި ގޮތުގައި، ފްލެޓްތަކުގައި ރަޖިސްޓްރީވުމަށް އެދި ހުށަހަޅާ ފަރާތްތަކުގެ މަސައްކަތް ލަސްވަނީ އެފްޑީސީން ދޭންޖެހޭ މަޢުލޫމާތުތައް ނުލިބޭތީއެވެ. އަދި އެ ކޯޕަރޭޝަނަށް ފޮނުވި ސިޓީއަކަށް ޖަވާބު ނުލިބޭ ކަމަށްވެސް އޭނާ ވިދާޅުވިއެވެ.
ޒަހިއްޔާގެ މި ވާހަކަތަކާ ގުޅިގެން ”އެކި އެމްވީ“ އިން ކުރި ސުވާލަކަށް ޖަވާބު ދެއްވަމުން ހަމްދާން ޝަކީލް ވަނީ ކައުންސިލުން ދައްކާ ބަހަނާތަކުގެ ހަގީގަތް ހާމަކޮށްދެއްވާފައެވެ. ހަމްދާން ވިދާޅުވީ މާލެ އާއި ހުޅުމާލޭގެ ހުރިހާ ތަނެއްގައިވެސް ރަށްވެހިކަން ޖެއްސުމަށް ބޭނުންވަނީ އިމާރާތުގެ ވެރިފަރާތުގެ އިއުތިރާޒެއް ނެތް ކަމުގެ ލިޔުމެއް ކަމަށާއި، އެފްޑީސީގެ ފްލެޓްތަކުގެ ކުލީވެރިންނަށް ބޭނުންވާ އެފަދަ ލިޔުންތައް މިހާރު ދޫކޮށްފައިވާނެ ކަމަށެވެ.
”ކައުންސިލަށް އެ ލިޔުންތަކުގެ ސައްހަކަން ކަށަވަރު ކުރެވޭނެ އިންތިޒާމުތައް ވަނީ ހަމަޖައްސާފައި. ކިއުއާރް (QR) ކޯޑެއް މެދުވެރިކޮށް ލިޔުންތައް ވެރިފައި ކުރެވޭނެ. އަދި މިކަމަށް ޚާއްޞަ ފޯކަލް ޕޮއިންޓެއްވެސް ވާނީ ކަނޑައަޅާފައި،“ ހަމްދާން ވިދާޅުވިއެވެ.
ހަމްދާން އިތުރަށް ފާހަގަކުރެއްވި ގޮތުގައި، ޚިދުމަތް ދިނުމަށް ބޭނުންވާ ހުރިހާ އިންތިޒާމެއް ހަމަޖެހިފައި ވަނިކޮށް، ސިޓީ ކައުންސިލުން އެ މަސައްކަތް ނުކޮށް ހިފަހައްޓަނީ ރައްޔިތުންނަށް އޮޅުވާލުމަށްޓަކައެވެ. އަދި މިއީ ޚިދުމަތް ނުދީ ހުރުމަށްޓަކައި ކައުންސިލުން ދައްކާ ބަހަނާއެއް ކަމަށް ދޭހަވާ މޭރުމަކުން އޭނާ ވަނީ ފާޑުވިދާޅުވެފައެވެ.
މި މައްސަލައިގައި ޒަހިއްޔާ ގޮވާލާފައިވަނީ ރައްޔިތުންނަށް ދޮގު މައުލޫމާތު ނުފެތުރުމަށެވެ. ނަމަވެސް އެފްޑީސީގެ އެމްޑީގެ ޖަވާބުން އެނގެނީ ކައުންސިލަށް ބޭނުންވާ ހުރިހާ ވަސީލަތްތަކެއް ފޯރުކޮށްދީފައިވާ ކަމެވެ. މިކަމުގެ ސަބަބުން ގިނަ އަދަދެއްގެ ރައްޔިތުންނަށް ރަޖިސްޓްރީވުމުގައި ދަތިތަކާ ކުރިމަތިލާންޖެހި، ސިޓީ ކައުންސިލުން މިވަނީ ބަހަނާ ދައްކަން ފަށާފައެވެ.
