އުރުދުން އަތުން 3-1 އިން ފަސޭހަ މޮޅެއް ހޯދައި، ސައްތައިން ސައްތަ ރެކޯޑަކާ އެކު އާޖެންޓީނާ ވޯލްޑް ކަޕްގެ ގުރޫޕް ސްޓޭޖް ނިންމާލައިފި އެވެ.
މި މުބާރާތުގެ ގުރޫޕް ޖޭ ގެ އެއްވަނަ މަގާމު ކުރިންވެސް ކަށަވަރުވެފައި އޮތުމުން، އާޖެންޓީނާގެ ކޯޗު ލިއޮނަލް ސްކޮލޯނީ ވަނީ ފުރަތަމަ އެގާރައަށް ބޮޑެތި ބަދަލުތަކެއް ގެނެސްފަ އެވެ. ކުރިން ކުޅުނު ދެ މެޗުގެ ފުރަތަމަ އެގާރައާ އަޅާބަލާއިރު ނުވަ ބަދަލެއް ގެނެސް، ކެޕްޓަން ލިއޮނަލް މެސީ ވެސް ބެންޗުގައި ބޭންދި އެވެ. ނަމަވެސް، މި ބަދަލުތަކާ އެކު ވެސް އާޖެންޓީނާގެ ފަރާތުން ފެނުނީ ހަމަޖެހޭ އަދި ކުޅުންތެރި ކުޅުމެކެވެ. މެޗުގެ ފުރަތަމަ ހާފު ނިމުނުއިރު އެ ޓީމުން ވަނީ ދެ ލަނޑުގެ ލީޑެއް ނަގައިފަ އެވެ.
މެޗުގެ 19 ވަނަ މިނެޓުގައި ލިބުނު ހިލޭ ޖެހުމަކުން ޖިއޮވާނީ ލޮ ސެލްސޯ އާޖެންޓީނާއަށް ފުރަތަމަ ލަނޑު ކާމިޔާބުކޮށްދިނެވެ.
އޭގެ ފަހުން ލިބުނު ޕެނަލްޓީއަކުން ލައުޓާރޯ މާޓިނޭޒް ވަނީ ދެވަނަ ލަނޑު ޖަހައިފަ އެވެ. މިއީ މާޓިނޭޒް ވޯލްޑް ކަޕްގައި ޖެހި ފުރަތަމަ ލަނޑެވެ. އުރުދުންއިން ފަރަގު ކުޑަކުރީ 54 ވަނަ މިނެޓުގައި މޫސާ އަލް ތަމަރީ ޖެހި ލަނޑުންނެވެ. މެޗުގެ ފަހު ހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނުކުމެ މެސީ ވަނީ އާޖެންޓީނާގެ ތިންވަނަ ލަނޑު ޖަހައިދީފަ އެވެ. މިއީ މި ފަހަރުގެ މުބާރާތުގައި މެސީ ޖެހި ހަވަނަ ލަނޑު ކަމަށްވާއިރު، ވޯލްޑް ކަޕްގެ ތާރީހުގައި އޭނާ ކާމިޔާބުކުރި 19 ވަނަ ލަނޑެވެ.
މި މޮޅާ އެކު އާޖެންޓީނާ އަކީ މުބާރާތުގައި ކުޅުނު ހުރިހާ މެޗަކުން މޮޅުވެގެން ދެވަނަ ބުރަށް ދަތުރުކުރި ތިން ޓީމުގެ ތެރެއިން އެއް ޓީމެވެ. އަނެއް ދެ ޓީމަކީ ފްރާންސާއި މެކްސިކޯ އެވެ. އާޖެންޓީނާ ދެވަނަ ބުރުގައި ނުކުންނާނީ ކޭޕް ވާޑޭއާ ދެކޮޅަށެވެ. އެފްރިކާ ބައްރުގެ ކުޑަކުޑަ ގައުމުން ވަނީ ވޯލްޑް ކަޕްގައި އެ ޓީމުގެ ފުރަތަމަ މެޗުގައި ވަރުގަދަ ސްޕެއިން ހުއްޓުވައި، އެ މެޗުން އެއްވަރުކޮށްފަ އެވެ.
