ކުރީގެ ތިން ރައީސުން ކަމަށްވާ މުހައްމަދު ނަޝީދާއި އަބްދުﷲ ޔާމީން އަބްދުލްގައްޔޫމް އަދި އިބްރާހިމް މުހައްމަދު ސޯލިހު ޤައުމީ މަސްލަހަތަށްޓަކައި ޤައުމާ ރައްޔިތުންނާއި، ނޫސްވެރިންގެ ޙައްޤުގައިކަމަށްބުނެ އެކުވެގެން މަސައްކަތްކުރަން ފެށި ނަމަވެސް، އެ މަސައްކަތްތަކުގެ އެއްވެސް ތަފްސީލެއް އަދި ނަތީޖާއެއް މިއަދާއި ހަމަޔަށް އައިއިރުވެސް އާންމުންނާ ހިއްސާކޮށްފައި ނުވުމަކީ ބޮޑު ކަންބޮޑުވުމެކެވެ.
ޤައުމީ މުހިންމު މައްސަލަތަކެއްގައި ކުރީގެ ތިން ރައީސުން އެކުގައި މަޝްވަރާތަކެއް ކުރަމުންދާ ކަމަށް ވިދާޅުވެ ބޮޑު ނޫސްވެރިންގެ ބައްދަލުވުމެއް ބޭއްވުމަށްފަހު އެކަން ހިނދިއްޖެއެވެ. ގުޅިގެން ބޮޑު ޤައުމީ މަސައްކަތެއް ކުރާކަމަށް މީޑިއާތައް މެދުވެރިކޮށް ރައްޔިތުންނަށް ހިއްސާކުރުމަށްފަހު، މި ބައްދަލުވުންތަކުގެ އެޖެންޑާއެއް ނުވަތަ އޭގެ ސަބަބުން ޤައުމަށް ލިބޭނެ ފައިދާއާ ގުޅޭ އެއްވެސް މައުލޫމާތެއް ރަސްމީކޮށް ހާމަކޮށްފައެއް ނުވެއެވެ. އާންމު ރައްޔިތުންނަށް މި މަސައްކަތްތަކަކީ ހަމައެކަނި ސިޔާސީ ސިއްރު ބައްދަލުވުންތަކެއްގެ ގޮތުގައި ފެންނަމުންދާއިރު، އެއްވެސް ކަހަލަ ހާމަކަން ބޮޑު ނިޒާމެއް ނެތުމުން، މި މަސައްކަތްތަކުގެ އަގު ވަޒަންކުރަން ދަތިވެފައިވެއެވެ.
ތިން ރައީސުން އެކުގައި ކުރައްވާ މަސައްކަތްތައް ހާމަކުރަން މީޑިއާ ގްރޫޕެއް ހަދައިފައި އޮތް ނަމަވެސް އެ ގްރޫޕުގައި ތިން ރައީސުން ބައްދަލުކުރެއްވިކަން ފިޔަވައި މާ ބޮޑު ތަފްސީލެއް އެނގޭކަށް ނެތެވެ. ކުރެއްވި މަސައްކަތެއް، މަޝްވަރާއެއް ފެންނާކަށް ނެތެވެ.
’އެކިއެމްވީ‘ އިން މިކަމާ ގުޅިގެން 2 ފަހަރެއްގެ މަތިން ސުވާލުކުރުމުންވެސް މި ތިން ރައީސުން ގުޅިގެން ކުރެވުނު އެއްވެސް މަސައްކަތެއްގެ ތަފްސީލެއް އެބޭފުޅުންގެ މީޑިއާ ޓީމުން ހިއްސާކޮށްފައިނުވެއެވެ.
މި ތިން ބޭފުޅުންނަކީ މީގެ ކުރިން މުޅިން ތަފާތު ސިޔާސީ ފިކުރުތަކެއްގައި ޤައުމު ހިންގެވި ބޭފުޅުންނެވެ. އެ ބޭފުޅުންގެ ސިޔާސީ ވިސްނުންފުޅުތަކަކީ އުޑާ ބިމާހާ ތަފާތު ކަންކަން ކަމަށް ސިޔާސީ ދިރާސާކުރާ ފަރާތްތަކުން ދެކެއެވެ. ޑިމޮކްރެސީއާއި އިގްތިސާދީ ސިޔާސަތުތަކުގެ އިތުރުން ޤައުމީ ސިޔާސަތުތަކުގައި މި ބޭފުޅުންގެ މެދުގައި އޮތް ބޮޑެތި ހިޔާލުތަފާތުވުންތައް އެއްފަރާތްކޮށް، ޤައުމީ މަސައްކަތެއްގައި އެއްބަސްވުމަކަށް އައުމަކީ އާންމުންނަށް ގަބޫލުކުރަން ދަތި ކަމަކަށް ވަނީ ވެފައެވެ. މި ތަފާތުކަމުގެ ސަބަބުން އެ ބޭފުޅުންގެ މަޝްވަރާތަކުން ނަތީޖާއެއް ނުނުކުންނަނީ ކަމަށް ގިނަ ބަޔަކު ދެކެއެވެ.
ތިން ރައީސުން އެއް މޭޒެއްގައި އިށީނީ ރައްޔިތުން އުންމީދު ކުރީ ޤައުމަށް ދިމާވެފައިވާ ބޮޑެތި މައްސަލަތަކަށް ދާއިމީ ހައްލެއް ހޯދުމުގެ ވައުދާއެކުގައެވެ. ނަމަވެސް، ހޭދަވެގެންދިޔަ މުއްދަތުގެ ތެރޭގައި އެ ބައްދަލުވުންތަކުން ނެރުނު އެއްވެސް ރިޕޯޓެއް ނުވަތަ އެއްބަސްވުމެއް ފެންނަން ނެތުމަކީ މި މަސައްކަތުގެ އިތުބާރު ކުޑަވެގެންދިޔަ ކަމެކެވެ. އަނެއްކާ މިވެސް ސިޔާސީ ”ސްޓަންޓް“ އެއް ހެއްޔެވެ؟ ނޫނީ ވެރިކަމުގެ ދަހިވެތިކަމުގައި ސަރުކާރާ ދެކޮޅަށް ބަޣާވާތް ކުރަން ރޭވި ރޭވުން 3 މީހުން 3 ފަރާތަށް މޫނު އަނބުރައިން ތިބެން ހަދައިގެން ޗޮކުން ދިޔައީ ނޫންބާވައެވެ؟ ކޮންމެއަކަސް މި ތިން ވެރިންގެ ޤައުމީ މަސައްކަތުގެ ތަފްސީލަކަށް ގިނަ ރައްޔިތުންތަކެއް ވަރަށް އުންމީދު ކުރާނެއެވެ.
