ހިމަބިހީގެ އިތުރު ކޭސްތަކެއް ވެރިރަށް މާލެއިން ފެނިފައިވާތީ ބަލި ފެތުރުން ކޮންޓްރޯލް ކުރުމަށް ހާއްސަ ވެކްސިން ދިނުމުގެ ޕްރޮގްރާމެއް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން މިއަދު ފަށައިފިއެވެ.
އެޗްޕީއޭއިން މީޑިއާތަކާ ހިއްސާކުރި މައުލޫމާތުގައި ބުނީ އެ ޕްރޮގްރާމްގެ ތެރެއިން މިހާރު ފުރަތަމަ ޓާގެޓް ގުރޫޕަށް ވެކްސިން ދެމުން އަންނަ ކަމަށެވެ. އެއީ ސިއްހީ ހިދުމަތްދޭ ފަރާތްތަކާއި 18 އަހަރުން ދަށުގެ ކުދިންގެ ތެރެއިން ވެކްސިން ޑޯޒް ފުރިހަމަ ކޮށްފައި ނުވާކުދިންނަށް ކަމަށް އެޗްޕީއޭއިން ބުންޏެވެ.
ހިމަ ބިހީގެ އަލާމާތެއް ފެނިއްޖެނަމަ، ލަސް ނުކުރައްވާ ޞިއްޙީ ފަރުވާ ހޯދާ!#measles pic.twitter.com/WHRv0fWxDQ
— Health Protection Agency (@HPA_MV) May 14, 2026
ވެކްސިން ދިނުމުގެ ދެވަނަ ޓާގެޓް ގްރޫޕަކީ އުމުރުން 30 އަހަރުން ދަށުގެ، ވެކްސިންގެ ދެވަނަ ޑޯޒް ފުރިހަމަކޮށްފައިވާ ފަރާތްތަކެވެ. އެ ގްރޫޕަށް ވެކްސިން ދިނުމުގެ މަސައްކަތް ޖޫން މަހުގެ 30 ވަނަ ދުވަހުން ފެށިގެން ކުރިއަށް ގެންދިއުމަށް އެޗްޕީއޭއިން ތައްޔާރުވަމުން އަންނައިރު، 49 އަހަރުން ދަށުގެ ވެކްސިން ފުރިހަމަ ނުކުރާ ފަރާތްތަކަށް ވެކްސިން ދިނުމުގެ ތިންވަނަ މަރުހަލާއެއް ކުރިއަށް ގެންދިއުމަށްވެސް އެޗްޕީއޭ އޮތީ ތައްޔާރަށެވެ.
ބައްޔަށް ޕޮޒިޓިވްވި މީހުންގެ ކޮންޓެކްޓުންގެ ތެރެއިން ވެކްސިން ދެ ޑޯޒް ފުރިހަމަކޮށްފައިނުވާ ފަރާތްތަކަށް ވެކްސިން ދިނުމުގެ މަސައްކަތް ދަނީ ކުރެވެމުން. މިހާތަނަށް 220 ކޮންޓެކްޓުންނަށްވަނީ ވެކްސިން ދެވިފައި. ފުރަންޓްލައިންގައި މަސައްކަތް ކުރައްވާ ސިއްހީ ހިދުމަތްތެރިންގެ ތެރެއިން 1537 ފަރާތަށް ވަނީ ވެކްސިން ދެވިފައި. އެޗްޕީއޭ
ވޭތުވެދިޔަ ހަފްތާގައި މާލެ ސަރަހައްދުން ފެނުނު ހިމަބިހީގެ ދެ ކޭސްއާ އެކު މިއަހަރުގެ މިހާތަނަށް ހިމަބިހީގެ ޖުމްލަ 22 ކޭސް ރިޕޯޓް ކުރެވިފައިވެއެވެ. އެޗްޕީއޭއިން ބުނި ގޮތުން ހިމަބިއްސަށް ޕޮޒިޓިވްވި މީހުންގެ ތެރެއިން ގިނައީ 18 އަހަރުން މަތީގެ މީހުންނެވެ. މީގެ ތެރޭގައި ގިނައީ ދިވެހިން ކަމަށެވެ.
އެޗްޕީއޭއިން ބުނީ މިހާތަނަށް ޖުމްލަ 543 ކޮންޓެކްޓުން ފާހަގަކުރެވިފައވާ ކަމަށާއި، އޭގެ ތެރެއިން އެކްޓިވް 173 ކޮންޓްކްޓުން މޮނިޓާކުރެވެމުންދާ ކަމަށެވެ.
