2026 ވަނަ އަހަރުގެ ފީފާ ވޯލްޑް ކަޕްގެ ގްރޫޕް އައި (Group I) ގެ ފަހު މެޗުގައި ސެނެގާލުން 5-0 ގެ ތަފާތު ބޮޑު ނަތީޖާއަކުން އިރާގު ބަލިކޮށް، މުބާރާތުގެ ގަދަ 32 ގެ ބުރަށް ދިއުމުގެ އުންމީދު ބޮޑުކޮށްފިއެވެ.
ކެނެޑާގެ ޓޮރޮންޓޯ ސްޓޭޑިއަމްގައި ކުޅުނު މި މެޗު ސެނެގާލުން ފެށީ ވަރަށް ވަރުގަދަކޮށެވެ. މެޗުގެ 4 ވަނަ މިނެޓުގައި ހަބީބް ދިއާރާ ވަނީ ލަނޑެއް ޖަހައި ސެނެގާލަށް ކުރިހޯދައިދީފައެވެ. މި ލަނޑަކީ އިދްރިއްސާ ގޭގެ ހަމަލާއަކުން ލިބުނު ކޯނަރެއްގައި އަބްދުލާޔޭ ސެކް ބޮލުން ފޮނުވާލި ބޯޅައެއް ގޯލަށް ވައްދާލައިގެން ކާމިޔާބުކުރި ލަނޑެކެވެ.
އިރާގަށް މެޗުގައި އިތުރު ހުރަސްތަކެއް ކުރިމަތިވީ 13 ވަނަ މިނެޓުގައި އެޓީމުގެ ރެބިން ސުލާކާ، ސެނެގާލްގެ ތަރި ސާޑިއޯ މާނޭ އަށް ކުރި ފައުލަކާ ގުޅިގެން ސީދާ ރަތް ކާޑެއް ދެއްކުމުންނެވެ. މިއާއެކު އިރާގުން މެޗުގެ ބާކީ ބައި ކުޅެން ޖެހުނީ 10 ކުޅުންތެރިންނާއެކުގައެވެ.
ފުރަތަމަ ހާފުގައި ސެނެގާލަށް އިތުރު ލަނޑެއް ކާމިޔާބު ނުކުރެވުނު ނަމަވެސް، ދެވަނަ ހާފު ފަށައިގެން އެޓީމުން ވަނީ ކުޅުން އިތުރަށް ވަރުގަދަކޮށްފައެވެ. އެގޮތުން މެޗުގެ 56 ވަނަ މިނެޓުގައި ލަމީން ކަމާރާ ތަނަވަސްކޮށްދިން ފުރުސަތަކުން އިސްމާއިލާ ސާރް ވަނީ ސެނެގާލްގެ ދެވަނަ ލަނޑު ޖަހައިދީފައެވެ.
މީގެ ތިން މިނެޓު ފަހުން، ބަދަލު ކުޅުންތެރިއެއްގެ ގޮތުގައި ކުޅެން އެރި ޕާޕޭ ގޭ ވަނީ ވަރަށް ރީތި ލަނޑެއް ޖަހައި ނަތީޖާ 3-0 އަށް ބަދަލުކޮށްލާފައެވެ. އޭނާ ވަނީ 71 ވަނަ މިނެޓުގައިވެސް އިތުރު ލަނޑެއް ޖަހައި ސެނެގާލަށް ހަތަރު ލަނޑުގެ ލީޑެއް ހޯދައިދީފައެވެ. ސެނެގާލްގެ ފަސްވަނަ ލަނޑު މެޗު ނިމެން އަށް މިނެޓަށް ވެފައި ވަނިކޮށް ޖަހައިދިނީ އިލިމަން އެންޑިއާއިއެވެ.
މި ވަގުތު ތާވަލުގެ ތިންވަނަ ހޯދާ އެންމެ މޮޅު ޓީމުތަކުގެ ރޭންކިންގެ ފަސްވަނައިގައި ސެނެގާލް އޮތްއިރު، މި ނަތީޖާއާއެކު އެޓީމަށް ދެވަނަ ބުރުގެ ޖާގައެއް ލިބުމުގެ ފުރުސަތު ބޮޑެވެ. މިހާރު އޮތް ގޮތުން ދެވަނަ ބުރުގައި ސެނެގާލް ބައްދަލުކުރަން ޖެހޭނީ އިންގްލެންޑާއެވެ. އެ މެޗު ކުޅުމަށް ތާވަލުކުރެވިފައިވަނީ ޖުލައި 1 ވަނަ ދުވަހު އެޓްލާންޓާގައެވެ.
