ޖުމްހޫރީ މައިދާނުގައި ހުރި ފެންއަރުވާ ވަޑާން (ފައްވާރާ) މަރާމާތު ކުރުމަށްފަހު މިރޭ އަލުން ހުޅުވާލާނެ ކަމަށް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް މިނިސްޓަރު އާދަމް ޝަރީފް ޢުމަރު ވިދާޅުވެއްޖެއެވެ.
ޖުމްހޫރީ މައިދާނުގައި ހަލާކުވެ، ވީރާނާ ވަމުންދިޔަ ފައްވާރާ ރައީސް ޑރ. މުޙައްމަދު މުޢިއްޒުގެ ހާއްސަ އެދިވަޑައިގަތުމަށް ކުޑަ އީދުގައި އަލުން ހުޅުވުމުގެ މަސައްކަތް ކުރަމުންދާ ކަމަށް އާދަމް ޝަރީފު ވިދާޅުވެފައި ވަނީ މިދިޔަ ބުދަ ދުވަހުއެވެ.
މަރާމާތު ކުރުމަށްފަހު ފައްވާރާ ދިއްލާލާފައިވާ ވީޑިއޯއެއް ހިއްސާކުރައްވަމުން އާދަމް ޝަރީފު ވިދާޅުވި ގޮތުގައި މިރޭ 09:30 ގައި ޖުމްހޫރީ މައިދާނުގެ ފައްވާރާ އަލުން އާންމުންނަށް ހުޅުވާލާނެ ކަމުގައެވެ.
Maadhamaa rey (8th April 2024) 9.30 gai Jumhooree maidhaanuge Fen aruvaa vadaan (Favvaaraa) maraamaathukoh alun aammunnah hulhuvaalun. Inthizaarukollavvaa! pic.twitter.com/OTpZ7mSChQ
— Adam Shareef Umar (@Adamshareefz) April 7, 2024
ޖުމްހޫރީ މައިދާނަށް ބަދަލުތަކެއް ގެނެސް އެތަނުގައި ފެން އަރުވާ ވަޑާމެއް ހެދުމަށްފަހު ހުޅުވާފައި ވަނީ ރާއްޖެއަށް މިނިވަންކަން ލިބުނުތާ 50 އަހަރު ފުރުން ފާހަގަކުރުމުގެ މުނާސަބަތުގައި ކުރިއަށް ގެންދިޔަ ހަރަކާތްތަކުގެ ތެރެއިން ކުރީގެ ރައީސް ޢަބްދުﷲ ޔާމީންގެ ވެރިކަމުގައެވެ.
އެމްޓީސީސީން ފަސް މިލިއަން ރުފިޔާ ހަރަދުކޮށްގެން ހެދި މި ފެންއަރުވާ ވަޑާމަކީ 28 މީޓަރު ފުޅާ އަދި 28 މީޓަރު ދިގު ތަނެކެވެ. މިތަން ހަދާފައި ވަނީ ތަނަށް އެރި ފެނުގެ ތެރޭގައި ކުޑަކުދިންނަށް ކުޅެއުޅެވޭ ގޮތަށެވެ.
