ނޫމަޑި މައްސަލައިގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކޯޓުން ސަލާމާތްވެވަޑައިގަތީ ފަނޑިޔާރަކަށް ރިޝްވަތު ދެއްވައިގެން ކަމަށް ބުނެ ކުރީގެ ކޮމިޝަނަރ އޮފް ޕޮލިސް ޙުސައިން ވަހީދު ދެއްކި ވާހަކަތަކަށް ސަރުކާރުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) ވަރުގަދަ ރައްދެއް ދެއްވައިފިއެވެ.
ޙުސައިން ވަހީދު ދެއްކި ވާހަކަތަކަށް ރައްދު ދެއްވަމުން މުންދު ވިދާޅުވީ، އެއީ އެއްވެސް ހަގީގަތެއް ނެތް ދޮގު ވާހަކަތަކެއް ކަމަށާއި، ރައީސް މުއިއްޒަކީ އެފަދަ ކަމެއް ދުވަހަކު ވެސް ކުރައްވާނެ ބޭފުޅެއް ނޫން ކަމަށެވެ. ޙުސައިން ވަހީދު ތުހުމަތުކުރާ ގޮތުގައި، ނޫމަޑި މައްސަލައިގައި ރައީސް މުޢިއްޒު ސަލާމަތްވެވަޑައިގަތީ ވަކީލަށް 800،000 ރުފިޔާގެ ރިޝްވަތު ދެއްވުމުން ކަމަށެވެ.
ރައީސް މުޢިއްޒު ވަކީލަށް ރިޝްވަތުދެއްވި ކަމަށް ކީރިތި ގުރުއާނުގައި އަތްލައްވައި ހުވާކުރަން ތައްޔާރު ކަމަށް ވެސް ޙުސައިން ވަހީދު ބުނެފައިވެއެވެ. މިކަމާ ގުޅިގެން މުންދު ވަނީ އެ ހުވާ ކުރައްވައިފިނަމަ ދައުލަތުގެ ކަމާބެހޭ މުއްސަސާތަކުން އެކަން ބަލައި ފިޔަވަޅު އަޅަންޖެހޭ ފަރާތްތަކާ މެދު ފިޔަވަޅު އަޅާނެ ކަމަށް ވިދާޅުވެފައެވެ.
ނޫމަޑި މައްސަލަ ހިނގި ދުވަސްވަރު ހުންނެވީ ރައީސުލްޖުމްހޫރިއްޔާގެ އޮފީހުގެ މިނިސްޓަރަކަށްކަން ފާހަގަކުރައްވައި މުންދު ވިދާޅުވީ، އެ މައްސަލައިގައި ރައީސް މުއިއްޒުގެ އެއްވެސް ކުށެއް ނެތްކަން ވަރަށް ރަނގަޅަށް އެނގިވަޑައިގަންނަވާ ކަމަށެވެ. ހަމައެހެންމެ ރައީސް މުޢިއްޒަކީ ދުވަހަކު ވެސް ވައްކަން ކުރައްވާނެ ބޭފުޅެއް ނޫން ކަމަށް މުންދު ވަނީ ތަކުރާރުކޮށް ވިދާޅުވެފައެވެ.
