ޚަޠީބުން ތަމްރީނުކުރުމުގެ މަސައްކަތް މިއަދު ނުކޮށްފިނަމަ ހީ ނުކުރާވަރުގެ ބޮޑު ގެއްލުމަކާ ކުރިމަތިލާންޖެހިދާނެ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ޒުވާން ޚަޠީބުން ތަމްރީނުކުރުމުގެ ހަތަރު ވަނަ ބުރުގެ ނިމުން ފާހަގަކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރު ވަނީ ޚަޠީބުން ބިނާކުރުމުގެ މަސައްކަތަކީ މިއަދު ކޮންމެހެން ކުރަންޖެހޭ މުހިންމު މަސައްކަތެއްކަން ފާހަގަކުރައްވައިފައެވެ. ރާއްޖޭގެ ރަށްތަކުގައި އިމާމުން މަދުވުމާއި ހުތުބާ ކިޔާނެ މީހުން ނެތުމުގެ މައްސަލަ އިތުރުވަމުން އަންނަ ކަމަށާއި، އެކަމަށް ހައްލު ހޯދައިދިނުމަށް މިނިސްޓްރީން ގިނަ މަސައްކަތްތަކެއް ކުރަމުން އަންނަ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވި ގޮތުގައި ޚަޠީބުންނަކީ ތަފާތު މާތް ބައެއް ކަމަށެވެ. ކަން މިހެން އޮތުމާއެކު ފޭރާން އެޅުމާއި ސުލޫކާއި، މުއާމަލާތުކުރުމުގައްޔާއި އެހެނިހެން ގޮތްގޮތުން ވެސް ޚަޠީބުން ވާންޖެހޭނީ އެހެންމީހުންނަށް ނަމޫނާ ދައްކާ ބަޔަކަށް ކަމަށް މިނިސްޓަރު ވިދާޅުވިއެވެ. ހަމައެހެންމެ، ވަގުތަށް ކަމޭހިތުމާއި، ފަރުވާތެރިވުމާއި، ހުތުބާ ކިޔުމުގެ ކުރިން އެކަމަށް ފަރިތަކޮށް ތައްޔާރުވުމުގެ އިތުރުން ހުތުބާ ކިޔާއިރު ހަދީސްތަކާއި އާޔަތްތައް ރީތިކޮށް ތަޖުވީދުން ކިޔުމަކީ މުހިއްމު ކަމެއްކަން މިނިސްޓަރު ހަނދާންކޮށްދެއްވިއެވެ.
ހުކުރުގެ ޖަމާއަތަކީ އިސްލާމްދީނުގެ މަތިވެރިކަމާއި އެކުވެރިކަން ރަމްޒުކޮށްދޭ ހެއްކެއް ކަމަށާއި ހަމައެހެންމެ، އިސްލާމީ އަޅުކަންތައް ތަރުތީބުވެފައިވާ އުސޫލަށް ބަލާއިރު މިސްކިތުގައި ގާއިމްކުރާ ޖަމާއަތަކީ އިސްލާމީ އުއްމަތުގެ ބަދަހިކަމާއި އަހުވަންތަކަން ބަޔާންކޮށްދޭ ކަމެއް ކަމަށް މިނިސްޓަރު ފާހަގަކުރެއްވިއެވެ. އެެހެންކަމުން އެ ޖަމާއަތްތަކުގައި އިސްކޮށްތިބުމުގެ ޒިންމާއަކީ މުހިންމު އަދި މާތް ޒިންމާއެއް ކަމަށާއި އިމާމުވެ ނަމާދުކުރުމާއި ބަންގިގޮވުމަކީ ލިބޭ ޝަރަފެއް ކަމަށް ވެސް މިނިސްޓަރު ވަނީ ވިދާޅުވެފައެވެ.
ޒުވާން ޚަޠީބުންގެ ޕްރޮގްރާމްގެ ދަށުން މިހާތަނަށް 600 އަށްވުރެ ގިނަ ޒުވާނުން ސަނަދު ހޯދާފައިވާއިރު ހާފިޒުންގެ އަދަދު މިހާރު 310 އަކަށް އަރައިފައެވެ. މީގެ އިތުރުން ގުރްއާން ހިތު ދަސްކުރާ ޕްރޮގްރާމް ފުޅާކުރުމަށް ކްލާސްތައް އިތުރުކޮށްފައިވާއިރު، މި ވަގުތު 2،000 އަށްވުރެ ގިނަ ދަރިވަރުން އަންނަނީ ހިފްޒު ކުރަމުންނެވެ.
އިސްލާމިކް މިނިސްޓްރީގެ އަމާޒަކީ 1،000 ޒުވާން ޚަޠީބުން ބިނާކުރުމާއި 500 ހާފިޒުން އުފެއްދުން ކަމަށް އެ މިނިސްޓްރީން ވަނީ ހާމަކޮށްފައެވެ.
